Mu Fumane Tabo Mwa Musebezi wa ku Luta Batu Kuli ba be Balutiwa
Mu Fumane Tabo Mwa Musebezi wa ku Luta Batu Kuli ba be Balutiwa
“Mu ye cwale, mu lute macaba.”—MAT. 28:19.
1-3. (a) Ba bañata ba ikutwa cwañi ka za ku zamaisa lituto za Bibele? (b) Lu ka nyakisisa lipuzo mañi?
KAIZELI yo muñwi ya sebelisana ni sikwata se si itusisa puo ya Sihindi mwa United States naa ñozi kuli: “Ni se ni itutile Bibele ni lubasi lo luñwi lwa kwa Pakistan ka lisunda ze 11 ze felile.” Kaizeli yo u zwelapili kuli: “Kacwalo lu bile balikani, mi ni enga-enga mioko ha ni hupula kuli lubasi lo, lu tuha lu kutela kwa Pakistan. Se si ni enga-engisa mioko hasi feela butuku bo ni utwa bwa kuli ha ni sa na ku tolanga ni bona kono hape ni nahana tabo ye ni bile ni yona ha ne ni nze ni ba luta ka za Jehova.”
2 Sina kaizeli yo, kana ni mina, mu kile mwa ba ni tabo ye tiswa ki ku ituta Bibele ni mutu yo muñwi? Jesu ni balutiwa ba hae ne ba fumani tabo ye tuna mwa musebezi wa ku luta batu kuli ba be balutiwa. Balutiwa ba 70 ba naa lutile Jesu ha ne ba kutile ni piho ye tabisa, Jesu ka sibili a “nyakalala ka Moya o Kenile.” (Luka 10:17-21) Ka ku swana, ba bañata kacenu ba fumana tabo ye tuna ka ku luta batu kuli ba be balutiwa. Bupaki bo bu bonisa cwalo ki bwa kuli mwa 2007, bahasanyi ba ba tabile ili ba ba sebeza ka taata, ne ba zamaisize lituto za Bibele ze 6,561,426 ka avareji, ka kweli ni kweli!
3 Kono bahasanyi ba bañwi, ha ba si ka zamaisa kale lituto za Bibele. Ba bañwi mwendi ha ba si ka zamaisa tuto i liñwi mwa lilimo za cwanoñu fa. Ki matata afi e lu kona ku kopana ni ona ha lu nze lu ikataza ku zamaisa tuto ya Bibele? Lu kona ku tula cwañi matata ao? Mi lu ka fumana mipuzo mañi ha lu eza mo lu konela kaufela ku mamela taelo ya Jesu ye li: “Mu ye cwale, mu lute macaba”?—Mat. 28:19.
Matata Aa Kona ku Lu Tokwisa Tabo
4, 5. (a) Batu ba bañata ba amuhela cwañi taba ye nde mwa libaka ze ñwi za lifasi? (b) Ki matata afi e ba kopani ni ona bahasanyi mwa libaka ze ñwi?
4 Mwa libaka ze ñwi za lifasi, batu ba amuhelanga libuka za luna ka tabo mi ba lakazanga ku ituta Bibele ni luna. Bo mutu ni musalaa hae ba bañwi ba kwa Australia ba ne ba sebeleza mwa Zambia ka swalelele ne ba ñozi kuli: “Lipiho ze lu utwanga ki za niti. Naha ya Zambia ki sibaka se sinde sa ku kutaleza. Ku fa bupaki mwa makululu kwa tabisa luli! Batu ba lu atumelanga, ba bañwi mane ba kupanga limagazini za likweli ze ñwi.” Mwa silimo se siñwi sa cwanoñu fa, mizwale ni likaizeli mwa Zambia ne ba zamaisize lituto za Bibele ze fitelela 200,000—fo kikuli, ka avareji, muhasanyi ni muhasanyi naa zamaisize lituto ze fitelela i liñwi.
5 Kono mwa libaka ze ñwi, bahasanyi mwendi ba fumana taata ku siyalisa libuka kwa batu ni ku zamaisa lituto za Bibele kamita. Ki kabakalañi? Hañata batu ha ba fumanehangi fa mandu muhasanyi ha ba potela, mi ba ba fumanehanga fa mandu mwendi ha ba na taba ni za bulapeli. Batu bao mwendi ba huliselizwe mwa mabasi aa sa lapeli kamba mwendi ba toile buipi bo bu iponahalela mwa bulapeli bwa buhata. Batu ba bañata ba katalisizwe ni ku hasanywa ki balisana ba buhata. (Mat. 9:36) Kabakaleo, batu ba ba cwalo ba kona ku zina-zina ku ambola ka za Bibele.
