Nako ya ku Lapela Sina Lubasi ki ya Butokwa Kuli lu Punyuhe

MU NAHANE feela mo i ka sabiseza “ndwa ya lizazi le lituna la Mulimu Ya-Mata-Kaufela.” (Sin. 16:14) Ka ku itusisa lipulelo za swanisezo ze talusa hande lika, mupolofita Mika naa ñozi kuli: “Malundu a bulumuka, ni misindi ya pazuha, sina bulota ha bu shengunuka fapilaa mulilo, ni sina mezi haa kukuluha fa njetumuko.” (Mika 1:4) Ba ba sa sebelezi Jehova ba ka ipumana mwa muinelo mañi o maswe? Linzwi la Mulimu li li: “Ba ba bulailwe ki [Jehova, NW] mwa lizazi le, ba ka ba teñi ku zwa mwa neku le liñwi la lifasi ku isa mwa neku le liñwi la lifasi.—Jer. 25:33.

Kabakala litemuso ze cwalo, bo ndate mabasi—ili bao buñata ba li bashemi ba makwasha—ba swanela ku ipuza kuli, ‘Kana bana ba ka ba ka punyuha Armagedoni?’ Bibele i sepisa kuli ba ka punyuha haiba Armagedoni i ba fumana inge ba na ni silikani se sinde ni Jehova ku likani ni mayemo a buhulu bwa bona.—Mat. 24:21.

Butokwa Bwa ku Banga ni Nako ya ku Lapela Sina Lubasi

Ka ku ba bashemi, mu bone teñi kuli mwa eza mo mu konela kaufela ku hulisa bana ba mina “ka ku ba lemusa, ni ka tuto ya [Jehova].” (Maef. 6:4) Ku ituta Bibele ni bana ba mina ki kwa butokwa hahulu. Lu bata kuli bana ba luna ba be sina Bakreste ba kwa Filipi, ba naa babalize muapositola Paulusi bakeñisa kuli ne ba itatela ku utwa Jehova. Naa ñozi kuli: “Balatiwa ba ka, sina ha mu li ba ba utwa kamita, ni li, mu sebeze za ku piliswa kwa mina ka sabo ni ka tutumelo, isi feela ha ni li teñi ku mina, kono sihulu ha ni li siyo.”—Mafil. 2:12.

Kana bana ba mina ba latelelanga milao ya Jehova ha ba li ba nosi? Ku cwañi ha ba li kwa sikolo? Mu kona ku tusa cwañi bana ba mina kuli ba ikolwise hande ka za butali bwa milao ya Jehova ilikuli i kone ku ba etelela mane ni ha ba li ba nosi?

Ku banga ni tuto ya lubasi ku ka tusa hahulu mwanaa mina ku tiisa tumelo ya hae ku Mulimu ni haa li a nosi. Kacwalo, ha lu nyakisiseñi lika za butokwa ze talu ze ka tusa kuli tuto ya Bibele ya lubasi i konde.

Mu Ezange Tuto Yeo Kamita

Mwa puo ya kwa makalelo ya Bibele, pulelo ye tolokilwe kuli “ka lizazi le liñwi” kwa Jobo 1:6 i bonisa kuli bana ba Mulimu ba mangeloi ba memiwanga ku taha fapilaa hae ka linako ze tomilwe. Mu ezange cwalo ni bana ba mina. Mu tome lizazi ni nako ye mu ka banga ni Nako ya ku Lapela Sina Lubasi mi mu kumalele kwa tomahanyo yeo. Ku tuha fo, mu kete nako ye ñwi ye mu ka ezanga tuto haiba mu palelwa ku eza tuto ka nako ye mu tomile.

Hamulaho wa likweli, mu si ke mwa lumeleza moya wa kuli ku lukile ku banga ni tuto ya lubasi ka siwela. Mu lemuhe kuli bana ba mina ki bona baituti ba mina ba Bibele ba butokwa. Niteñi, Satani u bata ku ba bulaya. (1 Pit. 5:8) Haiba mu palelwa ku ba ni Nako ya ku Lapela Sina Lubasi kabakala ku buha TV kamba ku eza misebezi ye miñwi, Satani u ka ba hapa.—Maef. 5:15, 16; 6:12; Mafil. 1:10.

