Mu Bible i mutelwe ntapo musunsa umo mu kisonekwa kya Bene Levi 19:28 kine kinena’mba: “Kemufwaninwepo kwitapa ntapo.” Leza wāpele muzo wa Isalela uno musoñanya, mwanda wa kwibashiañanya na bantu ba mu abo mafuku bādi balemba majina nansha kufwatula byelekejo bya baleza babo pa lukoba. (Kupituluka mu Bijila 14:2) Nansha Bijila byobāpele Isalela byokebitalepo bene Kidishitu, i biyampe kulangulukila bininge pa musoñanya udi mu kino kijila.

Le mwine Kidishitu ufwaninwe kwitapa ntapo?

 Bisonekwa bilonda’ko bibwanya kukukwasha ulangulukile pa uno mwanda:

•   “Bana-bakaji nabo bafwaninwe kwineñenya . . . bya bulēmantu.” (1 Temote 2:9, kunshi kwa dyani) Uno musoñanya utala bana-bakaji ne bana-balume. Tufwaninwe kulēmeka mwiivwanino wa bakwetu ne kuleka kukokela milangwe potudi bya bituputupu.

•   Bantu bamo betapanga ntapo mwanda wa kulombola kobatambile nansha’mba badi na bwanapabo, ino bakwabo nabo mwanda wa kulombola’mba badi na lupusa lwa kulonga byonso byobasaka na ngitu yabo. Inoko aye Bible ukankamika bene Kidishitu amba: “Lambulai imbidi yenu ke kitapwa kyūmi, kijila, kitabijibwa na Leza, ke mingilo ikola na bukomo bwenu bwa kulanguluka kadi.” (Bene Loma 12:1) Ingidija “bukomo bwa kulanguluka,” ubandaule kine kyosakila kwitapa ntapo. Shi i pa mwanda’tu usakanga kulonda muswelo ulonga bantu, nansha kulombola’mba wi wa ku bantu kampanda, vuluka’mba milangwe yobe ibwanya kushinta mwenda mafuku inoko washala na ntapo. Kulangulukila pa kine kya kwitapila ntapo kubwanya kukukwasha ukwate butyibi bwa tunangu.—Nkindi 4:7.

•   “Mpango ya muntu wa kininga bine ikendeka, ino boba bonso ba kampeja-bukidi bine bakafula ku bulanda.” (Nkindi 21:5) Divule dine butyibi bwa kwitapa ntapo bukwatwanga na kampeja-bukidi, inoko bubwanya kwikala mwenda mafuku na lupusa pa kipwano kipwene bantu na bakwabo ne pa kaji. Ntapo ibwanya kwelelwa lupeto luvule, kadi isansanga pa kwiitalula. Bukimbi ne bantu bengila mingilo ya kutalula ntapo, balombola’mba bantu bavule betapijanga ntapo bealakanyanga mwenda mafuku.