Mu Likanyise Jesu ka ku Luta ka Lilato

“Haisali, ha ku na mutu ya bulezi sina mutu yo.”—JOA. 7:46.

1. Batu ne ba ikutwile cwañi ka za mulutelo wa Jesu?

MU NAHANE feela mo ne ku tabiselize ku utwa Jesu ha nze a luta! Bibele i lu taluseza litaba ze ñwi ka za mwa naa amezi batu ba ne ba kopani ni yena. Ka mutala, Luka muñoli wa Evangeli, u kandeka kuli batu mwa munzi wa habo Jesu ne “ba komokile manzwi a musa a naa zwa mwa mulomo wa hae.” Mateu u biha kuli batu ba ne ba teelelize ku Jesu ha naa luta mwa Ngambolo ya fa Lilundu ne ba ‘komokile tuto ya hae.’ Mi Joani u talusa kuli mapolisa ba ne ba lumilwe ku yo tama Jesu, ne ba kutile mazoho-zoho, mi ne ba bulezi kuli: “Haisali, ha ku na mutu ya bulezi sina mutu yo.”—Luka 4:22; Mat. 7:28; Joa. 7:46.

2. Ki milutelo ye cwañi ya naa itusisize Jesu?

² Mapolisa bao ne ba bulezi niti. Ku si na ku kakanya, Jesu nee li Muluti yo mutuna ka ku fitisisa ya kile a pila. Naa luta ka ku utwahala, ka bunolo, mi naa luta litaba za niti ze sa konwi ku lwaniswa. Naa itusisize hande linguli ni lipuzo. Naa cincanga mulutelo wa hae ka ku ya ka batu ba naa ambola ni bona, ibe kuli nee li batu ba ba kutekeha kamba batu-tu feela. Litaba za niti za naa luta nee li ze bunolo ku utwisisa, kono ili ze tuna. Kono lika ze, ne si zona feela ze nee ezisize Jesu ku ba Muluti yo mutuna cwalo.

Lilato ki la Butokwa Hahulu

3. Ka ku ba muluti, Jesu naa shutana cwañi ni baeteleli ba bulapeli ba mwa miteñi ya hae?

³ Ku bonahala kuli mwahalaa bañoli ni Bafalisi ne ku na ni baana ba ba butali ba ne ba na ni zibo ye ñata ni bunangu bwa ku kona ku luta zibo yeo. Ki nto mañi ye nee tahisize kuli mulutelo wa Jesu u shutane hahulu ni wa bona? Baeteleli ba bulapeli ba mwa nako yeo ne ba si na lilato kwa batu-tu feela. Kono ne ba ba kenda, ni ku ba nga kuli ki batu ba ba “kutilwe.” (Joa. 7:49) Ka ku shutana ni bona, Jesu naa utwela makeke batu-tu feela, kakuli ne ba “katezi, ba hasani, inge lingu ze si na mulisana.” (Mat. 9:36) Ne li mutu ya silikani, ya utwela batu butuku, ni ya musa. Ku tuha fo, baeteleli ba bulapeli ne ba si na lilato la niti ku Mulimu. (Joa. 5:42) Kono Jesu naa lata Ndatahe mi naa tabela ku eza tato ya hae. Baeteleli ba bulapeli ne ba kopamisize manzwi a Mulimu kuli a lumelelane ni ze ne ba bata, kono Jesu naa lata “Linzwi la Mulimu,” naa li lutile, naa li talusize, naa li yemezi, mi naa pilile ka ku lumelelana ni lona. (Luka 11:28) Kaniti, lika kaufela za naa eza  Kreste naa li eza ka lilato, naa luta ka lilato, naa pilisana ni batu ka lilato, mi naa ba laela ka lilato.

4, 5. (a) Ki kabakalañi ha ku li kwa butokwa ku luta ka lilato? (b)  Ha lu luta, ki kabakalañi zibo ni bukwala bwa ku luta ha li li za butokwa hape?

