KIFUNDWA 38
Fwija’ko pa Kyabuntu kya Būmi
Būmi bwitupanga mukenga wa kwimwena bintu bivule bya kutendelwa. Nansha shi tutanwa na makambakano, kudi bintu bikwabo bya mu būmi bituletelanga nsangaji nyeke. Le tukalombola namani amba tufwijanga’ko pa kino kyabuntu kya būmi? Ne le, i bubinga’ka bukatampe bwine bwa kufwijija’ko?
1. Mwanda waka tufwije’ko pa mwanda wa būmi?
Tufwaninwe kufwija’ko pa mwanda wa būmi mwanda i kyabuntu kitamba kudi Tata wetu wa buswe, Yehova. Aye ye “nsulo ya būmi”—mwine wāpangile būmi bonso. (Ñimbo ya Mitōto 36:9) “Aye ye upa bantu bonso būmi ne umpuya ne bintu byonso.” (Bilongwa 17:25, 28) Yehova witupanga byonso byotusakilwa mwanda wa twikale bōmi. Kutentekela pa kwitupa būmi, aye wibukwatakanyanga mu muswelo ulengeja tuloelelwe’bo.—Tangai Bilongwa 14:17.
2. Le tukalombola namani Yehova amba tumufwijanga’ko pa kino kyabuntu kya būmi?
Tamba’tu powaimityilwe, Yehova wadi ukulama. Davida, mutōtyi umo wa Leza, wānenene ku bukomo bwa mushipiditu amba: “Meso obe aumwene enka ne ponadi kabale.” (Ñimbo ya Mitōto 139:16) Yehova ukwete na bulēme būmi bobe. (Tangai Mateo 10:29-31.) Bisansanga bininge Yehova shi muntu kampanda wakete ku kusaka būmi bwa muntu mukwabo nansha bwa aye mwine. a (Divilu 20:13) Kadi ufītwanga shi tubatūla būmi bwetu mu kyaka ku kusaka, nansha shi tubaleka kwikinga ne kukinga būmi bwa bakwabo. Shi tukwatakanye ne kulēmeka būmi bwetu ne bwa bakwabo, nabya tubalombola’mba tufwijanga’ko pa kino kyabuntu kya kutendelwa kya būmi.
LANGULUKA BININGE
Tala miswelo yobwanya kulombola kufwija’ko pa mwanda wa kyabuntu kya būmi.
3. Kwatakanya bukomo bobe bwa ngitu
Batwe bene Kidishitu bepāne, twingidijanga būmi bwetu bonso mwanda wa kwingidila nabo Yehova. Bidi pamo bwa batwe bapāna kitapwa kya imbidi yetu kudi Leza. Tangai Bene Loma 12:1, 2, ne kwisambila pa bino bipangujo:
-
I bika bifwaninwe kwitutonona tukwatakanye biyampe bukomo bwetu bwa ngitu?
-
Le i mu miswelo’ka imo motubwanya kukwatakanya bukomo bwetu bwa ngitu?
4. Dyumuka byaka bilemekañana ne bipayañana
Bible witukankamika twepuke bibidiji byonso bileta kyaka. Talai VIDEO amba mumone bintu bimo byotubwanya kulonga pa kwikinga.
Tangai Nkindi 22:3, ne kwisambila pa muswelo obwanya abe pamo ne bakwabo kwikinga ku byaka . . .
-
pomudi kwinjibo.
-
pomudi ku kaji.
-
pomukaya.
-
pomulongolola motoka nansha pomwendeja’o.
5. Lēmeka būmi bwa mwana udi mu dīmi
Davida, wēsambīle mu muneneno wa lulumbi pa muswelo utele Yehova mutyima ku būmi bwa mwana udi mu dīmi ne ku kutama kwandi. Tangai Ñimbo ya Mitōto 139:13-17, ne kwisambila pa kino kipangujo:
-
Mungya Yehova, le būmi bwa muntu bushilulanga paimitwa’ni i pabutulwa?
