Sitopa Sa Bu-126 Si Kwaza Sikolo Sa Giliadi

Mwa Ku Kondiseza Musebezi Wa Bulumiwa

NYANGELA ye tabile ne i kopani kwa mukopano o ipitezi o ne u ezelizwe kwa Sibaka sa Tuto sa Watchtower kwa Patterson, mwa New York. Sitopa sa bu-126 sa Sikolo sa Giliadi sa Bibele ne si kwazize la Mukibelo, ili la 14 March, 2009. Baituti be ne ba feza sikolo seo ne ba tuha ba lumelwa kwa linaha ze 22 ku yo bulela taba ye nde ya Mubuso wa Mulimu.—Mateu 24:14.

Baituti ne ba sa zo feza-feza lituto za bona za ku ituta Bibele ka likweli ze ketalizoho, ze nee lukiselizwe ku ba tusa ku kondisa musebezi wa bona wa bulumiwa bwa Sikreste. Lizazi la ku kwaza leo ne li ba file kolo ya mafelelezo ya ku teeleza kwa likelezo ze butali ka za mo ba kona ku kondiseza musebezi wo.

Bo Anthony Morris, ba ba mwa Sitopa se si Etelela sa Lipaki za Jehova, ili be ne ba bile bo muina-situlo sa tukiso yeo ya ku kwaza, ne ba talusize kuli Sikolo sa Giliadi ne si kalisize ku luta balumiwa ka silimo sa 1943. Ku zwa ka silimo seo, ba ba kwazize sikolo ba petile kalulo ye tuna mwa musebezi wa mwa lifasi kaufela wa ku kutaza.

Mubuleli yo naa talusize kuli, bañoli ni Bafalisi niha ne ba nyaziselize baapositola ba Jesu kuli nee li “batu ba ba si ka ituta, ili batu feela,” ne ba lemuhile kuli bundume bwa baapositola bao ne bu tile bakeñisa kuli ne ba zamayanga ni Jesu. (Likezo 4:13) Lituto ze ba fiwanga baituti li ba konisanga ku bulela ka bundume ha ba taluseza ba bañwi ze ba itutile.

Bo Robert Ciranko, batusi ba Katengo ka Buñoli ka Sitopa se si Etelela, ne ba file ngambolo ye li “Mu si ke Mwa Atula ka ku ya ka Lifateho.” Ne ba bulezi kuli baituti ne ba tuha ba kopana ni batu ba mipilelo ni lizo ze fapahana hahulu. Nihakulicwalo, ku kutaza batu bao ha ku koni ku ba taata haiba baituti ba ba ni mubonelo o swana ni wa Jehova. Ka ku ya ka mo ne li ñolezwi liñolo la Likezo 10:34 mwa puo ya Sigerike, “Mulimu haa atuli ka ku ya ka lifateho za batu.” “Mulimu haa yi ka ku keta batu.” (Likezo 10:35) Muzwale Ciranko naa bulelezi balumiwa kuli: “Haiba mu ba ni mubonelo wa Mulimu ni ku nga mañi ni mañi sina mutu ya kona ku lumelelwa ki Mulimu, mu ka kondisa musebezi wa mina sina balumiwa ba hae.”

“Mu na ni ze mu Tokwa Kuli mu Pete Musebezi wa Mina”

Bo Samuel Herd, ba ba mwa Sitopa se si Etelela, ne ba kalisize ngambolo ya bona ka ku bulela kuli: “Batu ba bañwi baa nga kamele sina folofolo ye maswe, kono i bupehile ka mukwa o i konisa ku pila mwa lihalaupa.” Ka nzila ye swana, balumiwa ba banca ba na ni ze ba tokwa ze ka ba tusa ku kondisa musebezi wa bona mwa libaka ze ba lumelwa ku zona. Lika ze ketalizoho li ka ba tusa ku eza cwalo.

1. Ku lata Jehova. (Mateu 22:37, 38) Baituti ba bonisize kale kuli ba bata ku sebeleza Jehova.

2. Zibo ye ba na ni ya ku ziba Linzwi la Mulimu. Kamele i bulukanga lico ze fetuhile mafula mwa siluta sa yona. Kono ha i na ku tuhela ku ca, kuli i sepe feela lico ze i bulukile mwa siluta. Ka mukwa o swana, balumiwa ha ba swaneli ku itinga feela fa litaba ze ba itutile kwa Sikolo sa Giliadi kono ba swanela ku zwelapili ku ituta Bibele kuli ba tiye.

