KIFUNDWA 46
Mwanda Waka Wipāne ne Kubatyijibwa?
Ubwanya kwipāna kudi Yehova na kumulaya mu milombelo amba ukamutōta enka aye bunka bwandi ne amba kiswa-mutyima kyandi kyo ke kintu kibajinji mu būmi bobe. (Ñimbo ya Mitōto 40:8) Kupwa, kobatyijibwa. Kubatyijibwa kobe, kukalombola bantu bonso amba kodi mwipāne. Butongi bwa kwipāna batwe bene kudi Yehova i bwa mvubu mpata kupita bonso. Le i kika kikakukunka ku mutyima ukwate buno butyibi busumininwe kadi bukashinta būmi bobe?
1. I kika kitononanga muntu epāne?
Buswe bo bwitutononanga twipāne kudi Yehova. (1 Yoano 4:10, 19) Bible witusoñanya’mba: “Sanswa Yehova Leza obe na mutyima obe onso, na muya obe onso, na ñeni yobe yonso, ne na bukomo bobe bonso.” (Mako 12:30) Tulombolanga’mba tusenswe Leza mu binenwa byetu ne mu bilongwa byetu. Pamo’nka bwa ba mulume ne mukaji besenswe bya binebine bafika ne ku kwisonga, buswe bwetu botusenswe Yehova bo bwitutononanga twipāne kwadi ne kubatyijibwa.
2. Le i madyese’ka eselanga Yehova Batumoni bandi babatyijibwe?
Shi ubabatyijibwa, ubatwela mu kisaka kya nsangaji kya Yehova. Mwine’mwa, ukemwena mu miswelo mivule buswe bwandi bwakusenswe, kadi nobe ukamufwena bininge kupita na mobikadile dyalelo. (Tangai Malaki 3:16-18.) Yehova ukekala ke Shobe, kadi nobe ukekala mu kisaka kya batutu ne bakaka ba ntanda yonso basenswe Yehova kadi bakusenswe ne abe. (Tangai Mako 10:29, 30.) Shako nobe, ufwaninwe kutabula matabula kampanda pa kubatyijibwa. Ufwaninwe kwifunda kuyuka Yehova, kumusanswa, ne kulombola lwitabijo lobe mudi wandi Mwana. Ku mfulo, ufwaninwe kupāna būmi bobe kudi Yehova. Shi ubatabula ano matabula ne kubatyijibwa, papo ubatwela mu dishinda ditwala ku būmi bwa nyeke. Kinenwa kya Leza kinena’mba: “Lubatyijo . . . lwimupandijanga.”—1 Petelo 3:21.
LANGULUKA BININGE
Bandaula mwanda waka i kya mvubu wipāne kudi Yehova ne kubatyijibwa.
3. Batwe bonso tufwaninwe kutonga i ani otukengidila
Mu Isalela wa kala, bantu bādi balanga’mba babwanya kutōta mu kitatyi kimo kyonka Yehova ne leza wa bubela, Bāla. Inoko Yehova wātumine mupolofeto wandi Ediya akalemunune ino milangwe yabo mibi. Tangai 1 Balopwe 18:21, ne kwisambila pa kino kipangujo:
-
Le bene Isalela bādi na butongi’ka bwa kutonga?
Pamo’nka bwa bene Isalela, netu tufwaninwe kutonga i ani otukengidila. Tangai Luka 16:13, ne kwisambila pa bino bipangujo:
-
Mwanda waka ketubwanyapo kutōta Yehova pamo ne muntu mukwabo nansha kintu kikwabo?
-
Le tukalombola namani Yehova amba twi batonge kumutōta aye?
4. Langulukila pa buswe bukusenswe Yehova
Yehova i mwitupe byabuntu bivule bine bilumbuluke. Le netu i bika byotubwanya kumupa? Talai VIDEO.
Le i miswelo’ka imo ilombwele’mo Yehova buswe bwandi kodi? Tangai Ñimbo ya Mitōto 104:14, 15 ne 1 Yoano 4:9, 10, ne kwisambila pa bino bipangujo:
-
Le i byabuntu’ka bikupēle Yehova byosangelanga mpata?
