Hañwi ka silimo, Lipaki za Jehova ni batu babañata-ñata bebamemanga mwa lifasi kaufela bakopananga hamoho kuli bahupule lifu la Jesu, sina feela mwanaa laelezi. (Luka 22:19) Mukiti wo ulutusanga kuitebuha butokwa bwa lika zanaa luezelize Jesu hanaafile bupilo bwahae kabakala luna. Hape ubonisa mosikona kulutuseza sitabelo sahae ka nako ya cwale mane ni kwapili.—Joani 3:16.

 Ibe kuli nemufumanehile kwa Kupuzo silimo se kamba kutokwa, mukona kutusiwa cwañi ki lifu la Jesu? Jesu naatalusize kuli luswanela kueza lika za butokwa zepeli ze:

1.  1. Muitute ka za Mulimu ni Jesu. Mwa tapelo yanaalapezi ku Ndatahe ya kwa lihalimu, Jesu naabulezi kuli: “Kuli bafumane bupilo bobusa feli, batokwa kuzwelapili kukuziba, wena Mulimu anosi wa niti, ni yene ulumile, yena Jesu Kreste.”—Joani 17:3.

2.  2. Musebelise zemuituta. Jesu naakoñomekile kuli lutokwa kusebelisa lituto zahae mwa bupilo bwaluna. Ka mutala, naafelize Ngambolo yahae ya fa Lilundu ka kubabaza mutu kaufela ‘yautwa manzwi [ahae] ni kuamamela.’ (Luka 6:46-48) Kuzwa fo, nako yeñwi naabulezi kuli: “Hamuziba lika ze, mukaba ni tabo hamu lieza.”—Joani 13:17.

 Kana mwatabela kuituta zeñata ka za Mulimu ni Jesu? Kana mutokwa kelezo yekona kumitusa kuli musebelise zemuituta? Ki ze linzila zekona kumitusa.

 Tuto yaluna ya Bibele yesalifelwi itusize batu babañata kunyakisisa litaba za mwa Bibele ni kuitusisa zona mwa bupilo bwabona.

•   Mukene fa likepe lelili, Muitute Bibele ni Muluti, kuli muitute zeñata ka za tukiso ye.

•   Mubuhe vidio yeli, Muikole Tuto Yamina ya Bibele kuli mubone mo Lipaki za Jehova baezezanga tuto ya Bibele.

 Lipaki za Jehova bakopananga hamoho habeli mwa sunda kwa libaka zabona za kulapelela zebizwa Mandu a Mubuso. Kwa mikopano yeo, lunyakisisanga litaba za mwa Bibele ni kubona molukona kuitusiseza zona mwa bupilo bwaluna.

 Batu kaufela balukuluhile kufumaneha kwa mikopano ye, nihaiba babasi Lipaki za Jehova. Mwakona kuiketela kufumaneha kwa mikopano ye ka kuya luli kwa Ndu ya Mubuso kamba ka kuitusisa progilamu yekonahalisa kuli batu babonane.

•   Mubuhe vidio yeli, Kiñi ze Ezahalanga Kwa Ndu ya Mubuso? kuli muzibe zemukayo bona hamukaya kwa mikopano yeo.

•   Kuli mufumane ndu ya mubuso yeli bukaufi ni komupila, mukene fa likepe lelili, Mikopano ya Puteho ya Lipaki za Jehova.

 Litaba zeñata za fa webusaiti ni mavidio zakona kumitusa kuituta zeñata ka za lituto za Jesu ni butokwa bwa lifu lahae.

 Ka mutala, kuli muzibe libaka lifu la mutu alimuñwi halikona kutusa batu babañata-ñata, mubale taba yeli, “Jesu Ulupilisa ka Mukwa Ufi?” ni yeli, “Ki Kabakalañi Jesu Hanaanyandile ni Kushwa?” kamba mubuhe vidio yeli, Ki Kabakalañi Jesu Hanaashwile?