Kana mu Toile Bumaswe?

“[Jesu] u toile bumaswe.”—MAHEB. 1:9.

1. Jesu naa lutileñi ka za lilato?

HA NA koñomeka butokwa bwa lilato, Jesu Kreste na bulelezi balutiwa ba hae kuli: “Ni mi fa mulao o munca, kikuli mu latane; sina mo ni mi latezi, ni mina mu latane cwalo. Se ba ka ziba batu kaufela kuli mu balutiwa ba ka ka sona, ki ha mu latana.” (Joa. 13:34, 35) Jesu naa bulelezi balateleli ba hae ku bonisananga lilato la buitomboli. Lilato leo ne li ka ba zibahaza. Jesu hape naa ba susuelize kuli: “Mu late be ili lila ku mina, mu fuyole ba ba mi lwaha.”—Mat. 5:44.

2. Balateleli ba Jesu ba lukela ku ituta ku toya nto mañi?

² Kono kwandaa ku luta balutiwa ba hae ka za lilato, Jesu hape naa ba lutile za ku toya. Ka za Jesu ne ku bulezwi kuli: “U lata se si lukile, mi u toile bumaswe.” (Maheb. 1:9; Samu 45:7) Seo si bonisa kuli lu na ni ku ituta ku lata ku luka kono hape ni ku ituta ku toya sibi, kamba bumaswe. Ki nto ye lemuseha kuli muapositola Joani naa bulezi ka ku nonga kuli: “Mutu ni mutu ya eza sibi u tula Mulao, kakuli sibi ki ku tula Mulao.”—1 Joa. 3:4.

3. Ka za ku toya bumaswe, taba ye i ka nyakisisa likalulo mañi za bupilo?

³ Kacwalo ka ku ba Bakreste ne lu ka eza hande ku ipuza kuli: ‘Kana ni toile bumaswe?’ Ha lu tatubeñi mo lu kona ku boniseza  kuli lu toile bumaswe mwa likalulo zee ne ze latelela za bupilo: (1) mo lu ngela ku nwa hahulu bucwala, (2) mubonelo wa luna ka za litaba za mioya, (3) mo lu ikutwela ka za buhule, ni (4) mo lu ngela ba ba lata bumaswe.

Mu si ke Mwa Komiwa ki Bucwala

4. Ki kabakalañi Jesu ha naa kona ku bulela ka ku lukuluha ha naa fa temuso ka za ku nwa maswe?

⁴ Jesu fokuñwi naa nwanga veine, kakuli naa ziba kuli ne li mpo ye zwa ku Mulimu. (Samu 104:14, 15) Kono naa si ka itusisa maswe mpo yeo ka ku itupwaela bucwala. (Liprov. 23:29-33) Kacwalo Jesu naa kona ku bulela ka ku lukuluha ha naa fa kelezo ka za mukwa wo. (Mu bale Luka 21:34.) Ku nwa hahulu bucwala ku kona ku kenya mutu mwa libi ze ñwi ze tuna. Kacwalo muapositola Paulusi naa ñozi kuli: “Mu si ke mwa kolwa bucwala, fo ku isa kwa buhule; kono mu tale moya.” (Maef. 5:18) Hape naa elelize basali ba ba hulile mwa puteho kuli ba si ke ba “ineela ku nwa bucwala bo buñata.”—Tite 2:3.

5. Ki Lipuzo mañi zeo ba ba keta ku nwa bucwala ba swanela ku ipuza?

⁵ Haiba mu keta ku nwa bucwala, hape ne mu ka eza hande ku ipuza kuli: ‘Kana ni na ni moya o swana ni wa Jesu ha ku taha ku za ku nwa hahulu bucwala? Haiba ni tokwa ku eleza ba bañwi ka za taba ye, kana na kona ku eza cwalo ka ku lukuluha? Kana ni nwelanga kuli ni libale lipilaelo kamba ku pima butata? Ni nwanga bucwala bo bu kuma kai ka sunda? Ni ezanga cwañi haiba mutu yo muñwi a bonisa kuli mwendi ni nwa hahulu? Kana na ikemelanga kamba mane ku filikana?’ Ku komiwa ki bucwala ku kona ku fokolisa buikoneli bwa luna bwa ku nahanisisa litaba ni ku eza likatulo ze nde. Balateleli ba Kreste ba swanela ku lika ka taata ku bukeleza munahano wa bona.—Liprov. 3:21, 22.