⁴ Luna bo? Ka ku ba balateleli ba Kreste, lu lakaza ku mu likanyisa mwa bukombwa ni mwa bupilo bwa luna. (1 Pit. 2:21) Kacwalo, mulelo wa luna haki wa ku luta feela zibo ya mwa Bibele, kono hape ki wa ku bonisa tulemeno twa Jehova, sihulu lilato la hae. Ibe kuli lu na ni zibo ye tuna kamba ye nyinyani, ibe kuli lu ziba hahulu ku luta kamba hanyinyani feela, lilato le lu bonisa kwa batu be lu kutaza li ka lu tusa ku ba fita kwa lipilu. Kuli lu kone ku peta hande musebezi wa ku tahisa balutiwa, lu swanela ku likanyisa Jesu ka ku luta ka lilato.

⁵ Niteñi, kuli lu be baluti ba bande, lu tokwa ku ziba taba ye lu luta mi lu tokwa ku ba ni bukwala bwa ku i luta hande. Jesu naa tusize balutiwa ba hae ku ziba hande taba ye ba luta ni ku ba ni bukwala bwa ku i luta, mi Jehova ka kopano ya hae u lu tusa ku eza cwalo kacenu. (Mu bale Isaya 54:13; Luka 12:42.) Kono mulelo wa luna u swanela ku ba wa ku luta ka lipilu za luna kaufela isiñi ka minahano ya luna feela. Haiba lu ba ni zibo, lu luta ka bukwala, mi lu bonisa lilato kwa batu be lu kutaza, ze ka zwa mwateñi ikaba ze tabisa hahulu. Kono lu kona ku bonisa lilato ka linzila lifi ha lu luta? Jesu ni balutiwa ba hae ne ba ezize cwañi cwalo? Ha lu boneñi.

Lu Swanela ku Lata Jehova

6. Lu ambolanga cwañi ka za mutu ye lu lata?

⁶ Lu tabelanga ku ambola lika ze lu lata. Ha lu ambola ka za taba ye lu tabela hahulu, lu bulelanga ka mafulofulo mi muambolelo wa luna u bonisanga kuli lwa tabela taba yeo. Taba ye ki ya niti sihulu ha lu ambola za mutu ye lu lata. Hañata lu tabelanga hahulu ku kandekela ba bañwi ze lu ziba ka za mutu yo. Lwa mu colaulanga, ku mu lumbaeta, ni ku mu yemela. Lu ezanga cwalo bakeñisa kuli lu bata kuli ba bañwi ba tabele mutu yo ni tulemeno twa hae sina mo lu mu tabelela.

7. Lilato la Jesu la ku lata Mulimu, ne li mu susuelize ku ezañi?

⁷ Pili lu si ka tusa kale batu ba bañwi ku lata Jehova, luna ka sibili lu swanela ku mu ziba ni ku mu lata. Kakuli mane, bulapeli bwa niti bu tomile fa lilato la ku lata Mulimu. (Mat. 22:36-38) Jesu naa tomile mutala o munde. Naa latile Jehova ka pilu ya hae kaufela, ka munahano wa hae kaufela, ka moyo wa hae kaufela, ni ka maata a hae kaufela. Jesu naa zibile hande Ndatahe wa kwa lihalimu kakuli naa pilile ni yena lilimo ze ñata-ñata. Ki lifi ze nee zwile mwateñi? Jesu naa bulezi kuli: “Ni lata Ndate.” (Joa. 14:31) Jesu naa bonisize lilato leo mwa lika kaufela za naa bulela ni ku eza. Ne li mu susuezanga ku eza lika ze nee tabisa Mulimu ka nako kaufela. (Joa. 8:29) Ne li mu susuelize ku nyaza baeteleli ba bulapeli ba ne ba ipumisa ku yemela Mulimu. Hape ne li mu susuelize ku bulela ka za Jehova ni ku tusa ba bañwi ku ziba Mulimu ni ku mu lata.

8. Lilato la ku lata Mulimu ne li susuelize balutiwa ba Jesu ku ezañi?

⁸ Ka ku swana ni Jesu, balutiwa ba hae ba mwa miteñi ya baapositola ne ba latile Jehova, mi lilato leo ne li ba susuelize ku kutaza taba ye nde ka bundume ni ka tukufalelo. Niha ne ba lwaniswa ki baeteleli ba bulapeli ba ba maata, ne ba konile ku taza Jerusalema ka lituto za bona. Balutiwa bao ne ba sa koni ku tuhela ku bulela lika ze ne ba boni ni ze ne ba utwile. (Lik. 4:20; 5:28) Ne ba ziba kuli Jehova naa li ni bona ni kuli naa ka ba fuyola, mi naa ba fuyozi luli! Mi mane lilimo ze sa fiti fa 30 ku zwa fa lifu la Jesu, muapositola Paulusi naa konile ku ñola kuli taba ye nde ne se i kutalizwe “ku ba ba li teñi kaufela mwatasaa lihalimu.”—Makolo. 1:23.

