Lelo watangile senene manimelo a uno mwaka a Kiteba kya Mulami? Nabya, tala bidi shi ubwanya kulondolola bino bipangujo:

Le i kimfwa’ka kishile Yehova kya muswelo otufwaninwe kumona bana-bakaji?

Wibalongelanga bintu kwampikwa mboloji, kamonengapo bana-balume bu ba mvubu mpata kutabuka bana-bakaji. Leza utejanga bana-bakaji, utanga mutyima ku mwiivwanino wabo ne ku bisakibwa byabo. Kadi wibakulupile na kwibapa mwingilo wandi wa kwingila.—w24.01, p. 15-16.

Le i muswelo’ka otubwanya kwingidija madingi adi mu Bene Efisesa 5:​7, a amba: “Kemwakipwanai nabo”?

Mutumibwa Polo wādi witudyumuna tuleke kupwana na bantu babwanya kulengeja tukomenwe kulonda misoñanya ya Leza. Kino kipwano kibi kitala boba botupityija nabo kitatyi mpala na mpala ne boba botwisamba nabo pa malezo a mīsambo.—w24.03, p. 22-23.

Le i ku mfumo’ka ya bubela kotufwaninwe kwilama?

Tufwaninwe kudyumuka na mfumo itamba ku batutu ne bakaka mine yokebabandawilepo, nansha misapu itutumina bantu boketuyukilepo, ne ku batupondo bamweka bu batele mutyima ku bubine.—w24.04, p. 12.

Le i bika byotuyukile ne byoketuyukilepo pa muswelo ukatyibila Yehova mambo Mulopwe Solomone ne bantu bāfwile mu Sodoma ne Ngomola ne boba bāfwile pa Dilobe?

Ketuyukilepo shi Yehova wēbatyibīle nsambu ya konakanibwa lonso. Inoko byotuyukile i amba aye uyukile myanda yonso kadi i wa lusa lukatampe.—w24.05, p. 3-4.

Le kutelwa kutelelwe Leza bu “Dibwe” kwitukulupija bika? (Kup. 32:4)

Tubwanya kunyemena kudi Yehova. Aye i ukulupilwa, ufikidijanga nyeke milao yandi. Kadi kashintangapo, umwekejanga ngikadila yandi mu muswelo umo kadi kashintangapo mpango yandi.—w24.06, p. 26-28.

Le i bika bibwanya kukukwasha wibidile mu kipwilo kipya?

Kulupila mudi Yehova, mwine ukakukwasha monka mwaākwashishe bengidi bandi pa kala. Leka kudingakanya kipwilo kyodi’mo na kipwilo kyowatambile’mo. Wipāne mu kipwilo kipya, kadi longa bukomo bwa kupwana na balunda bapya.—w24.07, p. 26-28.

Le i ñeni’ka ilombwelwe mu byelekejo bisatu bidi mu Mateo shapita 25?

Kyelekejo kya mikōko ne bambuji kilombola kamweno kadi mu kwikala na kikōkeji ne lulamato. Kyelekejo kya bajike badyumuke ne bendalale kilombola kamweno kadi mu kwikala beteakanye kadi badyumuke. Kadi kyelekejo kya talenta kilombola mvubu idi mu kwikala bankanka kadi ba kininga.—w24.09, p. 20-24.

Le kibidi kya pa kibelo kya tempelo ya Solomone kyādi na bula bwa namani mu bwimwa?

Mu 2 Bilongwa bya mafuku 3:4, tutanga mu bilembwa bimo bya pa kala amba i “maboko 120,” ko kunena’mba kibidi kya mametele 53 mu bwimwa. Inoko tutanga mu bilembwa bikwabo amba i “maboko 20,” ko kunena’mba mametele kitema mu bwimwa. Bimweka bu bino bilembwa bya mfulo bikwatañene na mutyika wa mumbu ya tempelo.—w24.10, p. 31.

Le kwikala ‘mulume wa mukaji umo’ kushintulula bika ku mwingidi wa mingilo? (1 Tm. 3:12)

Kushintulula’mba ufwaninwe kusonga mwana-mukaji umo kadi kafwaninwepo kulonga makoji. Ne kadi kafwaninwepo kuta mutyima mwana-mukaji mukwabo byampikwa kwendela’mo.—w24.11, p. 19.

Mwanda waka tubwanya kunena’mba binena Yoano 6:53 kebyādipo bifunkila pa Bidibwa bya Kyolwa bya Mfumwetu?

Yoano 6:53 wisambila pa mvubu idi mu kudya ngitu ya Yesu ne kutoma mashi andi. Yesu wānenene bino binenwa mu mwaka wa 32 Y.M., mu Ngadilea, ku Bayuda bādi banenwe kulombola lwitabijo mwadi. Inoko, Bidibwa bya Kyolwa bya Mfumwetu byāshilwile mwaka umo pa kupita’po mu Yelusalema. Pano Yesu wādi wisamba na boba bādi ba kuludika pamo nandi mūlu.—w24.12, p. 10-11.