Nabutwidilwe mu Ciudad Obregón kungala kwa Meksike, mwana wa butano mu bana kitema. Twadi tushikete kufula kwa kibundi, kwine kwadi kutala tata kabudimi. Kyadi kifuko kiyampe kwikala’ko, kadi kisaka kyetu kyadi mu bumo ne na nsangaji. Ino yō, ponabwenye myaka’tu itano, kivula kikatampe kyaonakanya budimi bwetu, twavilukila ku kibundi kikwabo.

 Tata waikala na kamusokwe. Ino kyaba kimo, washilula kutoma mālwa. Kino kyaleta makambakano mu busongi bwandi ne ku batwe bana kwine. Twashilula kutoma mfwanka yotwadi twiba tata. Nakolelwe mālwa musunsa wami mubajinji ami papo na myaka’tu isamba. Kitatyi kityetye pa kupita’po, bambutwile bami basansana, bibidiji byami bibi byabipila’ko.

 Mama wetuselele twaenda nandi paakashikete na mwana-mulume mukwabo. Ino kadipo umupa lupeto, kadi twadi tudya’nka katyetye kadi kasokola mama. Ebiya ami ne banabetu twalonga bukomo bwa kumukwasha’ko, ino twadi tusokola enka byakudya pa difuku. Nadi mbolosa bilato ne kupoteja mikate, majulunale, mabazoka, ne bintu bikwabokwabo. Kadi nadi njokoloka mu kibundi ñenda nkimba bya kudya mu byala bya bampeta.

 Ami pa kubwanya myaka dikumi, muntu umo waunena kwingila nandi mwingilo wa kutalula butyafu mu byala. Nami naitabija, naleka masomo, kupwa nataluka ne ku njibo kwine. Wadi umfuta madolala munshi mwa dikumi pa difuku, ne kumpa bya kudya byotwadi tukongakanya mu byala. Nadi nshikete mu kobo konaubakile na bingidilwa byonadi mboya. Bantu botwadi tushikete nabo badi na muneneno wa kiboja kadi babisekese. Bavule badi batoma bitomibwa bikolwañana ne mālwa. Bine, kino kyadi kitatyi kibi mpata mu būmi bwami, kadi nadi ndila bufuku bonso koku nzakala moyo. Byonadi mulanda kadi wampikwa kufunda bininge, nadi neivwana bumvu. Nashikete mu buno busala kintu kya myaka isatu enka ne byonavilukīle mu kibundi kikwabo kya mu Meksike. Mu kino kibundi nadi ñingila ku madimi, ngapa maluba ne kwangula butonge, myonge ne bilungu.

 Myaka iná pa kupita’po, najokela ku Ciudad Obregón. Mama mwanabo na tata wadi ñanga, waumpa kyumba mu yandi njibo. Nashilula kulotakanya bufuku, ebiya natyumukwa mutyima ne kwikala na milangwe ya butapani. Difuku dimo bufuku, nalomba Leza amba: “A Mfumwami, shi udi’ko, nkimba nkuyuke, kadi nsa kukwingidila nyeke. Shi kudi kipwilo kya bine, nkimba kwikiyuka.”

 Nadi nsangela nyeke kwifunda myanda ya Leza. Nansha ponadi mwanuke, naendele mu bipwilo bivule bya mitōtelo mishileshile, ino byonso byantyumuna mutyima. Kekwadipo kipwilo nansha kimo kyadi kinena myanda mivule ya mu Bible nansha kunkwasha ndyuke Leza. Bimo byadi bitele mutyima’nka ku lupeto, ino mu bikwabo nabo mwadi babisekese.

 Ponadi na myaka 19, bofu umo waunombola’mba Batumoni ba Yehova bamulombwele byobya binena Bible mu mwanda utala kwingidija bankishi mu butōtyi. Wauntangila kisonekwa kya Divilu 20:4, 5. Kinena’mba kokelongela nkishi musōnge. Tutanga mu vese 5 amba: “Kokevukwila kobadi nansha kwibengidila kwine, mwanda amiwa Yehova Leza obe ne Leza usakanga kulamatwa bunka.” Kupwa bofu waungipangula’mba, “Shi kwadi amba Leza wingidijanga bankishi mwanda wa kulonga bingengele nansha shi usaka twibengidije mu butōtyi, mwanda waka witupeleja’bo?” Kino kipangujo kyaunanguluja. Kupwa, twesambila nandi misunsa mivule pa myanda ya mu Bible. Nadi nsangela ino mīsambo bininge, nkemone bu kitatyi kyendanga lubilo bininge.

 Mwenda mafuku, twaenda nandi ku kupwila kwa Batumoni ba Yehova. Natengwa bininge na byonamwene’ko ne byonaivwene. Enka ne bankasampe badi balondolola, besamba pampikwa moyo ku lukala! Nkeneneneja’mba, ‘bine kuno bantu bafundijibwanga!’ Nansha byonadi na nywene milampe kadi musalakane, Batumoni bantundaile na nsangaji. Kisaka kimo kyaungityile’nka ne kukadya kwabo pa kupwa kupwila!

 Pa kwifunda Bible na Batumoni, nayuka’mba Yehova Leza i Tata wa buswe witutele batwe bonso mutyima pampikwa kubanga misokwe yetu, būmi bwetu, lukoba ne masomo otufundile. Aye kadipo na mboloji. (Bil. 10:34, 35) Mfulo mfulō, bisakibwa byami bya ku mushipiditu byavuijibwa. Byonso byonadi neivwana’mba kudi byombudilwe byapwa.

 Būmi bwami bwashilula kulumbuluka bya binebine! Naleka’byo kutoma mfwanka, mālwa ne muneneno wa kiboja. Kīji kyonadi nakyo tamba pa bwanuke kyashilula kupwa, ne kulotakanya kwami kwine. Naleka kwikala monka na mutyima wa kwityepelwa onadi nao pa bwanuke pa mwanda kuvutakanibwa ñeni ne kubulwa kufunda biyampe.

 Ngidi na mukaji muyampe usenswe Yehova kadi unkwasha bininge dyalelo. Pano ne Kamoni wa Yehova wingila bu mutadi wa kipindi, mpempula bipwilo mwanda wa kukankamika batutu ne bakaka ne kwibafundija. Pa mwanda wa bukomo bukatampe budi na Bible ne bufundiji buyampe bwitupa Leza, pano nkikiivwanangapo bumvu.