9. Lu kona ku tiisa cwañi lilato la luna ku Mulimu?

⁹ Haiba lu bata ku ba baluti ba ba buanyu luli, ni luna lu tokwa ku bona teñi kuli lwa zwelapili ku tiisa lilato la luna ku Mulimu. Lu kona ku eza cwañi cwalo? Lu kona ku eza cwalo ka  ku ambolanga ni Mulimu hañata ka tapelo. Mi hape lu tiisa lilato la luna ku Mulimu ka ku ituta Linzwi la hae, ka ku bala lihatiso ze tomile fa Bibele, ni ka ku fumanehanga kwa mikopano ya Sikreste. Zibo ya ku ziba Mulimu ha i nze i hula, lipilu za luna li ka yubokiswa ki lilato la ku mu lata. Mi cwale ha lu nze lu bonisa lilato la luna ku Mulimu ka manzwi ni ka likezo, ba bañwi ba ka li bona mi ni bona ba ka susuezwa ku sutelela ku Jehova.—Mu bale Samu 104:33, 34.

Lu Swanela ku Lata ze lu Luta

10. Muluti yo munde kaufela u swanela ku ezañi?

¹⁰ Muluti yo munde kaufela u swanela ku lumela kuli za luta ki litaba za niti, li na ni tuso mi ki za butokwa. Haiba muluti wa tabela za luta, u ka bonisa mafulofulo, mi u ka susueza hahulu baa luta. Kono haiba haa tabeli luli zaa luta, u kona ku libelela cwañi kuli baituti ba hae ba nge lika zaa ba luta ku ba za butokwa? Mutala wa mina sina muluti wa Linzwi la Mulimu ki wa butokwa hahulu. Jesu naa bulezi kuli: “Mutu kaufela haa lutilwe hande, u ta swana ni muluti wa hae.”—Luka 6:40, Bibele ye Kenile, hatiso ya 1984.

11. Ki kabakalañi Jesu ha naa lata litaba za naa luta?

¹¹ Jesu naa lata za naa luta. Naa ziba kuli naa na ni nto ya butokwa ya ku bulelela batu, ili niti ka za Ndatahe wa kwa lihalimu, ona “manzwi a Mulimu” ni “manzwi a bupilo bo bu sa feli.” (Joa. 3:34; 6:68) Sina liseli le li benya, niti ya naa lutile Jesu ne i patuluzi lika ze maswe ni ku bonisa lika ze nde. Ne i imuluzi ni ku omba-omba batu ba ba ishuwa ba ne ba pumilwe ki baeteleli ba bulapeli ba buhata ni ba ne ba hatelezwi ki Diabulosi. (Lik. 10:38) Lilato la Jesu kwa litaba za niti li fumaneha mwa lituto za hae hamohocwalo ni mwa lika kaufela za naa ezize.

12. Muapositola Paulusi naa ikutwile cwañi ka za taba ye nde?

¹² Ka ku swana ni Jesu, balutiwa ba hae ne ba lata hahulu ni ku nga ka butokwa niti ka za Jehova ni Kreste, kuli mane balwanisi ba bona ne ba si ka kona ku ba palelwisa ku ikambota niti yeo ni ba bañwi. Paulusi naa ñolezi Bakreste ka yena ba ne ba pila mwa Roma kuli: “Haili na, ni itukiselize ku yoo bulela Evangeli . . . Kakuli ha ni swabeli Evangeli; kakuli ki maata a Mulimu a ku pilisa mutu ni mutu ya lumela.” (Maro. 1:15, 16) Paulusi naa nga kuli nee li tohonolo ku shaela litaba za niti. Naa ñozi kuli: “Sishemo seo si filwe na, . . . ki sa ku bulelela bamacaba bufumu bwa Kreste, bo bu sa konwi ku fumanwa butuna bwa bona.” (Maef. 3:8) Kwa iponahaza hande kuli Paulusi naa na ni cisehelo ye tuna ha naa nze a luta ba bañwi ka za Jehova ni milelo ya Hae.