Bijila bya Yehova byaāpēle bene Isalela ba pa kala byādi bikinga bainabana ne babo bana bakidi mu memi. Tangai Divilu 21:22, 23, ne kwisambila pa bino bipangujo:
-
Lelo Yehova wiivwananga namani shi muntu waipaya pampikwa kusaka mwana udi mu dīmi?
-
Ino le Yehova ukeivwana namani shi muntu waipaya ku kusaka mwana udi mu dīmi? b
-
Umona namani uno mumweno wa Leza?
Kyaba kimo enka ne mwana-mukaji ulēmekele būmi ubwanya kumona’mba muswelo umo kete wamushadila’ko wa kya kulonga’po i kupulumuna dīmi. Tangai Isaya 41:10, ne kwisambila pa bino bipangujo:
-
Shi mwana-mukaji waningilwa kupulumuna dīmi, i kudi ani kwafwaninwe kwenda kukalomba bukwashi? Mwanda waka?
BANTU BAMO BANENANGA’MBA: “Mwana-mukaji udi na bwanapabo bwa kupulumuna dīmi—mwene i ngitu yandi.”
-
Le i bika byakukulupija’mba Yehova ukwete na mutyika būmi bwa inamwana ne bwa mwana udi mu dīmi?
MU KĪPI
Bible witufundija tusanswe, tulēmeke, kadi tukinge kyabuntu kya būmi kitupēle Yehova. Ko kunena’mba i būmi bwa batwe bene ne bwa bakwabo.
Pitulukai’mo
-
Mwanda waka būmi bwa muntu i bulēme mpata kudi Yehova?
-
Lelo Yehova wiivwananga namani shi muntu wakete būmi bwa muntu mukwabo ku kusaka?
-
Mwanda waka usaka kufwija’ko pa kino kyabuntu kya būmi?
KIMBA
I muswelo’ka otukafwija’ko Yehova pa kino kyabuntu kya būmi?
Kimba kilondololwa kya kino kipangujo: Le Leza ubwanya kufwila lusa mwana-mukaji upulumwine dīmi?
“Le Bible Unena Bika pa Kupulumuna Dīmi?” (Kishinte kya pa Entelenete)
Tala mwanda waka muswelo umona Leza būmi moufwaninwe kwituludikila potutonga bya kwipwija nabyo mukose.
“Le Ufwaninwe Kwitūla mu Kyaka na Kukaya Makayo Atyikukwa?” (Langukai!, 8 Kweji 10, 2000)
Le bikekala namani shi muntu waikala na milangwe ya kwiyoa? Tala bukwashi buleta Bible.
a Yehova utele bininge mutyima boba badi na mityima mityumuke. (Ñimbo ya Mitōto 34:18) Uyukile misanshi yobadi nayo ibatwala ku milangwe ya kwiyoa, kadi ukimba kwibakwasha. Pa kumona mwakwashishanga bantu badi na ino milangwe, tanga kishinte kinena’mba “Nsakanga Kufwa—Le Bible Ubwanya Kunkwasha Pondi na Milangwe ya Kwiyoa?” kidi mu kipindi Kimba mu kino kifundwa.
b Boba baikele kupulumuna dīmi kebafwaninwe kulēmenenwa na milangwe ya kwitopeka—Yehova ubwanya kwibafwila lusa. Pa kuyukila’ko myanda mikwabo, tala kishinte kinena’mba “Le Bible Unena Bika pa Kupulumuna Dīmi?” kidi mu kipindi Kimba mu kino kifundwa.
Tala'po Bidi ne Bino:
BIPANGUJO BIPANGULWANGA DIVULE
Le Kifundwa kya Bible Kīfundanga Batumoni ba Yehova na Bantu I Bika?
Mu mpangiko ya kwifunda Bible ku bitupu na Batumoni ba Yehova, ubwanya kwingidija’mo bwalamuni bo-bonso bwa Bible. Ita kisaka kyobe kyonso nansha balunda nobe batanwe’po.