Mu Kete Litaba ze Tusa

Nako ya ku Lapela Sina Lubasi ha i swaneli ku ba feela nako ya ku ituta. Mu like ka taata ku i bisa ye tusa. Kamukwaufi? Ka linako ze ñwi mu ketange litaba ze swalisana ni miinelo ya tuha a kopana ni yona mwanaa mina. Ka mutala, mwendi mwa kona ku itukiseza bukombwa ka nako ya tuto. Banana ba ikolanga ku eza lika ze ba kona ku eza hande. Ku itukisezanga mitahisezo ya mwa simu ni ku nahana linzila za mo mu kona ku alabela lipuzo ku kona ku tusa bana ba  mina ku ba hahulu ni buikolwiso ha ba nze ba abana mwa likalulo ze shutana za musebezi wa ku kutaza Mubuso.—2 Tim. 2:15.

Hape mwa kona ku itukisezanga ka mo bana ba mina ba kona ku tiyela lisineneketo ze zwa kwa litaka za bona. Ka nako ya tuto ya lubasi, mwa kona ku itusisa kauhanyo 15 ya buka ya Young People Ask—Answers That Work, Volyumu 2. Kalulo ye li: “Peer-Pressure Planner” ye fa makepe 132 ni 133 i fa liakalezo mi hape i fa kolo ku mwanaa mina kuli a fe likalabo za lukuluhile ku bulela. Mubamba wo kwatasaa likepe 133 u susueza ba banca ku buhisana likalabo za bona ni bashemi ba bona kamba balikani ba bona ba ba hulile. Ka linako ze ñwi, mwa kona ku buhisananga likalabo za bana ba mina zeo ka Nako ya ku Lapela Sina Lubasi.

Nako ya ku Lapela Sina Lubasi i fa bashemi kolo ya ku koñomeka lituso ze fumanwa ka ku itomela likonkwani za kwa moya. Ka za taba ye, buka ya Young People Ask, Volyumu 2, i na ni litaba ze nde hahulu mwa kauhanyo 38 ye na ni toho ya taba ye li: “What Will I Do With My Life?” Ha mu nze mu nyakisisa kauhanyo ye, mu tuse mwanaa mina ku utwisisa kuli ku sebeleza Jehova mwa bupilo ki yona nzila ye nde ka ku fitisisa. Mu tuse mwanaa mina ku ba ni takazo ya ku eza bupaina, ku sebeleza fa Betele, ku kena Sikolo sa Tuto ya Bukombwa, kamba ku ndongwama likalulo ze ñwi za sebelezo ya nako kaufela.

Temuso: Bashemi ba bañwi ba ba na ni milelo ye minde ba isanga hahulu pilu ku se ba bata kuli mwanaa bona a eze ni ku libala ku itebuha ku za sweli ku eza ka nako yeo. Ki niti kuli, ki kwa butokwa ku susueza bana ba mina ku itomela likonkwani ze nde ze cwale ka sebelezo ya fa Betele ni musebezi wa bulumiwa. Kono ha mu nze mu eza cwalo, mu tokomele kuli ha mu halifisi mwanaa mina bakeñisa lika ze mu bata kuli a eze kamba ku mu zwafisa. (Makolo. 3:21) Mu hupulange kamita kuli mwanaa mina u swanela ku fita fa ku lata Jehova ka pilu ya hae isiñi ka pilu ya mina. (Mat. 22:37) Kacwalo, mu bate linzila za ku babaza mwanaa mina bakeñisa lika za sweli ku peta hande, mi mu ambuke moya wa ku isa hahulu mamelelo fa lika za sa ezi. Mu mu tuse ku itebuha lika kaufela za ezize Jehova. Kihona mu ka tuhelela mwanaa mina ku itebuha bunde bwa Jehova.

I be ye Tabisa

Kalulo ya bulalu ya butokwa ye kona ku tusa kuli Nako ya ku Lapela Sina Lubasi i be ye kondile, ki ku i bisa ye tabisa. Mu kona ku eza cwañi cwalo? Mwendi ka linako ze ñwi mwa kona ku teeleza ku ye ñwi ya madrama kamba ku buha ni ku buhisana ye ñwi ya mavidio a lukisizwe ki Lipaki za Jehova. Kamba mwa kona ku bala kalulo ya Bibele hamoho, ili ku abela yo muñwi ni yo muñwi kuli a bale manzwi a mutu yo muñwi ya mwa kalulo ya Bibele yeo ya mu bala.