13. Ki afi mabaka e lu na ni ona ha lu swanela ku lata taba ye nde?

¹³ Taba ye nde ye mwa Linzwi la Mulimu i lu konisa ku ziba Mubupi ni ku ba ni silikani se sinde ni yena. Taba ye nde yeo i lu fa likalabo ze utwahala kwa lipuzo za butokwa mwa bupilo mi i na ni maata a ku cinca bupilo bwa luna, ku lu fa sepo, ni ku lu tiisa ha lu li mwa matata. Hape i libisa kwa bupilo bo bunde bo bu si ke bwa fela. Ha ku na zibo ye nde hahulu kamba ya butokwa hahulu ku fita taba ye nde. Ki mpo ya butokwa hahulu ye lu filwe, ili ye lu tahiseza tabo ye tuna. Mi lu ba ni tabo ye tuna hahulu ha lu taluseza ba bañwi za mpo yeo.—Lik. 20:35.

14. Lu kona ku lata hahulu cwañi ze lu luta?

¹⁴ Mu kona ku ezañi kuli mu tiise lilato la mina la ku lata hahulu taba ye nde? Ha mu bala Linzwi la Mulimu, mu no kutumananga ka linako ze ñwi kuli mu yeye ze mu balile. Ka mutala, mu nahane kuli mu ya hamoho ni Jesu mwa bukombwa ha naa li fa lifasi kamba mu ya ni muapositola Paulusi mwa bukombwa. Mu nge kuli mu mwa lifasi le linca, mi mu nahane mo bu ka bela bupilo. Mu nahanisise limbuyoti ze mu fumani kabakala ku utwa taba ye nde. Haiba mu lata hahulu taba ye nde, batu be mu luta ba ka iponela lilato leo. Kacwalo he, lu swanela ku nahanisisanga ze lu itutile ni ku tokomela ze lu luta.—Mu bale 1 Timotea 4:15, 16.

 Lu Swanela ku Lata Batu

15. Ki kabakalañi muluti haa swanela ku lata baituti ba hae?

¹⁵ Muluti yo munde u tusanga baituti ba hae ku ikutwa ku lukuluha kuli ba tabele hahulu ze ba sweli ku ituta ni kuli ba tabele ku ambola fa litaba ze ba ituta. Muluti ya lata baituti ba hae u ba fanga zibo kakuli wa ba tokomela. U cincanga mulutelo wa hae ku likana ni buikoneli ni kutwisiso ya muituti ni muituti. Ha nze a luta, u talimanga fa buikoneli ni miinelo ya baituti ba hae. Haiba baluti ba ba ni lilato le li cwalo, baituti ba ka itemuhela lona, mi tuto ikaba ye tabisa ku muluti ni muituti.

16. Jesu naa bonisize lilato kwa batu ka linzila mañi?

¹⁶ Jesu naa bonisize lilato le li cwalo. Lilato le lituna la naa bonisize ne li la ku fana bupilo bwa hae bo bu petehile bwa butu ilikuli ba bañwi ba kone ku piliswa. (Joa. 15:13) Mwa bukombwa bwa hae, Jesu kamita naa iteekezi ku tusa batu ni ku ba luta ka za Ndatahe. Ku fita ku libelela batu kuli ba tahe ku yena, naa zamaile misipili ye mitelele ka mahutu inge a shaela taba ye nde kwa batu. (Mat. 4:23-25; Luka 8:1) Naa na ni pilutelele ni kutwisiso. Balutiwa ba hae ha ne ba tokwa ku sikululwa, naa ba sikulula ka lilato. (Mare. 9:33-37) Naa ba susuelize ka ku ba sepa kuli ne ba ka ba bakutazi ba taba ye nde ba ba buanyu. Ha ku na mutu ya kile a ba muluti ya lilato hahulu sina Jesu. Lilato la naa bonisize balutiwa ba hae ne li ba susuelize ku mu lata ni ku mamela litaelo za hae.—Mu bale Joani 14:15.

