Aa, Bible ense mutuntulu i mukwatañane. Nansha bisonekwa bimo byobibwanya kumweka bu bipatanyanga, ino bibwanya kwivwanwa senene na kwingidija musoñanya umo nansha mivulule pa ilonda’ko’i:

1.   Kubandaula myanda īsambilwe’po. Mulembi ense ubwanya kumonwa bu wipatananga shi kebabandawilepo myanda yonso yaesambile’po.

2.   Kuta mutyima ku milangwe ya mulembi. Batumoni bemwenine na meso babwanya kulombola bubinebine bwa kinkumenkume, ino pampikwa kwingidija bishima bimo nansha kuleta twanda tonso mu muswelo umo.

3.   Kuta mutyima ku myanda ya pa kala ne bibidiji.

4.   Kusansanya myanda inenenwe mu muswelo wa kyelekejo na yoya inenenwe kishima pa kishima.

5.   Kwitabija’mba babwanya kutelela muntu kilongwa kampanda nansha shi kalongele’kyopo aye mwine. a

6.   Kwingidija bwalamuni bwa Bible bwa bine.

7.   Kuleka kukwatañanya binena Bible na milangwe nansha mfundijo ya bubela ya bipwilo.

 Bimfwa bilonda’ko bilombola muswelo ubwanya kwitukwasha misoñanya twivwanije myanda imo imweka bu ipatanya mu Bible.

Musoñanya 1: Myanda īsambilwe’po

  Shi Leza wākōkolokelwe mu difuku dya busamba-bubidi, penepo wendelelanga kwingila namani? Myanda īsambilwe’po mu nsekununi ya bupangi idi mu Ngalwilo ilombola’mba binenwa bya amba, “wāanza kukōkolokwa mu difuku dya busamba-bubidi ku mwingilo wandi onso waādi wingila,” bīsambila pa mwingilo wa bupangi bwa pano pa ntanda. (Ngalwilo 2:2-4) Yēsu kādipo upatanya bino binenwa, ino wānenene amba Leza “wingilanga’nka kwingila kufika ne pano pene,” mwanda wādi wisambila pa mingilo mikwabo ya Leza. (Yoano 5:17) Mu mingilo ya Leza mubadilwa kulembeja Bible ku bukomo bwa mushipiditu, bwendeji bwandi, ne kuta bantu mutyima.​—Ñimbo ya Mitōto 20:6; 105:5; 2 Petelo 1:21.

Musoñanya 2 ne 3: Milangwe ne myanda ya pa kala

  Le Yesu wābelwile mpofu kwepi? Mukanda wa Luka unena’mba, Yesu wābelwile mpofu paādi “kafwena ku Yediko,” ino nsekununi iifwene nayo idi mu Mateo īsambila pa bampofu babidi ne kunena’mba, Yesu wēbabelwile “pa kutamba mu Yediko.” (Luka 18:35-43; Mateo 20:29-34) Bine, ino nsekununi ibidi, ilembelwe na milangwe mishile iobanga. Pa mwanda utala buvule bwa bampofu, Mateo utelelela’tu amba i babidi, ino Luka aye wisambila pa mpofu wēsambile na Yesu. Pa mwanda utala kifuko, befundi ba bintu bya kishiyekulu basokwele amba mu mafuku a Yesu, Yediko wādi na bibundi bibidi, kibundi kya kala kya Bayuda kyadi ku kintu kya kilometele imo ne kipindi na kibundi kya Loma. Padi Yesu wādi pa bukata bwa bino bibundi bibidi paālongele kino kingelengele.

