Bible byakanenenepo bivule pa uno mwanda, kapelejepo kwipenta, kuvwala byuma nansha bintu bikwabo bya kwineñenya nabyo. Inoko pa kyaba kya kisambila pa mumwekelo wa ngitu, aye Bible ukankamika “kwineñenya kekubolapo kwa mushipiditu utalala ne mutūkanye.”—1 Petelo 3:3, 4.

•   Bana-bakaji ba mu Bible bādi beneñenya. Lebeka, wāsongelwe na Izake mwanā Abalahama, wādi uvwala luzenze lwa ku myulu lwa olo, nzenze ya ku maboko ya olo, ne byuma bikwabo bya bei byobāmupele bu kyabuntu kudi wādi wa kwikala wandi muko. (Ngalwilo 24:22, 30, 53) Eseta nandi wāitabije “bya kwineñenya” bya kumuteakanya mwa kwikadila mukaja mulopwe wa Umbikalo wa Peleshia. (Eseta 2:7, 9, 12) Mobimwekela mu bino bya kwineñenya mwādi “bya kwishinga,” nansha “bya kwipenta bya muswelo mukwabo.”​—New International Version; Easy-to-Read Version.

•   Byuma i byelekejibwe mu muswelo muyampe mu Bible. Kimfwa, muntu uleta madingi mayampe i mudingakanibwe na “nzenze ya ku matwi ya olo . . . [ne] matwi evwana.” (Nkindi 25:12) Mu muswelo umo onka, Leza nandi wādingakenye muswelo waādi wikele na muzo wa Isalela na wa mulume uneñenya mutundaile wandi na nzenze ya ku maboko, kamuyololo ka mwishingo, ne byuma bya ku matwi. Kuno kuneñenya kwālengeje muzo wikale ‘muneñene bininge.”—Ezekyele 16:11-13.

 Mulangwe wa bubela: Kwishinga kwēshingile Yezebele mukaji mubi wa mulopwe ‘bya kwishinga mu meso, nansha “tupenta twa pa bikopelo,” kulombola’mba kwipenta i kubi.—2 Balopwe 9:30, kunshi kwa dyani.

 Bubine: Yezebele, mwine wadi ulonga bya maleñanya ne kutapana, wātyibilwe mambo pa bilongwa byandi bibi, ke pa mumwekelo wandipo.—2 Balopwe 9:7, 22, 36, 37.