Mu Ambuke ku Ikenya Mwa Litaba za Mioya

6, 7. (a) Jesu na ezize cwañi Satani ni badimona? (b) Ki kabakalañi litaba za mioya ha li atile hahulu kacenu?

⁶ Ha naa li fa lifasi, Jesu na lwanisize ka ku tiya Satani ni badimona. Satani ha naa lwanisize ka ku nonga busepahali bwa hae, Jesu naa itiisize. (Luka 4:1-13) Hape naa lemuhile litiko ze sa lemusehi za ku kukueza munahano ni likezo za hae mi naa li tulile. (Mat. 16:21-23) Jesu na tusize batu ba ba swanela kuli ba banduke kwa tamo ye situhu ya badimona.—Mare. 5:2, 8, 12-15; 9:20, 25-27.

⁷ Ka 1914 Jesu ha sa beilwe fa bulena, na zwisize mwa mahalimu kukuezo ye silafaza ya Satani ni badimona ba hae. Kacwalo, sihulu nako ye, Satani u mbindana ku ‘puma lifasi kamukana.’ (Sin. 12:9, 10) Kamukwaocwalo, ha lu komoki kuli ku lata litaba za mioya ku atile hahulu mi ku sweli kwa ekezeha. Ki lifi ze lu kona ku eza kuli lu isileleze?

8. Lu swanela ku itekula cwañi ka za keto ya luna ya za lika ze lu itabisa ka zona?

⁸ Bibele i lemusa hande-nde ka za likozi za tumelo ya mioya. (Mu bale Deuteronoma 18:10-12.) Kacenu, Satani ni badimona ba kukueza minahano ya batu ka mafilimu, libuka, ni lipapali ze ñwi za fa kompyuta ze  susueza likezo za mioya. Kacwalo, ha lu keta za ku itabisa ka zona, mañi ni mañi wa luna u lukela ku ipuza kuli: ‘Mwa likweli ze felile, kana ni ketile ku itabisa ka mafilimu, liprogilamu za fa TV, lipapali ze ñwi za fa kompyuta, libuka kamba lipapali za lishea mo ku na ni litaba za mioya? Kana na utwisisa butokwa bwa ku ambuka kukuezo ya litaba za mioya, kamba kana na keshebisa likozi zeo? Kana na nahananga mwa ikutwela Jehova ka za keto ya ka ya lika ze ni itabisa ka zona? Haiba ni tuhelezi likukuezo za Satani ze cwalo ku ni kenela, kana lilato la ka ku Jehova ni likuka za hae ze lukile li ka ni susumeza ku nga muhato kapili ni ku ikayutula ku zona?’—Lik. 19:19, 20.

Mu Utwe Temuso ya Jesu ka za Buhule

9. Mutu u kona cwañi ku lata bumaswe?

⁹ Jesu naa yemezi sikuka sa Jehova ka za buhule. Naa bulezi kuli: “Ha mu si ka bala kuli ya na ba ezize kwa simuluho, na ezize muuna ni musali? Mi a li: Kabakaleo, muuna u ka tuhela ndataahe ni mahe, a kumalele musalaa hae, mi ba babeli ikaba nama i liñwi feela. Kuli mane ha ba sa li ba babeli, kono ki nama i liñwi feela. Cwalehe, Mulimu sa kopanyize hamoho, mutu a si ke a si kauhanya.” (Mat. 19:4-6) Jesu naa ziba kuli ze lu bona li kona ku ama pilu ya luna. Kacwalo, mwa ngambolo ya hae ya fa lilundu, na ize: “Mu utwile kuli ne ku bulezwi cwana: U si ke wa buka. Kono na, na mi bulelela, ni li: Mutu nihaikaba ufi kamba ufi ya talima musali ka ku mu lakaza, u sa mu bukile mwa pilu.” (Mat. 5:27, 28) Ba ba sa isi pilu kwa temuso ya Jesu se ba eza luli ki ku lata bumaswe.

