Ku bavule, muntu uzumbija mutyima a i muntu uzakala, muntu ukomenwa kubūka lubanga senene pa butanda, nansha yewa wisambila kyaba kyonso enka pa myanda kapwila imuzakaja.

 Bamo ye mobalongelanga kitatyi kyobazumbija mutyima. Inoko bakimbi i basokole amba kudi bantu bakwabo—nakampata bana-balume—batompanga kulonga muswelo mukwabo. Lapolo imo ilombola’mba bana-balume “basenswe kutoma mālwa akolwañana ne dyamba mwanda wa kutalula milangwe ya kuzumbija mutyima, enka nenki byobya bimweka’mba i nkolwa ya mālwa nanshi papo i biyukeno bya kuzumbija mutyima. Kuzumbija mutyima kwa bana-balume kumwekelanga divule ku bulobo ne kalobolobo.”

 Shako ke bana-balumepo bonso bamwekejanga’ko uno muswelo. Ino nansha shi muntu wamwekeja’ko namani, kuzumbija mutyima kubaikala bu makambakano enda avudila’ko mu ano “mafuku a mfulo [makomo] ne mwa kulongela.” (2 Temote 3:1) Shi wikondanga na kuzumbija mutyima, le Bible ubwanya kukukwasha?

 Bible udi na madingi mavule akulupilwa etukwasha potuzumbija mutyima. Tala bino bimfwa bisatu.

1.  1. “Kemwakizumbijai mityima nansha dimo pa mwanda wa dya kesha, ke-pantu dya kesha dikekala na bya kuzumbijija mutyima byadyo. Difuku ne difuku didi na makambakano adyo mabwane.”—Mateo 6:34.

    Ko kunena’mba: I kya tunangu kotudi kuleka kwikambakanya pa bintu bikalongeka (nansha kebikalongekapo) kumeso. Divule dine, bintu kebilongekangapo na motwadi twibyakamīnwe. Mu myanda mikwabo, bintu bilumbulukanga’nka ne kulumbuluka mu kitulumukila.

    Tompa kulonga nenki: Vuluka kintu kampanda kibi kyowadi wakaminwe mafuku kunyuma amba kisa kulongeka—ino kekilongekelepo. Ebiya bandaula byabyo byoakaminwe pano, ne kutala pampikwa kwididika kyaka kibwanya kubaija mwanda’wa.

2.  2. “Enka kyuma mokinonenanga kyuma, muntu nandi unonanga mulunda nandi.”—Nkindi 27:17.

    Ko kunena’mba: Bantu bakwabo babwanya kwitukwasha tunekenye kuzumbija mutyima—shi tubebalombola’mo. Babwanya padi kwitupa madingi kampanda a kamweno a byebatene mu būmi bwabo. Nansha kadi, mumweno wabo ungi pa mwanda’wa ukokeja kwitukwasha netu tumone bintu mu muswelo mukwabo.

    Tompa kulonga nenki: Vuluka muntu umo ubwanya kukupa madingi mayampe, kimfwa mulunda nobe umo watenwe na mwanda udi na obe. Mwipangule akulombole byobya byamwendekēle ne byobya kebyamwendekēlepo.

3.  3. “Koku mwela kuzumbazumba [“makambakano; malangalanga,” kunshi kwa dyani] kwenu konso kwadi, mwanda aye wimutele mutyima.”—1 Petelo 5:7.

    Ko kunena’mba: Leza utele bininge mutyima ku boba basusuka. O mwanda witwita tulombele kwadi pa mwanda o-onso walēmenena milangwe yetu.

    Tompa kulonga nenki: Lemba mulongo wa myanda ikuzumbija mutyima. Kupwa wiitele mu milombelo kudi Leza, na kumushintulwila mwanda ne mwanda ne kumulomba bukwashi bwa mwa kwiunekenenya.

 Bible kemaninepo’nka pa kuleta madingi a mwa kulwila na kuzumbija mutyima. I mulaye amba panopano ponka malangalanga etukambakanya dyalelo asa kupwa pwē. Le akapwa namani?

 Bulopwe bwa Leza busa kutalula’ko myanda mine ilengeja mityima izumbe. (Kusokwelwa 21:4) Bine, mu bwendeji bwa buno Bulopwe, enka ne kuvuluka myanda izumbija mutyima kekuketusanshijapo.—Isaya 65:17.

 Buno būmi bwa kumeso bo abo bukusakila “Leza mwine upāna ndoe.” (Bene Loma 16:20) Witukulupija’mba: “Mwanda ndyukile biyampe milangwe yonemulangila, . . . milangwe ya ndoe, ke ya kyamalwapo, mwanda wa kwimupa būmi bwa kumeso ne lukulupilo.”—Yelemia 29:11.