MU SUTELELE KU MULIMU

“Bona! Linto Kaufela ni li Eza ze Nca”

Kana mwa tabela ku pila ka nako ye telele inze mu iketile kwa mubili, mina ni lubasi lwa mina? Kana mwa tabela ku pila mwa lifasi mo ku si na ku utwa butuku, ku nyanda kamba ku shwa? Lifasi le li cwalo haki nto ya ku lola feela kono li ka ba teñi luli. Lifasi le li nca mo ku ka yaha ku luka li ka ba teñi hona cwale-cwale fa, kakuli Jehova Mulimu ki yena ya lelile kuli li be teñi. Mu lemuhe mo i taluselizwe talelezo ya mulelo wa Mulimu wo, kwa liñolo la Sinulo 21:3-5.—Mu bale.

“[Mulimu] u ka takula miyoko kaufela kwa meeto a bona.” (Sinulo 21:4) Ki miyoko ya mufuta mañi ya ka takula Mulimu kwa meeto a batu? Haki mufuta wa miyoko ya tabo kamba ye silelezanga meeto a luna. Sepiso ya Mulimu i ama kwa mufuta wa miyoko ye tiswa ki manyando ni masitapilu. Mulimu haa na ku omisa feela miyoko ye cwalo; kono u ka i zwisa ka ku tala kwa meeto a bona, ka ku felisa lika kaufela ze tisanga miyoko ye cwalo, ona manyando ni masitapilu.

“Lifu ha li sa na ku ba teñi.” (Sinulo 21:4) Lifu ki sona sila se si lu tahisezanga hahulu ku lotisa miyoko. Jehova u ka lukulula batu ba ba ipeya ku utwa kwa butanga bwa lifu. Kamukwaufi? Ka ku felisa nto luli ye tahisanga lifu, sona sibi se lu hozize ku Adama. (Maroma 5:12) Jehova u ka tahisa kuli batu ba be ba ba petehile ka ku itusisa sitabelo sa Jesu sa tiululo. * Mi cwale lifu, sona sila sa mafelelezo, kihona ‘si ka yundiswa.’ (1 Makorinte 15:26) Batu ba ba sepahala ba ka kona ku pila ku ya ku ile inze ba na ni mibili ye petehile sina mwa naa lelezi Mulimu kwa makalelo.

“Nihaiba . . .ku utwa butuku,” ha ku sa na ku ba teñi. (Sinulo 21:4) Ki mufuta mañi wa butuku o si ke wa ba teñi? Ki mufuta kaufela wa butuku bwa mwa munahano, mwa maikuto, ni mwa mubili o tahisizwe ki sibi ni ku sa petahala ili o tahiselize batu ku sa ikola bupilo ka lilimo ze ñata-ñata.

Hona cwale-cwale fa, batu ba ka pilanga ku si na ku lila, ku shwa, kamba ku utwa butuku. Kono mu kana mwa ipuza kuli ‘bupilo bo bu cwalo bu ka bela kai?’ ‘Esi mwendi sepiso ya Mulimu yeo i talusa za bupilo bwa kwa lihalimu?’ Batili. Mu nyakisise libaka ha ku si cwalo. Sapili, sepiso yeo i kala ka manzwi a li: “Tende ya Mulimu i inzi ni batu,” mi batu ba pila fa lifasi. (Sinulo 21:3) Sa bubeli, sepiso yeo i talusa za lifasi mo “lifu ha li sa na ku ba teñi,” ili lifasi mo ne ku banga lifu sapili kono cwale ha li sa li yo. Kwa lihalimu ha ku si ka ba kale ni lifu kono fa lifasi se li bile teñi ka nako ye telele hahulu. Kacwalo, kwa iponahalela hande kuli sepiso ya Mulimu ya bupilo bo bunde i ka talelelezwa ona fa lifasi fa.

Jehova u bata kuli lu be ni tumelo mwa sepiso ya hae ya kuli u ka tahisa lifasi le li nca mo ku ka yaha ku luka. Hamulaho feela wa ku talusa limbuyoti ze ka ba teñi, u bonisa kuli sepiso ya hae ki ya niti ka ku bulela kuli: “Bona! Linto kaufela ni li eza ze nca.” Kihona a ekeza ku bulela kuli: “Manzwi a a sepahala mi ki a niti.” (Sinulo 21:5) Mu ka eza hande ku ituta ze ñata ka za mo mina ni batu be mu lata mu kona ku ezeza kuli mu be mwahalaa balapeli ba Mulimu ba ba tabile ba ba ka bona lisepiso za hae ha li talelezwa ka ku tala.

Litaba za mwa Bibele ze akalelizwe ku baliwa mwa December

1 Pitrosi 1-5; 2 Pitrosi 1-3; 1 Joani 1-5; 2 Joani 1-13; 3 Joani 1-14–Sinulo 1-22

[Litaluso za kwatasi]

[Manzwi a fa likepe 11]

Mulimu u ka takula miyoko kaufela ye tahisizwe ki manyando ni masitapilu