Mu Tuse Banana ku Ziba Hande Kopano ya Jehova

BANANA ba lata ku ituta. Mu nahane feela lipuzo ze ne ba na ni zona banana ba Maisilaele mwa Egepita mwa busihu bo ne i kalisize Paseka. Mwendi ne ba buzize lipuzo ze cwale ka ze: ‘Ki kabakalañi ngunyana ha i tokwa ku bulaiwa?’ ‘Ki kabakalañi bo ndate ha ba sasa mali fa munyako?’ ‘Lu ya kai?’ Sisupo se si bonisa kuli Jehova naa tabela lipuzo ze cwalo ki taelo ya naa file bo ndate ba Maisilaele. Jehova naa ba bulelezi cwana ka za ku ezwa kwa Paseka mwa linako za kwapili: “Bana ba mina ha ba ka mi buza, ba li: Mu swanisañi ka sebelezo yeo? Mu no li ku bona: Ki sitabelo sa Muñaa Bupilo sa Paseka ya hae, ha kile a fitelela fahalimwaa mandu a bana ba Isilaele, kwa naha ya Egepita, lizazi la nata Maegepita mi a sileleza mandu a luna.” (Ex. 12:24-27) Hasamulaho wa nako, Jehova naa hupulisize bashemi ba Maisilaele kuli ne li kwa butokwa ku alabanga lipuzo ze ne ba ka buza bana ba  bona ka za “milao, ni litaelo” za naa ba laezi Jehova.—Deut. 6:20-25.

Kaniti, Jehova naa bata kuli banana ba fumanange likalabo ze kolwisa za lipuzo ze ne ba buza ka za bulapeli bwa niti, ili likalabo ze ne ba ka susumeza ku lata Jehova, Mulimu ni Mupilisi wa bona. Ni kacenu, Jehova u bata kuli banana ba fumane likalabo za lipuzo za bona. Ye ñwi ya linzila zeo bashemi ba kona ku luta ka zona bana ba bona ku lata Mulimu ni batu ba hae ka lipilu za bona kaufela, ki ka ku ba tusa ku ziba hande kopano ya Jehova ni ku utwisisa ze i lu ezeza. Kacwalo, ha lu nyakisiseñi ze ñwi za linzila ze ba konwa ku tusiwa ka zona bana kuli ba itute ze ñata ka za kopano ya Mulimu.

Puteho ye mu li ku Yona

Banana ba tokwa ku ziba puteho mo lu kopana lubasi lwa mina. Kuli mu ba tuse ku eza cwalo, mina bashemi mu swanela ku yanga ni bona kwa mikopano kaufela ya Sikreste. Ha mu eza cwalo, mu latelela manzwi a naa bulezi Jehova kwa Maisilaele, ha naa ba laela kuli: “Puta sicaba, baana ni basali ni bana, . . . kuli ba utwe, mi ba itute ku saba Muñaa Bupilo Mulimu wa mina, mi ba tokomele ku eza litaba kaufela za milao yeo. Ni kuli bana ba ba si ka ziba litaba zeo, ba li utwe, mi ba itute ku saba Muñaa Bupilo Mulimu wa mina.”—Deut. 31:12, 13.

Banana ba kona ku kalisa ku ituta Linzwi la Jehova ha ba sa li ba banyinyani. Muapositola Paulusi naa bulezi cwana ka za Timotea: “Ku zwa kwa bwanana u ziba Mañolo a kenile.” (2 Tim. 3:15) Nihaiba banana ba banyinyani ba kalisanga ku utwisisa litaba ze lutiwa ni ku ziba lipina za Mubuso ha ba li kwa mikopano kwa Ndu ya Mubuso. Teñi ko, ba itutanga mwa ku itusiseza hande Bibele ni lihatiso ze tomile ku  yona. Hape, ha ba li kwa mikopano ya luna ba lemuhanga kuli ba ba li teñi ba bonisanga kalemeno ka ka zibahaza balateleli ba niti ba Kreste—ili lilato la niti. Jesu naa ize: “Ni mi fa mulao o munca, kikuli mu latane; sina mo ni mi latezi, ni mina mu latane cwalo. Se ba ka ziba batu kaufela kuli mu balutiwa ba ka ka sona, ki ha mu latana.” (Joa. 13:34, 35) Lilato le li boniswanga kwa Ndu ya Mubuso ni buiketo bo ba ikutwanga ba ba li kwateñi, li ka susumeza banana mi li ka ba tusa ku ba ni mukwa wa ku fumanehanga kwa mikopano ya Sikreste mwa bupilo bwa bona kaufela.

