SHI KUBALONGEKA KINKUMBULU, LE WIIPANGULANGA’MBA, ‘LE LEZA WADI KWEPI?’ NANSHA LE WATENWE NA KINKUMBULU MU BOBE BŪMI KYAKULENGEJE WIIPANGULE SHI LEZA UKUTELE MUTYIMA?

Padi ubwanya kwimona pamo bwa Sheila, ushikatanga mu États-Unis. Byaatamīne mu kisaka kisenswe bininge myanda ya kipwilo, unena’mba: “Tamba ku bwanuke nadi ndamete kudi Leza mwanda ye Mupangi wetu. Inoko, nkyadipo nemona’mba ngidi nandi pabwipi. Nadi nanga’tu amba umwene, inoko na kulampe. Nkyadipo mona’mba Leza unshikilwe, inoko nkyadipo nkulupile nansha dimo amba unsenswe.” Mwanda waka Sheila wadi walakanaalakana nenki? Ushintulula’mba: “Kisaka kyetu kyalwile na byamalwa bivule kyoki ke kyoki, kadi byamwekele amba Leza ketukweshepo nansha dimo.”

Pamo bwa Sheila, padi ukulupile amba Leza Mwinē Bukomo Bonso udi’ko. Inoko padi wiipangulanga shi bine ukutele mutyima. Yoba, muntu moloke wādi na lwitabijo mu bukomo ne tunangu twa Mupangi, kyaba kimo nandi wātatene uno muswelo. (Yoba 2:3; 9:4) Yoba pa kutanwa na byamalwa kyoki ke kyoki​—wātyumukilwe mu bidyoma​—wāipangula Leza amba: “I kika le kyofila mpala yobe ne kumona ami bu walwana nobe?”​—Yoba 13:24.

Lelo i bika binena’po Bible? Lelo Leza ye ufwaninwe kutopekwa shi kubalongeka kinkumbulu? Lelo kudi bubinga bulombola’mba Leza utele bantu bonso mutyima ne kuta’o umo ne umo? Mu mwanda utala muntu ne muntu, lelo tubwanya kuyuka shi bine Leza witutele mutyima, wivwanije ngikadilo yotutanwa’mo, witwivwanina lusa, nansha kwitukwasha ku makambakano etu?

Mu bishinte bilonda’ko, tusa kubandaula’mo byobya bitufundija bupangi pa muswelo witutele Leza mutyima. (Loma 1:20) Kupwa, tusa kubandaula ne byobya binena’po Bible. Poenda ‘umuyuka’ kupityila ku bupangi ne ku Kinenwa kyandi, po pene ukakulupila’mba ‘ukutele mutyima.’​—1 Yoano 2:3; 1 Petelo 5:7.