En-en, mwanda bukwashi buyampe butambanga kudi “Leza, Mwine useñanga ne kukankamika ne kutūja ne kusangaja boba banyoñame pa mutyima.”​—2 Bene Kodinda 7:6, Nouvelle Bible Segond, Segond 21.

•   Bukomo. Leza ‘ukutūjanga ne kukusangaja,’ ke na kutalulapo makambakano obe onso, ino i na kulondolola milombelo yolomba bukoma bwa kūminina. (Bene Fidipai 4:13) Ubwanya kukulupula’mba usakanga kukwivwana, mwanda Bible unena’mba: “Yehova udi pabwipi na boba ba mityima mityumuke; upandijanga boba ba mushipiditu musonsakane.” (Ñimbo ya Mitōto 34:18) Na bubine, Leza ubwanya kukwivwana kitatyi kyolomba bukwashi nansha shi ubakomenwa kumulombola mwine mowiivwanina.​—Bene Loma 8:26, 27.

•   Bimfwa biyampe. Mulembi umo wa Bible wālombele amba: “Nkwitanga tamba mu mushike.” Uno mulembi wa mitōto wālekele kunyoñama pa mutyima paāvulukile amba Leza usakanga kwitulekela bubi bwetu. Wānenene amba: “Shi wadi amba utalanga bilubo, a Yehova, le penepo i ani wadi ukokeja kwimana? Mwanda kodi ko kudi lulekelo lwa bine, amba bakwivwane nzuba.”​—Ñimbo ya Mitōto 130:1, 3, 4.

•   Lukulupilo. Kutentekela pa kusenga, Leza i mulaye kutalula’ko makambakano onso alengejanga bantu banyoñame pa mityima. Kitatyi kyakafikidija uno mulao, “bintu bya kala [kubadila’mo ne kunyoñama pa mutyima] kebikavulukwapo, nansha kwiya’byo ku mutyima kwine mpika.”​—Isaya 65:17.

 Vuluka: Nansha Batumoni ba Yehova byobayukile amba Leza ubwanya kwibakwasha, ino bendanga ne kukondapibwa, kimfwa ku lupitalo kobondapa misongo ya kunyoñama pa mutyima. (Mako 2:17) Inoko, ketulombolangapo muntu lawa ya kutoma; muntu ne muntu ufwaninwe kukwata butyibi aye mwine mu uno mwanda.