Haiba mu ba ni mukwa wa ku itahanelanga ku fita kwa Ndu ya Mubuso ni ku ina hanyinyani hasamulaho wa mikopano, mu ka fa bana ba mina kolo ya ku ba ni balikani. Ku fita ku ba tuhelela ku eza siango ni banana ba bañwi feela, mu ba tuse ku zibana ni mizwale ni likaizeli kaufela. Haiba banana ba zibana ni ba bahulu, ba ka ikutwela litaba ze nde ze ñata ze ne ezahezi ku ba bahulu bao mi ba ka lemuha butali bwa bona. Sina feela Zakaria, “muuna ya naa na ni kutwisiso mwa ku bona za Mulimu,” ha naa susuelize mutangana Oziasi ya naa li mulena wa Juda kuli a eze hande, batu ba ba sebelelize Jehova ka busepahali ili ka lilimo ze ñata ni bona ba kona ku susueza banana ku eza hande. (2 Makol. 26:1, 4, 5) Ha mu li mwa Ndu ya Mubuso, mwa kona ku taluseza bana ba mina musebezi wa sibulukelo sa libuka, fo ku pahekiwanga lizibiso, ni lika ze ñwi.

Kopano ya Mwa Lifasi Lote

Banana ba tokwa ku utwisisa kuli puteho ye mu kopana ku yona ki kalulo ya kopano ya mwa lifasi lote ye na ni liputeho ze fitelela 100,000. Mu ba taluseze litaba ze ama kopano ye, mo i sebeleza, ni mo ba kona ku tuseza mwa musebezi o ezwa ki yona. Mu ba bulelele libaka ha mu nyolelwanga mikopano ya mipotoloho, mikopano ya likiliti, ni ku potelwa ki muokameli wa mupotoloho.—Mu bone mbokisi ye li “Litaba ze mu Kona ku Nyakisisa ka Nako ya ku Lapela Sina Lubasi,” fa likepe la 28.

Ha mu na ni sibaka, mu meme baokameli ba maeto, balumiwa, lilama za lubasi lwa Betele, ni ba bañwi ba ba eza sebelezo ya nako kaufela kuli mu to ca ni bona sico kwa ndu ya mina. Mu si ke mwa hupula kuli ha ba na nako ya ku ambola ni banana. Batu bao ba ba eza sebelezo ya nako kaufela ba lika ka taata ku likanyisa Jesu, ya naa amuhelanga banana ka nako kaufela ni ku ambola ni bona. (Mare. 10:13-16) Ku teeleza kwa batanga ba Jehova ba ba cwalo ha ba kandeka ze nde ze ba iponezi ni ku lemuha tabo ye ba fumana ha ba eza sebelezo ye kenile, ku ka susueza bana ba mina ku ba ni mulelo wa ku eza sebelezo ya nako kaufela.

Ki lika mañi ze ñwi ze mu kona ku eza sina lubasi kuli mu tuse bana ba mina ku ziba hande kopano ya Jehova? Mwa kona ku sebelisa liakalezo ze: Mu nyakisisange buka ya Jehovah’s Witnesses—Proclaimers of God’s Kingdom sina lubasi. Mu koñomeke buitomboli, buikokobezo, ni busepahali bo ba bonisize batanga ba Jehova. Mu ba bonise mo Jehova naa itusiselize batu bao kuli ba shaele taba ye nde mwa lifasi kamukana. Mu itusise mavidio a ezizwe ki kopano ya Jehova kuli bana ba mina ba itute lituto za butokwa kwa lika ze ne ezahezi kwamulaho ni ze ezahala cwale. Haiba mwa kona, mu yo pota fa ofisi ya mutai ni lihae la Betele mwa naha ya mina kamba mwendi mwa linaha ze ñwi. Ku potela libaka zeo ku ka tusa bana ba mina ku utwisisa mo i swalisanezi kalulo ya fa lifasi ya kopano ya Jehova kuli sitopa sa mutanga ya sepahala si fe lico za moya ni zamaiso kwa mizwale mwa lifasi kamukana, sina mo ne si ezeza mwa miteñi ya baapositola.—Mat. 24:45-47; Lik. 15:22-31.

