Ne Ni Itutile Kuli Bupilo Ki Bwa Butokwa

NE LI KAKUSASANA WA LIZAZI LA APRIL 16, 2007. Ha ne ni bubami mwa kozwana ya ofisi ye fa muyaho wa bulalu wa muyaho o lundatami o bizwa Norris Hall fa sikolo se si pahami sa Virginia Polytechnic Institute and State University, kamba Virginia Tech, hape ne ni hupulisizwe kuli lu swanela ku itebuha hahulu lizazi ni lizazi le lu pila ku ba la butokwa.

Ne ni li mwa ofisi ya ka inze ni itukiseza ku liba kwa muyaho wa bubeli wa muyaho o lundatamani wo kuli ni yo nga mañolo a ka. Caziba yo muñwi a taha ku to ni kupa kuli ni ye kwa ofisi ya hae kuli ni yo mu tusa ku tatulula butata bo ne bu li fa kompyuta ya hae. Ha ne lu kena mwa ofisi ya hae, lwa utwa milumo ya litobolo ye ne lila ka ku kuta-kutela fa muyaho wa bubeli wa muyaho o lundatamani wo. Bakeñisa kuli ne lu sa zibi ze ne ezahala, lwa akufela mwa ofisi ya hae ni ku yo ikwalela mwateñi, ni ku libelela ze ne tuha li ezahala. Ne ni yo ipata mwa kozwana ya ofisi mi na lapela ku Jehova Mulimu kuli a ni tuse ku talimana ni ze ne ka ezahala.

Ha ne lu nze lu libelela cwalo, na hupula kezahalo ye ne ezahalile lilimo ze 15 kwamulaho. Ne ni beleka musebezi wa ku lukisa limota mwa muyaho mo ne ku lukisezwa limota. Pani-nyana ya mafula a mota ya na sweli mutu ye ne ni beleka ni yena ya kala ku tuka. Bakeñisa kuli na sabile hahulu, a ni sela mafula a na tuka ao kwa pata! Ne ni akuzi musi o cisa mi na ca maswe fa mubili wa ka. Ne ni matiselizwe kwa sipatela ka helikopita mi ne ni swelwi mwa sipatela ka likweli ze talu ni licika, inze ni tosaela. Hamulaho wa ku alafiwa ka likweli ze ketalizoho, se ni fola mi ne ni kona ku kuta kwa hae inze ni itumela bakeñisa kuli ne ni sa pila. Kezahalo yeo ne i ni lutile ku nga lizazi ni lizazi le ni pila ku ba la butokwa. Hape ne i tiisize katulo ya ka ya ku itusisa bupilo bwa ka kwa ku sebeleza Jehova Mulimu yena ya ni file bupilo, sina yo muñwi wa Lipaki za hae.—Samu 90:12; Isaya 43:10.

Bakeñisa kuli ne ni sa koni ku zwelapili ku beleka sina mulukisi wa limota kabakala kolofalo yeo, na ituta musebezi wa likompyuta mi na kena musebezi ku ba Virginia Tech. Kona libaka ha ne ni ipumani mwa muyaho wa Norris Hall zazi leo kakusasana.

Litobolo ha ne li zwelapili ku lila, ne lu sa zibi kuli mwa muyaho o ne u li kwatas’a muyaho wa luna ne ku ezahala pulao-tuna ya ka litobolo ye fita pulao ifi kamba ifi ye kile ya ezahala mwa U.S. Pulao yeo ne i til’o yema, sibulai yo ha na ikunupile isali yena, hasamulaho wa ku bulaya batu ba ba si na mulatu ba 32. Ibat’o ba mizuzu ye 20 ku zwa fo ne i kalezi ku ezahalela kezo yeo, lwa utwa mapokola mwa muyaho. Lwa ba biza, mi ba lu isa kwa sibaka ko ne ku si na kozi.

Kezahalo ye sabisa ye, i ni lutile kuli bupilo ki bo bukuswani mi bu kona ku fela ka nako ifi kamba ifi. (Jakobo 4:14) Kacwalo, ki kwa butokwa kuli lu sepe Mufani wa bupilo, Jehova Mulimu, ni ku bala lizazi ni lizazi le li zwa ku yena ku ba la butokwa!—Samu 23:4; 91:2.

[Manzwi a bañi ba siswaniso fa likepe 26]

AP Photo/The Roanoke Times, Alan Kim