-
Ne bino byabuntu i bikulengeje umumone namani?
Kitatyi kyotulangulukila pa kyabuntu kyotusenswe bininge, tusakanga nyeke kufwija’ko yewa mwine witupele’kyo. Tangai Kupituluka mu Bijila 16:17, ne kwisambila pa kino kipangujo:
-
Pobandaula byonso bikulongēle Yehova, le kino kikutononanga nobe umupe bika?
5. Kwipāna kuletanga madyese mavule
Bantu bavule balañanga’mba ntumbo, kaji kayampe ne lupeto byo bibwanya kuleta nsangaji. Ino le i bya bine? Talai VIDEO, ne kwisambila pa bino bipangujo:
-
Nansha uno mukayi wa mu video, byaadi usenswe futu, ino mwanda waka walekele’yo?
-
Watongele kwipāna aye mwine ke ku futupo, ino i kudi Yehova. Molangila, le wakwete butyibi buyampe? Mwanda waka?
Mutumibwa Polo, kumeso kwa kwikala’ye bu mwine Kidishitu, wādi ulondalonda kaji ka ntumbo. Wēfundile bijila bya Bayuda na mwadimu mutumbe. Inoko wālekele’byo mwanda wa kwikala mwine Kidishitu. Lelo Polo wēalakenye pa kino? Tangai Bene Fidipai 3:8, ne kwisambila pa bino bipangujo:
-
Mwanda waka Polo wātelele bu “busala,” nansha butyafu byobya byonso byaādi ulonga kumeso kwa kwikala bu mwine Kidishitu?
-
I bika byaāmwenine’mo?
-
Shi udingakanye būmi bwa kwingidila Yehova ne bobwa bwa kulonda bintu bikwabo, molangila buyampe’po i bwepi?
Pāikele Polo ke mwine Kidishitu, byobya byaāmwenine’mo i bivule kupita byaāshile
BANTU BAMO BANENANGA’MBA: “Kupāna būmi bobe kudi Leza i kubulwa ñeni.”
-
Molangila, mwanda wa bika i kya tunangu kwipāna kudi Yehova?
MU KĪPI
Buswe bo bwitutonona twipāne kudi Yehova ne kubatyijibwa.
Pitulukai’mo
-
Mwanda waka Yehova ye otufwaninwe kusanswa ne kutōta na mutyima wetu onso?
-
Le Yehova weselanga namani Batumoni bandi babatyijibwe?
-
Le usaka kwipāna nobe kudi Yehova?
KIMBA
Tala umone mwanda waka bano ba kaimba ne mukayi batongele kwipāna kudi Yehova.
Bipangujo bya Bankasampe—I Bika Byonkalonga mu Bwami Būmi?—Bavuluka (6:54)
Tala bubinga bukwabo bwa kwipānina kudi Yehova.
“Mwanda Waka Ufwaninwe Kwipāna Kudi Yehova?” (Kiteba kya Mulami, 1 Kweji 1, 2010)
Mu ino minjiki ya video, tala nsangaji ikalanga na boba bepāna kudi Yehova.
Mu nsekununi inena’mba “Nadi Neipangula Myaka na Myaka’mba, ‘I Kika Kyotwikadile’ko?’” tala’mo bine byatonwene mwana-mukaji umo atalulule monka bintu byaadi ubadikije kumeso.
“Bible Ushintanga Būmi” (Kiteba kya Mulami, 1 Kweji 11, 2012)
Tala'po Bidi ne Bino:
BIPANGUJO BIPANGULWANGA DIVULE
Le Kifundwa kya Bible Kīfundanga Batumoni ba Yehova na Bantu I Bika?
Mu mpangiko ya kwifunda Bible ku bitupu na Batumoni ba Yehova, ubwanya kwingidija’mo bwalamuni bo-bonso bwa Bible. Ita kisaka kyobe kyonso nansha balunda nobe batanwe’po.