Mwa limagazini za Tawala ya Mulibeleli ni Mu Zuhe!, ku na ni likalulo ze nde hahulu ze lu kona ku nyakisisa lubasi ka nako ya tuto. Ka mutala, mwa kona ku itusisa kalulo ye na ni toho ya taba ye li: “Mu Kona ku Alaba Cwañi?” ye banga fa likepe 31 la magazini ya Mu Zuhe! Mwa magazini ni magazini ya hatiso ya nyangela ya Tawala ya Mulibeleli ku banga ni taba ya tuto ye li: “Ku ba Banca.” Lituto ze, za cincananga ni litaba  ze lelezwi bashimani ni basizana ze na ni toho ya taba ye li: “Mu Lute Bana ba Mina.”

Litaba ze banga mwa kalulo ye li: “Ba Banca ba Buza Kuli” mwa magazini ya Mu Zuhe! hamoho ni buka ya Young People Ask, Volyumu 2 li ka tusa hahulu bashemi ba ba na ni bana ba ba saa nonoboka. Ha mu itusisa buka yeo, mu si ke mwa libala sikwenda se si li: “What Do You Think?” se si kwa mafelelezo a kauhanyo ni kauhanyo. Sikwenda seo ha si lundululi feela litaba ze mwa kauhanyo. Lipuzo ze mwa sikwenda seo zaa kona ku itusiswa sina sikuka sa puhisano ka nako ya tuto ya lubasi.

Kono mu tokomele kuli nako ya tuto ya lubasi hasi nako ya ku tosangisa bana mina. Ka mutala, mu si ke mwa hapeleza mwanaa mina ku bala ka ku tumusa litaba zaa ñozi fa makepe a na ni toho ya taba ye li: “My Journal” kamba ze fa likalulo ze ñwi fa tokwa ku ñola mwanaa mina litaba za ka butu. Fa taba ye li: “A Note to Parents,” buka i bulela cwana fa likepe 3: “Kuli mu susueze bana ba mina ba ba saa nonoboka ku ñola ka busepahali mwa buka ya bona, mu si ke mwa bata ku ziba litaba ze ba ñola. Hamulaho ba ka lukuluha ni ku mi taluseza ze ba ñozi.”

Ha mu ka zwelapili ku ezanga tuto kamita, ku i bisa ye tusa, ni ye tabisa, Jehova u ka fuyola hahulu buikatazo bwa mina. Nako ya butokwa ye ya ku ba hamoho ni lubasi i ka tusa kuli lubasi lwa mina lo mu lata lu zwelepili ku hula ni ku tiya kwa moya.

[Mbokisi fa likepe 31]

Mu Ezange Lika ze Nca

“Ha ne lu itutanga ni bana ba luna ba banyinyani ba basizana, bo muunaa ka ni na ne lu itukisezanga litaba ze ka itutiwa kwa mukopano wa puteho mi kihona cwale lu bulelela bana ba luna ku swanisa siswaniso sa litaba ze lu itutile. Fokuñwi ne lu ezanga papali ya litaba za mwa Bibele kamba ku itukiseza mitahisezo ya mwa sebelezo ya mwa simu. Ne lu itutanga litaba ze ne ba kona ku utwisisa ka ku ya ka buhulu bwa bona, ze nee ba tabisanga, ni ze ne ba ikola.”—Bo J.M. ba kwa United States.

“Kuli lu tuse mwanaa muituti wa ka wa Bibele ku utwisisa mo ne ku utwahalelanga ku itusisa miputo mwa nako ye nee ñolwa Bibele, ne lu hatisize buka ya Isaya hamulaho wa ku takula linombolo za likauhanyo ni litimana za yona. Ne lu ngungahanyize mapampili ni ku a tateza fa kakota. Kihona cwale mushimani yo a lika ku eza za naa ezize Jesu mwa Sinagoge mwa Nazareta. Taba ye kwa Luka 4:16-21 i kandeka kuli Jesu “a apula buka [ya Isaya] mi a fumana” kalulo ya naa bata. (Isaya 61:1, 2) Kono mushimani yo ha naa likile ku eza nto ye swana, ne ku mu bezi taata ku fumana Isaya 61 ka ku itusisa muputo o mutelele o si na linombolo za likauhanyo ni litimana. Ka ku komokiswa hahulu ki bunangu bwa Jesu bwa ku itusisa miputo, mushimani yo cwale a bulela kuli: ‘Jesu nee li sikwala luli!’”—Bo Y.T. ba kwa Japan.

[Siswaniso se si fa likepe 30]

Ku itukisezanga ku ka tusa bana ba mina ku tiyela lisineneketo ze zwa kwa litaka za bona

[Siswaniso se si fa likepe 31]

Mu like ka taata ku ezisa tukiso ya Nako ya ku Lapela Sina Lubasi ku ba ye tabisa