Mu mafuku 9 Kweji 10, 2024, Mwingilo wa Ntanda Yonso Utala Banyema waletele lapolo ya bulanda ilombola bintu bilupuka ku muswelo onakanibwa banyema na bantu. Ino lapolo yalombwele amba, “mu myaka 50 ipityile’i, (tamba 1970-2020), buvule bwa banyema bwatyepele mu 73 pa katwa (73%).” Ino lapolo yadyumwine amba: “Tubwanya kunena’mba bintu bisa kulongeka mu myaka itano kumeso’ku bisakulombola musa kwikadila būmi pano pa ntanda mafuku kumeso.”

 Bantu bavule bajiñwanga mutyima na malapolo a uno muswelo, ne i byendele’mo. Tusenswe umbuo wetu mulumbuluke wa ntanda, kadi tushikilwe kumona banyema badi’po bonakanibwa. Twiivwananga namino mwanda Leza usakanga tukwatakanye banyema.—Ngalwilo 1:27, 28; Nkindi 12:10.

 Ubwanya kwiipangula’mba, ‘Le tubwanya kukinga biyampe banyema badi pano pantanda? Le Bible unena’po namani?’

 Nansha shi tubalonga bukomo namani, būmi bwa kumeso bwa banyema budi mu makasa a Leza, ke etupo. Bible i mulaye mu Kusokwelwa 11:18 amba, Leza ukonakanya “boba bonakanya ntanda.” Uno vese witufundija bintu bibidi:

1.  1. Leza kakalekapo bantu bonakanye ntanda lonso.

2.  2. Panopano ponka Leza ukalonga’po kintu. Tubayuka kino namani? Tamba mu bula bwa mānga kufika ne pano, konakanibwa kwa banyema pano pa ntanda kwadi kekwaikele kukatampe na motwikumwena dyalelo.

 I bika bikalonga Leza pa kupwija ano makambakano? Ukengidija umbikalo wandi wa mūlu, nansha Bulopwe bwandi amba bubikale ntanda yonso. (Mateo 6:9) Uno umbikalo ukaletela bantu ba kikōkeji bufundiji bobasakilwa mwanda wa kukwatakanya banyema ba pano pa ntanda ne kwibakinga.—Isaya 11:9.