Mu Bible mudi bintu bivule bibwanya kwitukwasha tumwivwanije. Nansha shi wi wa kwepi, musapu wa Leza udi mu Bible ‘ke mukomopo bininge kodi, nansha okomenwa kufikila’po.’—Kupituluka mu Bijila 30:11.

Bintu bikakukwasha wivwanije Bible

1.   Ikala na mumweno muyampe. Itabija’mba Bible i Kinenwa kya Leza. Ikala mwityepeje, mwanda Leza ulwanga na boba betatula. (1 Bene Tesalonika 2:13; Yakoba 4:6) Inoko, kokitabija bintu kitabijeitabije—Leza usakanga wingidije ‘bukomo bobe bwa kulanguluka.’—Bene Loma 12:1, 2.

2.   Lomba tunangu. Bible unena mu Nkindi 3:5 amba, “kokesumbidila ñeni ya abe mwine.” Ino ‘lomba Leza nyeke’ tunangu twa kwivwanija Bible.—Yakoba 1:5.

3.   Wifunde kitatyi kyonso. Ukamwena bininge mu kwifunda Bible shi wifunda’ye kitatyi ne kitatyi pa kyaba kya kwifunda’ye na dimodimo.—Yoshua 1:8.

4.   Wifunde mwanda ne mwanda. Kwifunda mwanda ne mwanda, kubandaula byobya binena Bible pa mwanda kampanda i muswelo muyampe wa kuyuka byobya bifundija Bisonekwa. Shilula na “lufundijo lwa bya ngalwilo,” kupwa endelela “kufundijibwa bya batame.” (Bahebelu 6:1, 2, Myanda Miyampe ku Bonso) Ukamona’mba ubwanya kudingakanya kisonekwa na kisonekwa kikwabo, ne kujingulula’mba mavese amo a mu Bible ashintululanga mavese makwabo, enka ne mavese ‘makomo kwivwana’ mene.—2 Petelo 3:16.

5.   Nena bakwenu bakukwashe. Bible witukankamika twitabije bukwashi bwitukwasha bakwetu bevwanije kala Bible. (Bilongwa 8:30, 31) Batumoni ba Yehova befundanga Bible na bantu ku bitupu. Pamo bwa bene Kidishitu babajinji, bengidijanga Bisonekwa pa kukwasha bakwabo bayuke byobya bine bifundija Bible.—Bilongwa 17:2, 3.

Bintu byokusakilwapo

1.   Ñeni mivule ne masomo malamala. Batumibwa 12 ba Yesu bādi bevwanije Bisonekwa ne kufundija’byo bakwabo, nansha bantu bamo byobādi bamona batumibwa bu “bampikwa kufunda kadi ba bituputupu.”—Bilongwa 4:13.

2.   Lupeto. Ubwanya kuyuka byobya bifundija Bible ku bitupu. Yesu wāsapwidile bandi bana ba bwanga’mba: “Mubatambula ku bitupu, nenu pānai ku bitupu.”—Mateo 10:8.