Mu Kona Cwañi ku iketela ku ba ni Bupilo Bwa Tabo Kwapili?

MU KONA ku fumana cwañi tabo sakata mwa bupilo? Nzila ye ñwi ki ku itusisa buikoneli bwa mina bwa ku nyakisisa ze kona ku zwa mwa likatulo ze mu eza cwale.

Niti kikuli, mu kana mwa fumana taata ku eza likatulo ze ka mi tusa mwa bupilo bwa mina kaufela. Kabakalañi? Bakeñisa kuli buñata bwa batu mazazi a, ba bata ku fumana lika ze ba lakaza ona fo feela. Ka mutala mu kana mwa lemuha kuli ku itusisa kelezo ya Bibele kwa kona ku mi tusa ku ba ni swalisano ye tiile mwa lubasi. (Maefese 5:22–6:4) Kono kuli mu eze cwalo, mu swanela ku fumana nako ya ku ba ni lubasi lwa mina kamita, ni ku tiyela sineneketo ya ku tandanga nako ye ñata hahulu kwa musebezi kamba kwa ku itabisa. Sina mo mu kona ku ezeza mwa likalulo ze ñata za mwa bupilo, mu swanela ku iketela haiba mu bata ku ba ni tabo ya ka nakonyana feela kamba tabo ya kamita. Mu kona ku eza cwañi likatulo ze butali? Mu nge mihato ye mine ye latelela.

1 Mu Bonelange Cimo ze Kona ku Zwa Mwa Liketo za Mina

Muta mu eza keto, mu bonelange cimo ze kona ku zwa mwateñi. Bibele i fa kelezo ye li: “Mutu ya na ni ngana u bona kozi i sa taha, mi wa isabisa.” (Liproverbia 22:3) Haiba mu nahanela cimo ze kona ku zwa mwa liketo za mina, mu kana mwa ambuka ku eza lika ze kona ku mi tahiseza kozi. Kono haiba mu bonela cimo mo keto ye butali i kona ku mi tuseza kwapili, mu ka ba ni buikolwiso bwa ku eza ka mo mu atulezi.

Mu ipuze kuli: ‘Kiñi ze ka zwa mwa keto ya ka hamulaho wa silimo, kamba hamulaho wa lilimo ze 10 kamba ze 20? Keto ye i ka ama cwañi maikuto a ka ni buikangulo bwa ka bwa kwa mubili? I ka ama cwañi lubasi lwa ka ni batu ba bañwi be ni lata?’ Sa butokwa ni ku fita, mu ipuze kuli: ‘Kana keto ye i ka tabisa Mulimu? Keto ye i ka ama cwañi silikani sa ka ni yena?’ Bakeñisa kuli Bibele i ñozwi ka susumezo ya moya wa Mulimu, ya kona ku mi tusa ku ziba ze tabisa Mulimu ni ku mi tusa ku lemuha malaba ao fokuñwi mu sa koni ku a iseza pilu.—Liproverbia 14:12; 2 Timotea 3:16.

2 Mu Ikezeze Liketo Mina Beñi

Ku fita ku ikezeza likatulo, batu ba bañata ba latelelanga feela ze ba eza batu ba bañwi. Kono ku eza feela lika bakeñisa kuli ba bañwi kona mo ba ezeza ha ku koni ku mi tahiseza tabo. Mu ikezeze liketo mina beñi. Mu nyakisise mutala wa bo Natalie. * Ba talusa kuli: “Ne ni bata ku ba mwa linyalo le linde. Kono ne ni bona kuli ne ni si ke naa ba mwa linyalo le li cwalo bakeñisa mupilelo wa ka. Kwa koleji balikani ba ka kaufela ne li batu ba ne ba na ni zibo. Kono ne ba ezanga liketo ze maswe mwa bupilo bwa bona. Ne ba cinca-cincanga linyazi kamita. Sina bona, ni na ne ni na ni linyazi ze ñata. Mupilelo wo, ne u ni tahiselize masitapilu.”

Bo Natalie ba kala ku ituta Bibele ni Lipaki za Jehova. Ba bulela kuli: “Mwahalaa Lipaki za Jehova ne ni iponezi mikulwani ba ba tabile ili ba ba nyezwi ni ku nyalwa hande. Naa kala ku cinca mupilelo wa ka hanyinyani-hanyinyani, nihaike kuli ku eza cwalo ne i si ko ku bunolo.” Ki lika mañi ze ne zwile mwateñi? Bo Natalie ba bulela kuli: “Kamita ne ni lakazanga ku nyaliwa ki mutu ye ne ni tabela luli. Hamulaho wa nako, naa nyaliwa ki  muuna ya naa na ni tumelo ye swana ni ya ka. Ni ikutwa kuli Mulimu u ni file bupilo bwa lubasi bo bunde hahulu, bo ne ni si ka libelela.”