6. Ki matata afi e ba kopana ni ona bahasanyi ba bañwi?
6 Bahasanyi ba bañwi ba ba sepahala ba kopana ni butata bo buñwi bo bu kona ku ba tokwisa tabo. Nihaike kuli nako ye ñwi ne ba tukufalelwa musebezi wa ku luta batu kuli ba be balutiwa, cwale se ba paleliswa ki mapongo kamba matata a tiswa ki busupali. Hape ha mu nyakisise matata a mañwi e lu kona ku ipatiseza. Ka mutala, kana mu ikutwa kuli ha mu koni ku zamaisa tuto ya Bibele? Mwendi mu ikutwa sina mwa naa ikutwezi Mushe Jehova ha naa mu laezi ku yo ambola ni Faro. Mushe naa ize: “Mawe Mulena! na, ha ni mutu ya na ni bukwala kwa ku bulela, ni kwakale, nihaili cwanoñu.” (Ex. 4:10) Kwandaa ku ikalelwa kuli ha lu koni ku zamaisa tuto ya Bibele, lu kona ku ikalelwa kuli ha lu na ku kona ku tusa muituti kuli a eze zwelopili. Mwendi lu kona ku ikalelwa kuli mutu haa na ku ba mulutiwa kabakala kuli lu baluti ba ba si ka petahala. Kabakaleo, mwendi lu kona ku iketela ku sa zamaisa tuto ya Bibele kuli nto yeo i si ke ya ezahala ku luna. Lu kona ku tula cwañi matata ao?
Mu Lukise Pilu ya Mina
7. Ki nto mañi ye ne susuelize Jesu mwa bukombwa bwa hae?
7 Nto ya pili ki ku lukisa pilu ya luna. Jesu naa ize: “Mulomo wa mutu u buleliswa ki se si tezi mwa pilu.” (Luka 6:45) Ku iyakatwa za buiketo bwa ba bañwi ka pilu kaufela ne ku susuelize Jesu mwa bukombwa bwa hae. Ka mutala, ha naa boni kuli Majuda ka yena ne ba kauhanyizwe ku Mulimu, “a ba utwela butuku.” A bulelela balutiwa ba hae kuli: “Lukau ki lo lutuna . . . Mu lapele kihona Muñ’a lukau, kuli a lume babeleki mwa lukau lwa hae.”—Mat. 9:36-38.
8. (a) Lu lukela ku nahanisisañi? (b) Lu kona ku itutañi kwa manzwi a muituti yo muñwi wa Bibele?
8 Ha lu nze lu peta musebezi wa ku luta batu kuli ba be balutiwa, lu lukela ku nahanisisa mo lu tuselizwe kabakala mutu yo muñwi ya naa ikatalize ku ituta Bibele ni luna. Hape mu nahane za batu be lu ka kopana ni bona mwa bukombwa ni mo ba ka tusehela ka ku teeleza kwa lushango lo lu sweli ku zibahaza. Musali yo muñwi naa ñolezi kwa ofisi ya mutai ye mwa naha ya pila kuli: “Ni bata ku mi bulelela mo ni itebuhela Lipaki ba ba tahanga kwa ndu ya ka ku to ni luta. Na ziba kuli fokuñwi ba tokwa ku ni nyemelanga kakuli ni na ni lipuzo ze ñata mi hañata ni ba celanga nako. Kono ba ni ezanga ka pilu-telele mi ba tabela ku ni luta lika ze ba itutile. Ni itebuha ku Jehova ni ku Jesu kuli ni fumani batu ba, mwa bupilo bwa ka.”