10. Mu kandeke mutala o bonisa kuli mutu wa kona ku tuhela mukwa wa ku buha maswaniso a mapunu.

¹⁰ Satani u fuzelela moya wa buhule ka ku itusisa maswaniso a mapunu. Maswaniso a mapunu a atile hahulu mwa lifasi kacenu. Ba ba buhanga maswaniso a mapunu ba fumananga taata ku a zwisa mwa munahano. Mane ba kona ku hapiwa ki mukwa wa ku buha maswaniso a mapunu. Mu nge mutala wa se ne si ezahezi ku Mukreste yo muñwi. U bulela kuli: “Ne ni buhanga maswaniso a mapunu kwa mukunda. Ne ni ibupezi lifasi le ne ni nga kuli ne li kauhani ni lifasi le ne ni sebeleza Jehova ku lona. Ne ni ziba kuli mukwa wo ne u fosahezi kono ne ni ipulelezi kuli sebelezo ya ka ku Jehova ne i sa amuheleha.” Kiñi se ne cincize mubonelo wa muzwale yo? U li: “Nihaike kuli yeo ne li yona nto ye taata ka ku fitisisa ye ni kile na eza, na yo taluseza maeluda za butata bwa ka.” Kwa mafelelezo, muzwale yo a tuhela mukwa o maswe wo. U itumelela kuli: “Ha se ni zwisize sibi seo mwa bupilo bwa ka, ne ni ikutwile kuli luli lizwalo la ka ne li kenile.” Ba ba toile bumaswe ba lukela ku ituta ku toya maswaniso a mapunu.

11, 12. Lu kona ku bonisa cwañi kuli lu toile bumaswe ka keto ya luna ya lipina?

¹¹ Lipina hamoho cwalo ni manzwi a zona li kona ku kukueza luli maikuto a luna mi kacwalo ni pilu ya luna ya swanisezo. Lipina zona ka sibili ki mpo ye zwa ku Mulimu mi se li itusisizwe ka nako ye telele mwa bulapeli bwa niti. (Ex. 15:20, 21; Maef. 5:19) Kono lifasi la Satani le li maswe li susueza lipina ze lumbeka buhule. (1 Joa. 5:19) Mu kona ku ziba  cwañi kuli lipina ze mu teeleza za mi silafaza kamba kutokwa?

¹² Mwa kona ku kala ka ku ipuza kuli: ‘Kana lipina ze ni teelezanga li lumba bubulai, bubuki, buozwa, ni matapa? Ha ne ni ka balela mutu yo muñwi manzwi a pina ye ñwi, kana mutu yo naa ka bona kuli ni toile bumaswe kamba kana manzwi a teñi naa ka bonisa kuli pilu ya ka i silafezi?’ Ha lu koni ku talusa kuli lu toile bumaswe ka lipulelo kono inge lu bu lumbeka mwa lipina. Jesu naa bulezi kuli: “Ze zwa mwahanu, li zwa mwa pilu; mi ki zona ze silafaza mutu. Kakuli mwa pilu ki mo ku zwa mihupulo ye maswe, ni lipulao, ni ku buka, ni busholi, ni lisebo za buhata, ni linyefulo.”—Mat. 15:18, 19; mu bapanye Jakobo 3:10, 11.