3. Ku lata batu. (Mateu 22:39) Baituti ba utwela batu makeke.

4. Moya wa ku itatela. (Samu 110:3) Mulumiwa haa felelwa ki maata, Jehova wa mu tiisa.—Isaya 40:29.

5. Maata a mwa bunca. Sina feela kamele ha i shimbanga mutu ya i zulami mwa lihalaupa,  mulumiwa ni yena u kona ku “shimba” Mukreste yo muñwi ya fumana butata mwa sebelezo ya hae ku Jehova. Ku eza cwalo ku tokwa maata luli, kono balumiwa ba na ni maata a mwa bunca.

Likalulo ze Ñwi za Tukiso ya ku Kwaza

Muluti wa Sikolo sa Giliadi ya bizwa Michael Burnett naa talusize kuli, mingongo ya alumondi nee li ye miñwi ya limpo za naa lumezi Jakobo ku mubusi yo muñwi wa Muegepita. (Genese 43:11) Mwa mingongo ya alumondi ku tezi liprotini. Baituti ba cile mingongo ya alumondi ye miñata ya swanisezo mwa lituto za bona. Ze ñwi za lituto ze ba lukela ku sebelisa kwa libaka ko ba yo sebeleza ki ku hupula butokwa bwa ku kolwa ka zaa ba fa Jehova, ni ku ituta ku lata ku pila mwa sibaka se ba lumelwa ku sona.

Bo Mark Noumair, baluti ba bañwi ba Sikolo sa Giliadi, ne ba talusize kuli Linzwi la Mulimu li swana sina “mukotana o tezi butali.” (Jobo 28:18, NW) Lu lukela ku kwalula mukotana wo ni ku sebelisa butali bo bu ku ona. Baituti ba lukela ku hupula muapositola Paulusi haiba sebelezo ya bulumiwa i sa bi mo ne ba nahanela. Balutiwa ba Jesu ne ba mu lumezi habo yena, kwa naa zo ina lilimo ze 9. Paulusi naa si ka li, kabakala kuli naa li ‘sisebeliso se si ketilwe,’ naa swanela ku sebeleza kwa kuli-kuli, kono naa sebelize ka taata kwa naa li kaufela. (Likezo 9:15, 28-30) Ku latelela liketo za Jehova ku kona ku ba taata. Mutu yo muñwi ya naa latelezi liketo za Jehova nee li Jonatani. Jonatani naa lemuhile kuli Davida naa ketilwe ki Jehova ku ba mulena, mi naa tusize Davida.

Mwa ngambolo ye li “Batanga ba Mulimu ba Bulela ka Bundume,” baituti ne ba ezize liponiso za ze ne ba petile mwa musebezi wa ku kutaza ha ne ba li kwa sikolo. Ba bañata ku bona ne ba kalisize ku ituta Bibele ni batu ba bañwi. Mwa ngambolo ye ne i tatami, ye li “Ku Lutiwa ki Kopano ya Jehova,” mubuleli naa buhisani ni balumiwa ba balalu ba ba sebelize ka nako ye telele. Yo muñwi ni yo muñwi wa bona naa talusize mwa naa lutezwi ku sebelisanela ni kopano ya Mulimu.

“Mu be Balumiwa ba ba Tabile”

Hasamulaho wa ngambolo yeo, bo Gerrit Lösch, ba ba mwa Sitopa se si Etelela, ba fa ngambolo ye tuna, ye li, “Mu be Balumiwa ba ba Tabile.” Ne ba talusize kuli misebezi ye miñata ye ngiwa kuli ya tabisa ha i tahisi tabo luli. (Liproverbia 14:13; Muekelesia 2:10, 11) Tabo ya niti i fumanwa ka ku eza tato ya Mulimu, nihaike kuli ku eza cwalo ha ku bangi ko ku bunolo nako kaufela. Lituto za Sikolo sa Giliadi nee li ze taata, kono ne li tahiselize baituti tabo.

Ku na ni lika li sikai ze tahiseza Bakreste ba niti tabo. Ba lapela Mulimu ya tabile. (Samu 33:12, NW; 1 Timotea 1:11, NW) Ba pila mwa kozo, inge ba ba kalile kale ku pila mwa paradaisi, mi Bibele i bonisa kuli lifasi li tuha li ba paradaisi. Ba fumani libaka le ba pilela, ili ku sebeleza Jehova ni ku mu lumbeka. Hape ba latwa ki Jehova ni Jesu.