Mu Lute Bana ba Mina ku Likana ni Buikoneli Bwa Bona

Ha mu luta bana ba mina, mu hupulange mo Jesu naa lutelanga baapositola ba hae. Muta o muñwi naa ba bulelezi kuli: “Ni sa na ni ze ñata za ku mi bulelela; kono ha mu koni ku li utwisisa cwale.” (Joa. 16:12) Jesu naa si ka imeza balutiwa ba hae ka litaba ze ñata-ñata.  Kono naa ba lutile hanyinyani-hanyinyani litaba za niti za butokwa ilikuli ba kone ku li utwisisa hande. Ni mina mu si ke mwa imeza bana ba mina ka litaba ze ñata-ñata. Ka ku ba lutanga hanyinyani-hanyinyani ka za kopano ya Jehova, mu ka ba tusa ku zwelapili ku tabela ku ituta ka za puteho ya Sikreste ni kuli ba ikolange ku ituta ka za teñi. Bana ba mina ha ba nze ba hula, mwa kona ku kutela ku ba luta ze ne ba itutile kale ka ku li talusa ka butungi.

Puteho ya Sikreste ki yona ye lu tusa hahulu ku tiisa bulikani bwa luna ni Mulimu, mi banana ba ba tukufalelwa ku tusa mwa misebezi ya yona ba tusiwanga ku hanyeza likukuezo za mwa lifasi la Satani. (Maro. 12:2) Lu na ni sepo ya kuli mu ka fumana tabo ye tuna ha mu ka tusa bana ba mina ku ziba hande kopano ya Jehova. Mi haike a ba fuyole kuli ba zwelepili ku kumalela ka busepahali kwa kopano ya hae ni ku Mulimu ya lilato ye lu sebeleza.

[Mbokisi/Siswaniso se si fa likepe 28]

Litaba ze mu Kona ku Nyakisisa ka Nako ya ku Lapela Sina Lubasi

Ki ze litaba ze ñwi ze ama kopano ya Jehova ze mu kona ku nyakisisa ka Nako ya ku Lapela Sina Lubasi.

▪ Mu taluse mo ne i kaliselize puteho ye mu li ku yona. Ne i kalile cwañi mi ne li lili? Ki afi Mandu A Mubuso mo ne i kopanelanga? Ha mu ambola taba ye, mwa kona ku mema muzwale kamba kaizeli ya swalisani ni puteho ya mina ka nako ye telele kuli a to alaba lipuzo za bana ba mina.

▪ Mu taluse mulelo wa mikopano ya puteho ye shutana-shutana ni mikopano ye mituna mi mu taluse mo ba konwa ku tusezwa bana ba mina ki mikopano yeo.

▪ Mu nyakisise mulelo o li lukiselizwe likolo ze shutana-shutana ze mwa kopano ya Jehova. Mu ba kandekele lika ze nde ze ezahezi ze bonisa ze ba petile ba ba kwazize kwa likolo zeo.

▪ Mu tuse banana kuli ba bone kuli ki kwa butokwa ku ba bahasanyi ba ba kutazanga taba ye nde kamita. Mu ba bonise mo ba kona ekeleza kwa lipalo ze boniswanga mwa piho ya mwa lifasi kaufela ye hatiswanga mwa buka ya Yearbook of Jehovah’s Witnesses.

▪ Mu nyakisise likalulo ze shutana-shutana za sebelezo ya nako kaufela ze ba kona ku peta ba banca mwa kopano ya Jehova. Litaba ze ama likalulo za sebelezo ya nako kaufela li fumaneha mwa Kauhanyo 10 ya buka ya Mo Lu Swalisanezi ku Eza Tato ya Jehova.

▪ Mu tuse banana ku utwisisa libaka puteho ha i ezanga lika ka ku latelela miezezo ye tomilwe. Mu ba taluseze mabaka ha ba sa swaneli ku ikezeza lika ka ku sa lumelelana ni kopano ya Jehova, nihaiba mwa linto ze nyinyani. Mu ba bonise ka mo ba kona ku tuseza kuli lika li ezwe hande mwa puteho ka ku latelela zamaiso ya maeluda.

[Siswaniso]

Bana ba mina ba ka tusiwa ha ba iswala bulikani ni batanga ba Jehova ba ba mu sebelelize ka nako ye telele

[Maswaniso a fa likepe 26]

Bashemi kacenu ba ikatazanga ku fa likalabo ze kolwisa ha ba buziwa lipuzo ze ama kopano ya Jehova, sina mo ne ba ezezanga bashemi ba mwa Isilaele wa ikale