Mu Nge ba ba Lata Bumaswe Sina Mwa na ba Ngezi Jesu

13. Jesu naa nga cwañi ba ne ba tundamezi ku eza sibi?

¹³ Jesu naa bulezi kuli naa tezi ku to bizeza baezalibi kamba ba ba lata bumaswe kwa ku baka. (Luka 5:30-32) Kono cwale naa ngile cwañi ba ne ba tundamezi ku eza sibi? Jesu naa file litemuso ze buima ka za ku kukuezwa ki batu ba ba cwalo. (Mat. 23:15, 23-26) Hape naa talusize ka ku utwahala kuli: “Hasi batu kaufela ba ba li ku na: Mulena, Mulena, ba ba ka kena mwa mubuso wa kwa lihalimu; kono ku ka kena ya eza se si latwa ki Ndate ya kwa lihalimu. Mwa lizazi leo [muta Mulimu a tahisa katulo], ba bañata ba ka li ku na: Mulena, Mulena, ha lu li, ki luna ne lu polofita ka Libizo la hao? Mi ne lu leleka balimu ka Libizo la hao? Mi ne lu eza limakazo ze ñata ka Libizo la hao?” Kono u ka hana batu bao ba ba eza bumaswe ba sa baki. U ka li ku bona: “Mu zwe ku na.” (Mat. 7:21-23) Ki kabakalañi ha ba ka fiwa katulo ye cwalo? Kakuli batu ba ba cwalo ba shwaula Mulimu mi ba nyandisa ba ba bañwi ka likezo za bona ze maswe.

14. Ki kabakalañi baezalibi ba ba sa baki ha ba zwisiwanga mwa puteho?

¹⁴ Linzwi la Mulimu li laela kuli baezalibi ba ba sa baki ba zwiswe mwa puteho. (Mu bale 1 Makorinte 5:9-13.) Ku eza cwalo ku butokwa ka mabaka a malalu: (1) kuli libizo la Jehova li si ke la nyazahala, (2) kuli puteho i si ke ya silafala, ni (3) ku tusa muezalibi kuli haiba ku konahala, a bake.

15. Busepahali ku Jehova bu tokwa kuli lu alabe lipuzo mañi za butokwa?

¹⁵ Kana lu nga ba ba tundamena mwa buezalibi sina mwa naa ba ngela Jesu? Lu tokwa ku nahanisisa lipuzo ze: ‘Kana ne ni ka keta ku swalisana kamita ni mutu ya zwisizwe mwa puteho kamba ya ikauhanyize kwa puteho ya Sikreste? Ku cwañi haiba mutu yo ki wahesu kono ha sa pila ni luna fa ndu?’ Ha lu ipumana mwa muinelo o cwalo, lilato la luna la ku lata ze lukile ni busepahali bwa luna ku Mulimu za kona ku likiwa. *

16, 17. Me yo muñwi wa Mukreste na bile mwa muinelo mañi o taata, mi naa tusizwe cwañi ku kuteka tukiso ya ku zwisiwa mwa puteho kwa lifosi ba ba sa baki?

¹⁶ Mu nge mutala wa kaizeli yo muñwi.  Naa na ni mwanaa ya hulile ya na lata Jehova ka nako ye ñwi. Kono hamulaho, mwana yo a keta ku eza bumaswe ka ku sa baka. Kacwalo a zwisiwa mwa puteho. Kaizeli wa luna naa lata Jehova, kono hape na lata ni mwanaa hae mi kwa mu bela hahulu taata ku latelela taelo ya mwa Mañolo ya ku sa swalisana ni yena.

¹⁷ Kaizeli yo ne mu kabe mu mu file kelezo mañi? Eluda yo muñwi a mu tusa ku bona kuli Jehova naa utwisisa butuku bwa na utwa. Muzwale yo a mu susueza ku nahana butuku bwa naa utwile Jehova bana ba hae ba bañwi ba mangeloi ha ne ba ipanguzi. Eluda yo a taluseza kaizeli kuli nihaike kuli Jehova wa ziba butuku bo bu kona ku tahiswa ki muinelo wo, u tokwa kuli baezalibi ba ba sa baki ba zwisiwe mwa puteho. A amuhela likupuliso zeo mi ka busepahali a kuteka tukiso ya ku zwisiwa mwa puteho kwa lifosi ba ba sa baki. * Busepahali bo bu cwalo bwa tabisa Jehova.—Liprov. 27:11.