9. Jesu naa isize pilu kwañi, mi lu kona ku mu likanyisa cwañi?
9 Niti kikuli, ne si batu kaufela ba ne ba amuhezi lituto za Jesu. (Mat. 23:37) Ba bañwi ne ba mu latelezi ka nakonyana mi ba hana lituto za hae ni ku “tuhela ku mu latelela.” (Joa. 6:66) Kono Jesu naa si ka ikutwa kuli lushango lwa hae ne si lwa butokwa kabakala kuli ba bañwi ne ba si ka amuhela lituto za hae. Nihaike kuli buñata bwa peu ya naa cezi ne i si ka beya siselo, Jesu naa isize pilu kwa bunde bwa naa eza. Naa boni kuli masimu ne a buzwize, ne a libelezwi ku kutulwa, mi naa fumani tabo ye tuna ka ku tusa mwa musebezi wa ku kutula wo. (Mu bale Joani. 4:35, 36.) Ku fita ku ikutwa feela kuli kalulo ya luna ya simu ha i tahisi siselo, kana ni luna lwa kona ku isa pilu kwa ku kutula ni ku libelela siselo? Ha lu nyakisiseñi mo lu kona ku ezeza cwalo.
Mu Cale ka Mulelo wa ku Kutula
10, 11. Mu kona ku ezañi kuli mu zwelepili ku ba ni tabo?
10 Mulimi u calanga peu kuli a kutule lukau. Ka ku swana, lu tokwa ku kutaza kuli lu kalise lituto za Bibele. Kono ku cwañi haiba mu tandanga nako ye ñata mwa bukombwa kono mu fumana batu ba sikai fa ndu kamba mu ipona kuli ha mu koni ku bonana hape ni ba misipili ya makutisezo ya mina? Muinelo wo wa kona ku mi nyefisa luli. Kana mu lukela ku itulela ku kutaza fa ndu ni ndu? Ku tokwa! Batu ba bañata ba sa potelwa lwa pili ka ona mukutalezo wo, o se u itusisizwe ka nako ye telele.
11 Kono kuli mu zwelepili ku ba ni tabo, kana ha mu koni ku ekeza kwa mikutalezo ya mina, mwendi ili ka ku itusisa linzila ze ñwi za ku fita kwa batu? Ka mutala, kana mu likile ku kutaza kwa batu mwa makululu kamba mwa libaka za bona za mubeleko? Kuli ha mu koni ku kutaza ka luwaile kamba ka ku nga linombolo za mawaile a be mu ambozi kale ni bona ka za Mubuso kuli mu ba lizeze hasamulaho? Ka ku tundamena mwa bukombwa bwa mina ni ku cinca-cinca mikutalezo ya mina, mu ka ba ni tabo ya ku fumana batu ba ba ka amuhela taba ye nde ya Mubuso.
Mwa ku Ezeza Haiba Mu Sa Isezwi Pilu
12. Lu kona ku ezañi haiba ba bañata mwa kalulo ya luna ya simu ha ba na taba ni za bulapeli?
12 Ku cwañi haiba ba bañata mwa kalulo ya mina ya simu ha ba na taba ni za bulapeli? Kana mwa kona ku kalisa puhisano ni bona ka ku bulela nto ye ñwi ye ka ba fita kwa pilu? Muapositola Paulusi naa ñolezi Bakreste ka yena ba mwa Korinte kuli: “Kwa Majuda ni ikezize inge ni Mujuda . . . Ku ba ba si na Mulao, ni ikezize inge ha ni na Mulao niha ni si ya si na mulao ku Mulimu.” Ki kabakalañi Paulusi ha naa ezize cwalo? Naa ize: “Ni ikezize linto kaufela, kuli ni pilise ba bañwi.” (1 Makor. 9:20-22) Kana ni luna lwa kona ku fumana litaba ze ba tabela ba mwa kalulo ya luna ya simu ili ze lu kona ku ambola ni bona? Batu ba bañata ba ba sa lapeli ba bata ku kondisa bupilo bwa mwa mabasi a bona. Mwendi mane ba sweli ku bata mulelo wa bupilo. Kana lwa kona ku fitisa taba ya Mubuso kwa batu ba ba cwalo ka nzila ye ka ba fita kwa pilu?
13, 14. Lu ka kona ku ekeza cwañi kwa tabo ye lu fumana mwa musebezi wa ku luta batu kuli ba be balutiwa?
13 Bahasanyi ba bañata ba ekelize kwa tabo ye ba fumana mwa musebezi wa ku luta batu kuli ba be balutiwa, nihaiba mwa libaka mo batu ba bañata ba bonahala ku sa tabela. Ka mukwa ufi? Ka ku ituta puo i sili. Bo muuna ni musalaa hae ba ba matela mwa lilimo za ma-60 ne ba lemuhile kuli baituti ba Machaina ba bañata-ñata ni mabasi a bona ne ba pila mwa kalulo ya simu ya puteho ya bona. Ba baana ba li, “Kabakaleo, ne lu susuelizwe ku ituta Sichaina.” Ba zwelapili ku bulela kuli, “Nihaike kuli ku eza cwalo ne ku tokwa ku tanda nako ka zazi ni zazi i nze lu ituta puo yeo, ne lu itutile Bibele ni Machaina ba bañata mwa kalulo ya luna ya simu.”
