“Tukelo ye ba na ni Yona Banana ya ku Hula Kwa Moya”

KA LA December 9, 2008, ba Swedish Academy ba ba talima za Litukelo za Banana, ne ba ezize mukopano o ipitezi o ne u na ni toho ya taba ye li , “Tukelo ye ba na ni Yona Banana ya ku Hula Kwa Moya.” Babuleli ba ne ba yemela Keleke ya Sweden, ba likeleke ze ñwi ze twi ki za Sikreste, ba bulapeli bwa Simozilemu, ni ba ba yemela litukelo za batu ne ba fitisize maikuto a shutana-shutana.

Halaa babuleli bao, ne ku na ni yo muñwi wa baeteleli ba bulapeli ya naa bulezi kuli: “Ku taata hahulu ku talusa hande mo makande a mwa Bibele a kona ku tuseza hahulu banana kwa moya.” Litaba ze mwa Mañolo li tusa cwañi banana kwa moya?

Mueteleli wa bulapeli yo, naa bulezi kuli: “Litimana ni makande a mwa Bibele li bonisa banana lika ze ba tokwa ku nahanisisanga ni ku yeya ba nosi.” Naa kolokisize makande a cwale ka likande la “bo Adama ni Eva, la Kaine ni Abele, la Davida ni Goliati, la za ku pepwa kwa Jesu, la za Zakia wa mutelisi, la za nguli ya mwana ya latehile, la za Musamaria yo munde.” Makande ao naa talusizwe ku ba “ye miñwi ya mitala, ye kona ku etelela banana mwa bupilo mwa litaba ze cwale ka za ku sa sepahala, ku swalela, swalelo ya libi, sitoyo, lika ze swabisa, ku tatulula lifapano, ni ku bonisa lilato la Sikreste ni le li si na buitati.” Naa ekelize kuli: “Litimana ze, li bonisa mitala ya lika ze kona ku tusa mutu ku cinca bupilo bwa hae, za kona ku ezanga, ni za kona ku ipumana ku zona.”

Ki niti kuli ku susueza batu ku balanga Bibele ki nto ye nde. Kono kana luli banana ba na ni buikoneli bwa ku “nahanisisanga ni ku yeya ba nosi” ze ba bala mwa Mañolo ni ku fitanga fa mafelelezo a swanela a taba?

Nihaiba ba bahulu ba tokwa ku talusezwanga litaba ze ba bala mwa Mañolo. Ka mutala, Bibele i lu bulelela za muuna ya naa palezwi ku utwisisa hande litaba za moya ka ku ‘nahanisisa ni ku yeya a nosi.’ Muuna yo naa li likwambuyu la Muetopia. Naa bala bupolofita bwa Isaya, kono naa sa utwisisi taluso ya bona. Bakeñisa kuli naa bata ku utwisisa lushango lwa mupolofita, naa amuhezi tuso ya mulutiwa Filipi. (Lik. 8:26-40) Muetopia yo haki yena feela ya naa tokwa ku tusiwa ku utwisisa taluso ya Mañolo. Kaufela luna lu tokwa ku shashululelwanga litaba za mwa Mañolo—sihulu banana.

Bibele i lu lemusa kuli: “Bungulunde bu hanelezi mwa pilu ya mwana.” (Liprov. 22:15) Banana ba tokwa ku etelelwa, mi bashemi ba bona ba na ni buikalabelo bwa ku ba luta lituto za muzamao ni za moya ili ze tomile fa Bibele ni fa litaba ze lutiwanga mwa puteho ya Sikreste. Banana ba na ni tukelo ya ku lutiwa tuto yeo. Ku zwelela feela kwa bwanana, ba tokwa ku tusiwa kuli ba be ni mutomo wa ka Mañolo o ka ba tusa ku hula kwa moya ilikuli ite ba fite fa ku ba batu “ba ba hulile, ba ba na ni kutwisiso ya ku keta ze nde ku ze maswe, kabakala ku itwaelisa cwalo.”—Maheb. 5:14.