3 Mu Nyakisise mo Likatulo ze mu Eza Cwale li ka mi Amela Kwapili

Kuli mu ambuke ku nahananga lika ze mu kona ku eza ka nakonyana feela, mu tokwa ku nahanelanga cimo ze mu bata ku eza kwapili ni mo mu ka li kondiseza. (Liproverbia 21:5) Mu si ke mwa nahananga feela za ku pila lilimo ze 70 kamba ze 80 ze ba pila batu kacenu. Kono mu ipone inze mu ikola bupilo bo bu sa feli sina mo i taluseza Bibele.

Bibele i talusa kuli Mulimu u lukisize kuli batu ba fumane bupilo bo bu sa feli ka sitabelo sa tiululo sa Kreste Jesu. (Mateu 20:28; Maroma 6:23) Mulimu u sepisa kuli ona cwale-cwale fa, mulelo wa hae ka za batu ni lifasi u ka talelezwa. Batu ba ba lata Mulimu ba ka ba ni kolo ya ku ikola bupilo bo bu sa feli mwa lifasi le li nde le li lukisizwe sinca. (Samu 37:11; Sinulo 21:3-5) Haiba mu nahana ka za bupilo bo bu nde bo mu ka ikola kwapili mwa lifasi le linca, mu ka eza ka taata kuli mu yo ikola bona.

4 Mu Eze ka Taata Kuli mu Taleleze Likonkwani za Mina

Mu kona ku ezañi kuli mu kone ku ikola bupilo bwa kwapili bo bu sepisizwe? Mu kalise ka ku ituta ka za Mulimu. (Joani 17:3) Zibo ye nepahezi ya mwa Bibele i ka mi tusa ku ba ni buikolwiso bwa kuli lisepiso za Mulimu ka za kwapili li ka talelezwa. Tumelo ye cwalo i ka mi tusa ku eza licinceho ze tokwahala kuli Mulimu a mi amuhele.

Mu nyakisise mutala wa bo Michael. Ba bulela kuli: “Ne ni kalile ku nwanga hahulu bucwala ni ku itusisa milyani ye kola ha ne ni li wa lilimo ze 12. Ne ni banga mwa sikwata sa likebenga mi ne ni nahana kuli ne ni ka shwa ni si ka kwanisa kale lilimo ze 30. Hañata-ñata ne ni batile ku ipulaya bakeñisa bunyemi ni ku ikutwa ku zwafa. Ne ni na ni sepo ya kuli bupilo bu na ni mulelo kono ne ni si ka ziba kuli mulelo wo ki ufi.” Bo Michael ha ne ba sa li kwa sekondari, yo muñwi wa mwa sikwata sa bona sa likebenga a kala ku ituta Bibele ni Lipaki za Jehova. Bo Michael ni bona ba kalisa ku ituta Bibele.

Ze ne ba itutile bo Michael ku zwelela mwa Bibele ne li ba tahiselize ku cinca mubonelo wa bona ka za kwapili. Bo Michael ba bulela kuli: “Ne ni itutile kuli kwapili lifasi kaufela li ka lukiswa sinca ku ba paradaisi mi batu ba ka pila mwa kozo ku si na lipilaelo. Na nyolelwa ku pila mwa lifasi leo. Na itomela sikonkwani sa ku ba ni silikani se si nde ni Jehova. Kono ne ni sa konangi ku tabisa Jehova ka nako kaufela. Nihaiba hasamulaho wa ku kalisa ku ituta Bibele, ne ni kolwanga bucwala ka linako ze ñwi. Mane ka nako ye ñwi ne ni lobezi ni musizana.”

Bo Michael ne ba konile cwañi ku tula mukwa wa ku kutelanga ku eza lika ze ne se ba tuhezi ku eza ni ku cinca mupilelo wa bona? Ba bulela kuli: “Ba ne ba ni lutanga Bibele ne ba ni susuelize ku balanga Bibele ka zazi ni zazi ni kuli ni swalisane ni batu ba ne ba bata ku tabisa Mulimu. Ne ni lemuhile kuli balikani ba ka ba mwa sikwata sa likebenga ne ba sa ni kukuezanga ku eza lika ze maswe. Nihaike kuli ne se ba swana sina bana bahabo na, na tuhela ku swalisana ni bona.”

Bo Michael ba itomela likonkwani ze ne ba ka kwanisa mwa nako ye kuswani ili ze ne ba tusize ku kwanisa sikonkwani se si tuna sa ku pila ka ku lumelana ni likuka za Mulimu. Mwa kona ku eza nto ye swana. Mu ñole sikonkwani se mu itomezi ku eza kwapili ni mihato ye mu kona ku nga ka nako ya cwale ye ka mi tusa ku taleleza sikonkwani seo. Mu taluseze batu ba ba kona ku mi tusa ka za likonkwani za mina, mi mu ba kupe kuli ba tatube zwelopili ya mina ha mu nze mu li kwanisa.

Mu si ke mwa zina-zina ku ituta ka za Mulimu ni ku latelela zamaiso ya hae mwa bupilo bwa mina. Mu nge mihato ye ka mi tusa ku lata Mulimu ni Linzwi la hae, yona Bibele. Linzwi la Mulimu li bulela ka za mutu ya itusisanga likuka za Bibele kuli: “Sa eza kaufela sa konda.”—Samu 1:1-3.

[Litaluso za kwatasi]