Musoñanya 4: Muneneno wa kyelekejo ne wa kishima pa kishima

  Lelo ntanda ikonakanibwa? Bible unena mu Musapudi 1:4 amba, “ntanda ikele’ko nyeke,” binenwa bibwanya padi kumonwa na bamo bu bipatanyanga na binenwa bidi’mo bya amba, “byamūlu bīne bikasunguluka ku kyanga kikatampe, ne ntanda mīne.” (2 Petelo 3:10, Mukanda Ukola) Inoko mu Bible, kishima “ntanda” i kingidijibwe kishima pa kishima, kifunkila pa umbuo wa ntanda, ne mu muswelo wa kyelekejo, kifunkila pa bantu badi’po. (Ngalwilo 1:1; 11:1) Konakanibwa kwa “ntanda” kunenenwe mu 2 Petelo 3:10, ke kusōkwapo kwa umbuo wetu wa ntanda, ino i “konakanibwa kwa bantu bampikwa bwine Leza.”​—2 Petelo 3:7.

Musoñanya 5: Kutelelwa kintu

  Mu Kapanama, le i ani wakalombēle mudyavita kudi Yesu? Mateo 8:5, 6 unena’mba mudyavita (mukulu wa basola) wāile aye mwine kudi Yesu, ino Luka 7:3 unena’mba mudyavita wātumine bakulumpe ba Bayuda bakamulombele. Ino myanda ya mu Bible imweka bu ipatanya, ibwanya kwivwanikwa’mba mukulu wa basola ye wādi na byakulomba yesu, ino wātuma bakulumpe bu mikendi yandi.

Musoñanya 6: Bwalamuni bwa bine

  Le batwe bonso tuloñanga bubi? Bible witufundija’mba batwe bonso twi bapyane bubi kud Adama, muntu mubajinji. (Bene Loma 5:12) Malamuni amo amweka bu apatanyanga uno mulangwe na kunena’mba muntu muyampe “kaloñangapo bubi.” (1 Yoano 3:6, Dibuku Dijila) Inoko mu ludimi lubajinjibajinji, kyubwa kya Kingidiki kyalamwinwe bu “bubi” mu 1 Yoano 3:6 i kingidijibwe bu kintu kilongeka, mu lwine ludimi’lwa, kifunkila pa kilongwa kya kibidiji. Bubi botupyene, bwine boketubwanyapo kwepuka, i bwishile na bubi bwa ku kusaka, kilongwa kya nyeke kya kuleka kukōkela bijila bya Leza. O mwanda malamuni amo i matōkeje uno mulangwe umweka bu wipatanya na kwingidija misemwa ya bine kimfwa’mba, “kalongaloñangapo bubi.”​—Bwalamuni bwa Ntanda Mipya.

Musoñanya 7: Bible, ke mfundijopo ya bubela

  Le Yesu udi mu ludingo lumo na Leza’ni nansha Leza i mumutabuke? Yesu wānenene difuku dimo amba: “Amiwa ne Tata twi umo,” binenwa bimweka bu bipatanyanga na binenwa bya amba, “Tata untabukile bukata.” (Yoano 10:30; 14:28) Pa kwivwanija ano mavese senene, tufwaninwe kubandaula byobya bine binena Bible padi Yehova ne Yesu pa kyaba kya kukwatañanya mavese na lufundijo lwa Busatu Busantu, lwine keludipo mu Bible. Bible ulombola’mba Yehova kadipo’tu bu Shandya Yesu kete, ino kadi i Leza wa Yesu, Mwine wādi utōtwa na Yesu. (Mateo 4:10; Mako 15:34; Yoano 17:3; 20:17; 2 Bene Kodinda 1:3) Yesu kadipo mu ludingo lumo na Leza.

 Myanda idi kūlu ne kunshi kwa binenwa bya Yesu bya amba “Amiwa ne Tata twi umo,” ilombola’mba wādi wisambila pa kitungo kimo kyonka kyobādi nakyo na Shandi, Yehova Leza. Yesu wānenene mwenda mafuku amba: “Tata udi nami umbumo, ami nami umbumo na Tata.” (Yoano 10:38) Kadi Yesu wādi mu bumo ne na balondi bandi, mwanda wālombēle pa mwanda wabo amba: “Nebape ntumbo yowampele, amba bekale umo monka motwikadile umo. Ami umbumo nabo, abe nobe umbumo nami.”​—Yoano 17:22, 23.