18, 19. (a) Ku tuhela ku swalisana ni ya eza bumaswe ku bonisa kuli lu toile nto mañi? (b) Ki lifi ze kona ku ezahala ha lu sepahala ku Jehova ni kwa tukiso ya hae?

¹⁸ Haiba mu mwa muinelo o swana, mu hupule kuli Jehova wa mi utwisisa. Ka ku tuhela ku swalisana ni mutu ya zwisizwe mwa puteho kamba ya ikauhanyize, mu bonisa kuli mu toile moya ni likezo ze tahisize bumaswe bo. Kono hape mu bonisa kuli mwa lata muezalibi yo mi mu eza ze ka mu tusa. Busepahali bwa mina ku Jehova bu kana bwa tahisa kuli mwendi mutu ya kalimezwi a bake ni ku kutela ku Jehova.

¹⁹ Mutu yo muñwi ya kile a zwisiwa ni ku kutisezwa mwa puteho hasamulaho naa ñozi kuli: “Ni tabile kuli bakeñisa kuli Jehova u lata hahulu batu ba hae, u bonanga teñi kuli kopano ya hae i siyala i kenile. Nto ye kana ya bonahala ku ba ye maswe kwa batu ba kwande ki yona nto ye swanela ili ye lilato luli.” Kana mu nahana kuli mutu yo naa kabe a tusizwe ku ba ni maikuto a cwalo kambe kuli batu ba mwa puteho ni bana bahabo yena ne ba zwezipili ku swalisana ni yena kamita ha na zwisizwe mwa puteho? Ku yemela kwa luna tukiso ya ka Mañolo ya ku zwisa lifosi ze sa baki mwa puteho ku bonisa kuli lu lata ku luka mi lwa lemuha tukelo ya Jehova ya ku toma likuka za muzamao.

“Mu Toye Bumaswe”

20, 21. Ki kabakalañi ha ku li kwa butokwa ku ituta ku toya bumaswe?

²⁰ Muapositola Pitrosi u lemusa kuli: “Mu no iswala, mu libelele.” Libaka? Kakuli ‘Diabulosi, sila sa mina u zamaya sina tau ye lila ye bata ye i ka ca.’ (1 Pit. 5:8) Kana ya ka ciwa yo ikaba mina? Ku itingile ka mo mu itutela ku toya bumaswe.

²¹ Ku fita fa ku toya bumaswe ku taata. Lu pepezwi mwa sibi, mi lu pila mwa lifasi le li sususeza litakazo za nama. (1 Joa. 2:15-17) Kono ka ku likanyisa Jesu Kreste ni ku ba ni lilato le lituna ku Jehova Mulimu, lwa kona ku fita fa ku toya bumaswe. Haike lu tukufalelwe ku ‘toya bumaswe’ inze lu ziba hande-ndende kuli Jehova u “sileleza . . . ba ba kenile ba hae, u ba lamulela mwa mazoho a ba ba maswe.”—Samu 97:10.

[Litaluso za kwatasi]

Mu Kona ku Alaba Cwañi?

• Ki lika mañi ze ka lu tusa ku tatuba mubonelo wa luna ka za bucwala?

• Lu kona ku eza lifi kuli lu isileleze kwa litaba za mioya?

• Ki kabakalañi maswaniso a mapunu ha li aa lubeta?

• Lu kona ku bonisa cwañi kuli lu toile bumaswe muta mutu ye lu lata a zwisiwa mwa puteho?

[Lipuzo za Tuto]

[Siswaniso se si fa likepe 29]

Haiba mu keta ku nwa bucwala, ki lifi ze mu tokwa ku nahana?

[Siswaniso se si fa likepe 30]

Mu tokomele likukuezo za Satani ze mwa lika za ku itabisa ka zona

[Siswaniso se si fa likepe 31]

Ya buha maswaniso a mapunu u na ni lilato la nto mañi?