Yoshua 5:1-15
5 Ebiya balopwe bonso ba bene Amole+ badi bukila bwa kushika* kwa Yodano ne balopwe bonso ba bene Kenani+ badi dya ku dijiba pa kwivwana’tu amba Yehova waumije mema a Yodano ku meso a bene Isalela enka ne byobaabukile, mityima yebafwa,*+ kebakidipo na bukankamane* nansha bumo pa mwanda wa bene Isalela.+
2 Mu kine kitatyi’kya Yehova wanena Yoshua amba: “Longa mpete ya mabwe makomo utweje monka bana-balume ba Isalela kwisao+ musunsa wa bubidi.”
3 Ponkapo Yoshua wapunga mpete ya mabwe makomo watweja bana-balume ba Isalela kwisao ku Ngibea-Halalote.*+
4 Kino kyo kyebatwejeje Yoshua kwisao: Bana-balume bonso ba mu bantu batambile mu Edipito, bana-balume bonso ba bulwi,* bafwile mu ntanda mutuputupu mu lwendo pobapwile kutamba mu Edipito.+
5 Bantu bonso batambile mu Edipito badi batwejibwe kwisao, ino bantu bonso babutwidilwe mu ntanda mutuputupu mu lwendo pobapwile kutamba mu Edipito kebadipo batwejibwe kwisao.
6 Bene Isalela baendele lwendo lwa myaka 40+ mu ntanda mutuputupu kufika ne byafwile muzo onso, ko kunena’mba, bana-balume ba bulwi kebakōkelepo diwi dya Yehova+ batambile mu Edipito. Yehova webatyipīle amba kakebalekapo bamone ntanda+ yatyipīle Yehova bakulutuba babo amba uketupa’yo,+ ntanda ikuka mabele ne būki.+
7 Ebiya wapingakenye babo bana pa kyabo kyaba.+ Bano bo batwejibwe kwisao na Yoshua; kebadipo batwejibwe kwisao mwanda kebebatwejejepo kwisao mu lwendo.
8 Abo pa kupwa kutweja muzo onso kwisao, bashikete’nka popa pobadi’pa mu nkambi enka ne byobakomene.
9 Penepo Yehova wanena Yoshua amba: “Dyalelo nafundwila kulampe mutonko wa Edipito.” O mwanda kino kifuko kitwanga bu Ngilengale*+ ne ku dyalelo dino’di.
10 Bene Isalela baendelele kutūla nkambi ku Ngilengale, bavuluka Pashika mu difuku dya 14 dya kweji,+ ku kyolwa, mu malungu a Yediko mudi zolē.
11 Ebiya bashilwile kudya bintu bya ntanda’ya mu difuku dyalondele’po kupwa kwa Pashika, mikate yampikwa kiyujo+ ne miseke mikange, mu dino difuku dimo dyonka.
12 Penepa māna aketeka mu difuku dyalondele’po pobadile bintu bimobimo bya ntanda’ya; bene Isalela+ kebakidipo monka na māna, ino bashilwile kudya bintu bya ntanda ya Kenani mu mwine mwaka’wa.+
13 Yoshua paadi kubwipi na Yediko, watulula meso wamona muntu+ wimene ku meso andi ukwete kipete kisomone mu kuboko kwandi.+ Yoshua waenda kwadi kamwipangula’mba: “Le udi ku mutamba wetu’ni i ku mutamba wa balwana netu?”
14 Nandi walondolola’mba: “Mhm, ino ne mwiye bu mfumu* wa kibumbo kya divita kya Yehova.”+ Ponkapo Yoshua wapona mpala pa nshi wevukwila kamwipangula’mba: “Le i bika bisaka mfumwami kusapwila mwingidi wandi?”
15 Mfumu wa kibumbo kya divita kya Yehova walondolola Yoshua amba: “Vūla bikwabilo ku maulu obe, mwanda pa kifuko poimene’po i pajila.” Bukidi bonka Yoshua walongela monka.+
Kunshi kwa Dyani
^ Kishima pa kishima i, “mutamba wa ku dijiba.”
^ Kishima pa kishima i, “mityima yabo yebasunguluka.”
^ Kishima pa kishima i, “kekwadipo monka mushipiditu mobadi.”
^ Ko kushintulula’mba “Mukuna wa Bikoba bya Ngitu ya Bwana-Bulume.”
^ Nansha’mba “bana-balume badi na myaka ya kwikala basola.”
^ Ko kushintulula’mba “Kufundula; Kufundwila Kulampe.”
^ Nansha’mba “mulopwe.”