17. Balutiwa ba Jesu ne ba bonisize cwañi lilato ku ba bañwi?

¹⁷ Ka ku swana ni Jesu, balutiwa ba hae ne ba bonisize lilato kwa batu ba ne ba kutaza ku bona. Ka ku tiyela nyandiso ni ku sa saba lifu, ne ba sebelelize ba bañwi mi ne ba kondisize mwa musebezi wa ku kutaza taba ye nde. Ne ba latile hahulu batu ba ne ba amuhezi taba ye nde! Manzwi a muapositola Paulusi kaniti a bonisa lilato la naa na ni lona kwa batu, ha naa ñozi kuli: “Lwa ba ni musa mwahalaa mina; sina muanyisi mwaa babalelela bana ba hae ka lilato, ni luna cwalo, mwa ku mi shemuba, ne lu lakaza ku mi fa, isi Evangeli ya Mulimu feela, kono ni bona bupilo bwa luna; kakuli ki mina balatiwa ba luna luli.”—1 Mates. 2:7, 8.

18, 19. (a) Ki kabakalañi ha lu itatelanga ku eza buitomboli kuli lu pete musebezi wa ku kutaza? (b) Mu taluse mutala o bonisa kuli lilato le lu bonisanga la lemuhiwa ki ba bañwi.

¹⁸ Ka ku swana, mwa miteñi ye, Lipaki za Jehova ba kutaza mwa lifasi kamukana ili ku bata-bata batu ba ba nyolelwa ku ziba ni ku sebeleza Mulimu. Mane mwa lilimo ze 17 ze felile lu tandile lihola ze fitelela 1 bilioni ka silimo ni silimo mwa musebezi wa ku kutaza ni ku tahisa balutiwa, mi lu sa zwelapili ku eza musebezi wo. Lu kutazanga ka ku itatela nihaike kuli  musebezi wo wa ku kutaza u tokwa kuli lu itombole nako, maata, ni lika za luna. Ka ku swana ni Jesu, ni luna lwa ziba kuli Ndataa luna wa kwa lihalimu ya lilato u bata kuli batu ba fumane zibo ye isa kwa bupilo bo bu sa feli. (Joa. 17:3; 1 Tim. 2:3, 4) Lilato li lu susueza ku tusa batu ba lipilu ze nde kuli ba zibe ni ku lata Jehova sina luna.

¹⁹ Lilato le lu bonisanga la lemuhiwanga ki ba bañwi. Ka mutala, kaizeli wa paina wa kwa United States u ñolanga mañolo a ku omba-omba batu ba ba shwezwi ki balatiwa ba bona. Ha naa alabile, muuna yo muñwi naa ñozi kuli: “Kwa makalelo ne ni komokile kuli mutu wa kona ku ikataza cwalo ku ñola liñolo ni ku li lumela ku mutu yaa sa zibi kuli a mu tuse ku tiyela matata. Se ni kona ku bulela feela kikuli u na ni lilato kwa batu ba bañwi ni ku Mulimu ya susuezanga batu kuli ba eze cwalo.”

20. Ki kabakalañi ha ku li kwa butokwa ku luta ka lilato?

²⁰ Mutu yo muñwi a kile a bulela kuli haiba mutu a bonisa lilato ni bukwala, u ka kona ku peta ze tuna. Mwa musebezi wa luna wa ku luta, lu bata ku tusa baituti ba luna ku ziba hande Jehova ni ku mu lata. Kaniti, kuli lu be baluti ba ba buanyu lu tokwa lilato la mabonda a malalu, ili lilato la ku lata Mulimu, lilato la ku lata niti, ni lilato la ku lata batu. Ha lu nze lu hulisa lilato le li cwalo ni ku li bonisa mwa bukombwa bwa luna, lu ka ba ni tabo ye tiswa ki ku fana, mi hape lu ka ba ba ba tabile ka ku ziba kuli lu likanyisa Jesu mi lu tabisa Jehova.

Mu Kona ku Alaba Cwañi?

• Ha lu nze lu luta ba bañwi taba ye nde, ki kabakalañi ha ku li kwa butokwa ku . . .

lata Mulimu?

lata ze lu luta?

lata batu be lu luta?

[Lipuzo za Tuto]

[Siswaniso se si fa likepe 15]

Kiñi se ne si tahisize kuli mulutelo wa Jesu u shutane ni wa bañoli ni Bafalisi?

[Siswaniso se si fa likepe 18]

Kuli mutu a be muluti yo munde, u tokwa ku ba ni zibo, bukwala, mi sa butokwa ni ku fita, u swanela ku ba ni lilato