Mubuleli naa ekelize kuli: “Mu ka ba balumiwa ba ba tabile haiba mu ituta ku kolwa ka se mu na ni sona.” Nto ye ñwi ye tahisa tabo ki ku lata ba bañwi ni ku latiwa ki bona. Kacwalo mu kwahele lifoso za ba bañwi mi mu si ke mwa li patalaza. Mu ezeze ba bañwi ze nde, mu tuse ba ba fokola, mu tiisane ka ze nde ze ezahezi ku mina. (Samu 41:1, 2; Likezo 20:35) Tabo i fumanwa ka  ku ikataza ku eza musebezi wa ku kutaza.—Luka 11:28.

Muzwale Lösch a ungula ka ku bulela kuli: “Mu zamaye hande, mu li balumiwa ba ba tabile, mu nze mu itabisanga hanyinyani, kono mu ise hahulu pilu kwa ku lumbeka Mulimu wa luna ya tabile, Jehova, ni ku tusa ba bañwi ku ba ni tabo.”

Ha se ba balile litumeliso ze zwa kwa linaha li sikai, bo Anthony Morris ba fa baituti ma-diploma a bona. Hasamulaho, muyemeli wa sitopa sa bu-126 a bala liñolo le ne li ñolezwi Sitopa se si Etelela. Mwa liñolo leo, baituti ba fitisa buitumelo bwa bona bwa ku kena Sikolo sa Giliadi.

Mwa manzwi a hae a ku ungula, muina-situlo naa talusize kuli “misifa” ni “malukuluhelo” ze kopanya mubili, li yemela lisebeliso ni litukiso zaa itusisa “mutanga ya sepahala, ya na ni kutwisiso” kuli a tiise ni ku etelela batu ba Jehova. (Makolose 2:18, 19; Mateu 24:45) Haiba baituti ba ba kwaza Sikolo sa Giliadi ba sebelisana ka ku tala ni ba ba ketilwe ku yemela Mulimu, ba ka kondisa za bukombwa bwa bona kaufela.—2 Timotea 4:5.

Mbokisi fa likepe 

LITABA ZA SITOPA

Palo ya linaha ko ba zwa baituti: 6

Palo ya linaha ko ba lumezwi: 22 Palo ya baituti: 56

Palo ya ba ba nyalani: 28

Avareji ya lilimo za buhulu: 32.8 Avareji ya lilimo za ku ba mwa niti: 17.9

Avareji ya lilimo ze ba itusisize nako ya bona ye ñata mwa sebelezo ya Jehova: 13.5

KO BA LUMEZWI BAITUTI

Baituti ba ba kwazize ne ba lumezwi kwa Benin, Bolivia, Bulgaria, Burkina Faso, Cameroon, Costa Rica, Ghana, Guatemala, Honduras, Kenya, Liberia, Madagascar, Mozambique, Nicaragua, Panama, Paraguay, Peru, Romania, Sierra Leone, South Africa, Togo, ni Uganda.

[Siswaniso se si fa likepe 32]

Sitopa sa Bu-126 se si Kwazize Sikolo sa Giliadi sa Bibele

Milaini i baliwa ku zwa kwapili ku kuta kwamulaho, mi mabizo a kolohanyizwe ku zwa ku la nzohoto ku ya ku la bulyo mwa mulaini ni mulaini.

(1) Kirchhoff, K.; Nichols, C.; Guzmán, Y.; Coil, H.; Becker, O.; De Simone, A. (2) Manzanares, A.; Bouvier, E.; Peddle, J.; Mason, H.; Braz, J. (3) Lee, J.; Forte, A.; Boucher, T.; Marsh, A.; Leighton, S.; Glover, M. (4) Kambach, H.; Jones, T.; Ferreira, A.; Morales, J.; Chicas, S.; Davis, B.; Dormanen, E. (5) Dormanen, B.; Nichols, J.; Pacho, T.; Titmas, L.; Bouvier, E.; Kirchhoff, A. (6) Leighton, G.; Pacho, A.; Van Campen, B.; Manzanares, A.; Rivard, A.; Lee, Y.; Titmas, L. (7) Boucher, M.; Coil, K.; Marsh, C.; Guzmán, J.; Jones, W.; Kambach, J. (8) Glover, A.; Ferreira, G.; Mason, E.; Forte, D.; Davis, N.; Chicas, O.; Rivard, Y. (9) Braz, D.; Van Campen, D.; Morales, A.; De Simone, M.; Becker, M.; Peddle, D.