Mutumibwa Polo wālembēle bene Kidishitu ba mu Tesalonika amba: “Shi muntu kakōkelapo binenwa byetu bya mu uno mukanda, yao mutūlei kiyukeno.” (2 Ts. 3:14) Mafuku kunyuma, twanenene amba buno bulombodi bwālembēlwe bakulumpe. Shi muntu wendelela kupumpunya misoñanya ya mu Bible pa kupwa kumudingila misunsa mivule, bakulumpe badi babwanya kunena mwisambo wa kidyumu ku kipwilo. Kupwa, basapudi kebadipo babwanya kupityija kitatyi na yewa utūdilwe kiyukeno.

Inoko, kusakilwa bujadiki. Pano tubaivwanija’mba madingi a Polo afunkila pa butyibi bufwaninwe kukwata muntu ne muntu mu kipwilo mu ngikadilo imoimo. Nanshi bakulumpe kebasakilwapo kunena mwisambo wa kidyumu. Mwanda waka kubaikala kuno kushinta? Tubandaulei byādi bīsambila’po Polo paāletele ano madingi.

Polo wāmwene amba bamo mu kipwilo bādi bananga “bya kavutakanya.” Kebādipo balēmeka madingi a ku bukomo bwa mushipiditu. Mu bupempudi bwandi bwābadikile, Polo wāsoñenye amba: “Shi muntu kaso kwingila, nabya kakidya.” Inoko bamo nansha byobādi na bukomo bwa kwingila, bāendelele kupela kwingila mwa kwikwatakenya. Kadi bādi bekuja mu myanda ya bakwabo. Le bene Kidishitu bādi bafwaninwe kwikala namani na bano bantu ba kavutakanya?—2 Ts. 3:​6, 10-12.

Polo wānenene amba: “Yao mutūlei kiyukeno.” Kishima kya Kingidiki kyalamwinwe pano kidi na mulangwe wa kujingulula uno muntu ne kutadija kutyina wakekala na lupusa lubi podi. Polo kāletelepo ano madingi enka ku bakulumpe kete, ino i ku kipwilo kyonso. (2 Ts. 1:1; 3:6) Nanshi mwine Kidishitu yense umwene mwanabo mwine Kidishitu kakōkelapo madingi a mu Kinenwa kya Leza, ubwanya kutonga ‘kuleka kupwana’ na uno muntu wa kavutakanya.

Le kino kyādi kishintulula’mba uno muntu wādi ufwaninwe kumonwa pamo bwa yewa ufundwilwe mu kipwilo? Aa, mwanda Polo wābwejeje’ko amba: “Endelelai kumudyumuna bu mwanenu.” Nanshi bene Kidishitu bādi babwanya kwendelela kupityija kitatyi pamo na muntu utūdilwe kiyukeno ku kupwila ne mu busapudi. Inoko kebādipo babwanya kutonga kupityija nandi kitatyi pamo mu kwisangaja nansha mu mikenga mikwabo. Mwanda waka? Polo wānenene amba: “Amba afwe bumvu.” Kino kyādi kibwanya kukwasha mwine Kidishitu wiendeja bya kavutakanya afwe bumvu pangala pa mwiendelejo wandi ne kushinta.—2 Ts. 3:​14, 15.

Le bene Kidishitu babwanya kulonda namani ano madingi dyalelo? Dibajinji, tufwaninwe kuyuka na bubine shi mwiendelejo kampanda wa muntu i kunanga “bya kavutakanya,” na mulombwedile’byo Polo. Aye kādipo wisambila pa boba bakwata butyibi bwishile na bwetu mu myanda itala mutyima wa mundamunda nansha muntu aye mwine. Kadi kādipo wisambila pa boba’tu balongele bintu bitusansa. Inoko, Polo wādi wisambila pa boba bapelwe madingi a mu Kinenwa kya Leza, inoko bendelela kutonga kuleka kwiakōkela.

Dyalelo, shi tubamone mwanetu mwine Kidishitu ulombola uno mushipiditu wa kubulwa kikōkeji, a tukakwata batwe bene butyibi bwa kuleka kupityija nandi kitatyi mu kwisangaja. Buno byobudi i butyibi bwa muntu mwine, ketufwaninwepo kwisambila’po na bantu bakwabo ba panja pa kyetu kisaka. Kadi tukendelela kupityija kitatyi pamo na uno muntu ku kupwila ne mu busapudi. Shi washinta mwiendelejo wandi, tubwanya monka kwanza kupityija nandi kitatyi pamo ne mu mikenga mikwabo.