Samwele Umbajinji 9:1-27
-
Samwele wetana na Solo (1-27)
9 Kwadi mwana-mulume umo wa Benjemani witwa bu Kishi,+ mwanā Abiele, mwanā Zelola mwanā Bekolate mwanā Afya, mwine Benjemani+ kadi mpeta mukatampe.
2 Wadi na mwana mwana-mulume witwa bu Solo,+ nkasampe kadi muyampe mpala—kekwadipo mwana-mulume mu bene Isalela wadi muyampe mpala kumupita—shi wimene, wadi mulampe mutwe ne bipuji kupita bantu bonso.
3 Bampunda* ba Kishi shandya Solo pa kujimina, Kishi wanena wandi mwana Solo amba: “Sela’ko mwingidi umo wende ukakimbe bampunda.”
4 Bapita mu ntanda ya ngulu ya Efelaimi ne mu ntanda ya Shadisha, ino kebebatenepo. Baenda mu ntanda ya Shadima, ino bampunda kebadi’kopo. Bapita mu ntanda yonso ya bene Benjemani, ino kwibatana mpika.
5 Bafika mu ntanda ya Zufe, penepa Solo wanena mwingidi wandi obadi nandi amba: “Iya tujoke, kutyina’mba tata wakanza kwitulanga batwe pa kyaba kya kulanga bampunda.”+
6 Ino mwingidi watentulula’mba: “Tala, kudi muntu wa Leza mu kyoki kibundi, muntu mupebwe bulēme. Byonso byanena bifikidilanga binebine.+ Twende’ko’nka pano. Padi ubwanya kwitulombola dishinda dya kwenda.”
7 Ponkapo Solo wanena mwingidi wandi amba: “Shi twende, tusa kuselela uno muntu bika? Mu tufuko twetu kemukidipo mikate; i kutupu kya kuselela muntu wa Leza wa bine bu kyabuntu. Le tudi na bika?”
8 Ebiya mwingidi walondolola monka Solo amba: “Tala! Kudi kipindi kimo kya pa bipindi biná bya Shekele* ya ndalama mu kuboko kwami. Nsa kupa’kyo muntu wa Leza wa bine, nandi usa kwitulombola dishinda dya kwenda.”
9 (Pa kala mu Isalela, bino byo byadi binena muntu shi kaenda kukakimba Leza, amba: “Iya twende kwa mumoni.”+ Mwanda mupolofeto wa dyalelo wadi witwa pa kala bu mumoni.)
10 Penepa Solo wanena mwingidi wandi amba: “Ubanena biyampe. Twende.” Ebiya baenda ku kibundi kwadi muntu wa Leza wa bine.
11 Pobadi bakikanda mukuna benda ku kibundi, betana na bana-bakaji badi bakateka mema. Penepa bebepangula’mba: “Lelo mu kino kifuko mudi mumoni?”+
12 Balondolola’mba: “Udi’mo. Tala, yewa kumeso kwenu. Pejai’nka pano, mwanda dyalelo waiya mu kibundi, ke-pantu bantu basa kulambula kitapwa+ pa mutenta+ dyalelo.
13 Shi mubafika’tu mu kibundi, musa kumutana kumeso kwa aye kukanda akadye pa mutenta. Bantu kebasapo kudya enka ne byafika, mwanda aye ye weselanga kitapwa. Shi wapu, penepa boba betyilwe kebadi. Shi ke pano kandai bukidi musa kumutana.”
14 Penepo baenda mu kibundi. Abo pa kufika mu bukata bwa kibundi, bamona Samwele wiya kwibasambakana mwa kukandila pa mutenta.
15 Difuku dimo kumeso kwa Solo kwiya, Yehova wasapwidile* Samwele amba:
16 “Kesha kubwipi na kino kitatyi, nsa kukutumina muntu utamba ku ntanda ya Benjemani.+ Ufwaninwe kumushinga māni bu mutangidiji wa bantu bami bene Isalela,+ kadi aye ukapandija bantu bami mu makasa a bene Fidishitia. Mwanda namone malwa a bantu bami, ne kudila kwabo kubafika kondi.”+
17 Samwele pa kumona Solo, Yehova wamulombola’mba: “Uno ye muntu onakusapwidile amba, ‘Ye aye usa kuludika bantu bami.’”*+
18 Penepo Solo wafwena Samwele pa bukata bwa kibelo kanena’mba: “Nsapwile’po bidi, le njibo ya mumoni idi kwepi?”
19 Samwele walondolola Solo amba: “Ami ye mumoni. Mbadikidile kukanda pa mutenta, dyalelo musa kudya nami pamo.+ Nsa kukuleka wende lubanga, kadi nsa kukusapwila byonso byosaka kuyuka.*
20 Ino pa mwanda wa bampunda bajimine pano kepadi mafuku asatu’ba,+ kokibalanga mwanda ke bamweke. Le bintu byonso bilumbuluke bya Isalela i bya ani? Mwene i byobe ne bya njibo yonso ya shobe?”+
21 Pa kino Solo walondolola’mba: “Mwene ami ne mwine Benjemani wa mu kisaka kityetyetyetye mu bisaka bya Isalela,+ ne difu dyetu mwene i dityetye bininge mu mafu onso a kisaka kya Benjemani? Penepa kyowaunenena nankyo i kika?”
22 Ebiya Samwele wasela Solo ne mwingidi wandi waenda nabo mu njibo mwa kudīla, webapa kyaba kya kumeso kwa betwa bonso; badi bana-balume kintu kya 30.
23 Samwele wanena mutēki amba: “Leta kipindi kyonakupele ne kyonakulombwele amba, ‘Wikitūle pafula.’”
24 Ponkapo mutēki watekuna kidyoma kya kulu ne byadi’ko, wekitūla ku meso a Solo. Kupwa Samwele wanena’mba: “Kintu kyadi kibikilwe kibatūlwa ku meso obe. Dya’kyo, mwanda kyadi kikubīkīlwe pa kino kitatyi. Mwanda nebalombwele amba, ‘Ne mwityije beni.’” Ebiya Solo wadya pamo na Samwele mu dine difuku’dya.
25 Penepo batamba pa mutenta+ batūkila mu kibundi, kadi badi besamba’nka kwisamba na Solo peulu pa njibo.
26 Babūka lubanga futwi, kadi kibangabanga pa kutamba Samwele waita Solo peulu pa njibo kanena’mba: “Wilongolole, mwanda nsa kukuleka wende.” Ponkapo Solo welongolola, ebiya aye ne Samwele batambila panja.
27 Pobadi batūka benda dya kufula kwa kibundi, Samwele wanena Solo amba: “Lombola mwingidi+ etubadikidile kumeso,” penepa mwingidi webabadikidila kumeso. “Ino abe imana pano nkusapwile kinenwa kya Leza.”
Kunshi kwa Dyani
^ Kishima pa kishima i, “Bampunda bakaji.”
^ Shekele imo i mangalame 11,4. Tala Mbwejo B14.
^ Kishima pa kishima i, “wapūtwile kutwi kwa.”
^ Nansha’mba “kulama bantu bami mu mikalo.”
^ Kishima pa kishima i, “byonso bidi mu mutyima obe.”
