Pitrosi ni Ananiasi ne ba Bulezi Buhata lu Itutañi kwa Taba yeo?
MU LUTE BANA BA MINA
Pitrosi ni Ananiasi ne ba Bulezi Buhata lu Itutañi kwa Taba yeo?
Sina ka mo mu zibela, buhata ki ku bulela taba ye mu ziba kuli haki ya niti. Kana se mu kile mwa bulela buhata?— * Nihaiba batu ba bañwi ba bahulu ba ba lata Mulimu se ba kile ba bulela buhata. Mwendi mwa ziba mutu yo muñwi mwa Bibele ya naa kile a bulela buhata. Libizo la hae ki Pitrosi, yo muñwi wa baapositola ba Jesu ba 12. Ha lu baleñi likande le li tatama kuli lu zibe libaka ha naa bulezi buhata.
Hamulaho wa ku tamiwa, Jesu u iswa kwa ndu ya muprisita ya pahami. Ki malungasiku, mi Pitrosi u kena mwa lapa la muprisita ku si na mutu ya lemuha kuli ki yena. Ha saa li kwatuko ni liseli la mulilo, Pitrosi u zibiwa ki mutanga yo muñwi wa musizana ya naa mu lumelelize ku kena mwa lapa. U mu bulelela kuli: “Ni wena ne u li ni Jesu.” Kono ka ku saba, Pitrosi wa latula.
Bibele i bulela kuli hasamulaho, “musizana yo muñwi a mu lemuha.” Musizana a bulela kuli: “Muuna yo naa li ni Jesu.” Pitrosi wa latula hape. Hamulaho wa nakonyana, batu ba bañwi ba taha ku Pitrosi ni ku bulela kuli: “Kaniti luli ni wena u yo muñwi wa bona.”
Pitrosi u ikalezwi. Kamukwaocwalo u latula lwa bulaalu kuli: “Mutu yo na ha ni mu zibi!” Mukombwe wa lila. Jesu u talima Pitrosi mi Pitrosi u hupula kuli lihoranyana kwamulaho, Jesu naa mu bulelezi kuli: “Mukombwe u si ka lila kale, u ka be u ni latuzi halaalu.” Pitrosi u ikutwa bumaswe mi u kalisa ku lila. U swabile hahulu!
Kana nto ye cwalo ya kona ku ezahala ku wena?— U nahane kuli u kwa sikolo, mi u utwa bana ba sikolo ba bañwi ha ba ambola ka za Lipaki za Jehova. Yo muñwi wa bona u bulela kuli: “Ha ba opelangi pina ya naha.” Yo muñwi u li: “Ha ba keni musebezi wa busole.” Yo muñwi u ekeza ku bulela kuli: “Haki Bakreste, kakuli ha ba ezangi mukiti wa ngilisimusi.” Cwale yo muñwi u fetuhela ku wena ni ku ku buza kuli: “kana wena ha u yo muñwi wa Lipaki za Jehova?” Ne u ka alaba cwañi?—
U swanela ku itukiseza ku fa kalabo ye nde pili nto ye cwalo i si ka ezahala kale. Pitrosi naa si ka itukiseza, ha naa li mwa butata naa bulezi buhata! Nihakulicwalo, naa inyazize hahulu bakeñisa ku bulela buhata, mi Mulimu naa mu swalezi.
Mulutiwa yo muñwi wa Jesu wa mwa linako za baapositola ya bizwa Ananiasi ni yena naa bulezi buhata. Kono Mulimu naa si ka ba swalela yena ni musalaa hae Safira. Ne ba lumelelani ni muunaa hae ku bulela buhata. Ha lu boneñi libaka Mulimu ha naa si ka swalela Ananiasi ni Safira.
Mazazi a lishumi ku zwa fa naa siyezi Jesu baapositola ba hae ni ku kutela kwa lihalimu, batu ba 3,000 ba kolobezwa mwa Jerusalema. Batu ba bañata ba ba zwa kwa linaha za kwahule ba tile kwa Mukiti wa Pentekota, mi hasamulaho wa ku ba balutiwa ba Jesu, ba bata ku ina nako ye telelenyana kuli ba itute ze ñata ka za tumelo ya bona ye ba sa zo amuhela. Kamukwaocwalo, ba bañwi kwa balateleli ba Jesu ba itusisa masheleñi a bona kuli ba ba babalele.
Ananiasi ni musalaa hae ba lekisa simu ya bona kuli ba fumane masheleñi a ku tusa batu ba ba sa zo kolobezwa. Ananiasi ha tisa masheleñi kwa baapositola, u bulela kuli u tisize masheleñi kaufela e ba fumani hamulaho wa ku lekisa simu. Kono haki cwalo! U ipulukela masheleñi a mañwi! Mulimu u tahisa kuli Pitrosi a zibe taba yeo, kamukwaocwalo, Pitrosi u bulelela Ananiasi kuli: “Haki batu bo u pumile, kono ki Mulimu.” Ananiasi ha utwa manzwi ao, u wela fafasi ni ku shwa! Hamulaho wa lihora ze taalu musalaa hae wa taha. Ka ku sa ziba se si ezahezi ku muunaa hae, ni yena u bulela buhata mi u wela fafasi ni ku shwa.
Ye ki tuto ye nde hahulu: Ku bulela niti ki kwa butokwa! Kaufela luna lu swanela ku ziba kuli ku bulela niti ki kwa butokwa! Niteñi, kaufela luna lwa fosanga sihulu ha lu sa li banana. Kana ha u tabiswi ki taba ya kuli Jehova wa ku lata mi u ka ku swalela ha u eza mafosisa sina mwa naa ezelize ku Pitrosi?— Kono u hupule kuli lu swanela ku bulelanga niti. Mi haiba lu eza mafosisa a ku bulela buhata, lu tokwa ku ikupela ka taata ku Mulimu kuli a lu swalele. Mwendi kona mwa naa ezelize Pitrosi mi Mulimu naa mu swalezi. Haiba lu lika ka taata ku sa bulela buhata ni kamuta, Mulimu u ka lu swalela ni luna!
Mu bale mwa Bibele ya mina
Likezo 2:38-42; 4:32-37; 5:1-11
[Litaluso za kwatasi]
^ para. 3 Haiba mu sweli ku bala ni mwanana, mutila o mu ka fumana hamulaho wa puzo ni puzo, u mi hupulisa kuli mu yeme ni ku susueza mwanana ku alaba.