14 Niha mu sa koni ku ituta puo i sili, mwa kona ku itusisa hande bukanyana ya Good News for People of All Nations ha mu kopana ni ba ba bulela puo i sili. Hape mwa kona ku fumana libuka ze mwa puo ya batu be mu kopana ni bona mwa simu. Ki niti, mu tokwa ku ikataza ni ku tanda nako ye ñata kuli mu ambolisane ni ba ba bulela puo i sili kamba ba sizo si sili. Kono mu si ke mwa libala sikuka se si mwa Linzwi la Mulimu, se si li: “Ya cala hahulu u ka kutula hahulu.”—2 Makor. 9:6.
Puteho Mutumbi Ya Swanela ku Tusa
15, 16. (a) Ki kabakalañi puteho mutumbi ha i swanela ku tusa mwa musebezi wa ku luta batu kuli ba be balutiwa? (b) Basupali ba eza musebezi mañi wa butokwa?
15 Kaniti, ku luta batu kuli ba be balutiwa ha ku si ka itinga fa buikatazo bwa mutu a li muñwi. Kono ki puteho mutumbi ye tusa mwa musebezi wo. Ki kabakalañi? Jesu naa ize: “Se ba ka ziba batu kaufela kuli mu balutiwa ba ka ka sona, ki ha mu latana.” (Joa. 13:35) Mi kaniti, baituti ba Bibele ha ba fumaneha kwa mikopano, hañata ba susumezwanga ki lilato le li boniswanga kwa mikopano ya luna. Muituti yo muñwi naa ñozi kuli: “Ni ikolanga hahulu ku fumaneha kwa mikopano. Batu ba ni amuhelanga luli!” Jesu naa bulezi kuli ba ba ka ba balateleli ba hae ba kona ku lwaniswa ki mabasi a bona kwa neku la nama. (Mu bale Mateu 10:35-37.) Kono naa sepisize kuli mwa puteho ne ba ka fumana “banabahabo, ni likaizeli, ni bo-m’a bona, ni bana” ba bañata kwa neku la moya.—Mare. 10:30.
16 Mizwale ni likaizeli ba luna ba basupali sihulu ba eza musebezi wa butokwa wa ku tusa baituti ba Bibele ku eza zwelopili. Ba eza cwañi cwalo? Nihaike kuli basupali ba bañwi ha ba koni ku zamaisa tuto ya Bibele, likalabo za bona ze yahisa kwa mikopano ya puteho li tiisa tumelo ya bote ba ba teeleza ku bona. “Mizamao ye lukile” ya bona i ekeza kwa bunde bwa puteho mi i hohela batu ba lipilu ze sepahala kwa kopano ya Mulimu.—Liprov. 16:31.
Ze Lu Kona ku Eza Haiba Lu Ikalelwa
17. Lu kona ku ezañi haiba lu ikutwa kuli ha lu koni ku zamaisa tuto ya Bibele?
17 Mu kona ku ezañi haiba mu ikutwa kuli ha mu koni ku zamaisa tuto ya Bibele? Mu hupule kuli Jehova naa tusize Mushe ka ku mu fa moya o kenile ni muhulwanaa hae Aruni. (Ex. 4:10-17) Jesu naa sepisize kuli moya wa Mulimu u ka lu tusa mwa musebezi wa luna wa ku kutaza. (Lik. 1:8) Hape Jesu naa lumile batu ku yo kutaza ka bubeli, ka bubeli. (Luka 10:1) Kacwalo, haiba mu fumana taata ku zamaisa tuto ya Bibele, mu kupe moya wa Mulimu mwa tapelo kuli u mi fe butali mi kihona mu ka ya mwa bukombwa ni muhasanyi yo muñwi ya ka mi tiisa ili ya kona ku mi tusa ka yeloseli ya hae. Kwa tiisa tumelo ku hupula kuli Jehova u ketile ku itusisa batu-tu feela—“ze fokola za lifasi”—kuli a pete musebezi wo o mutuna.—1 Makor. 1:26-29.
18. Lu kona ku ezañi haiba lu ikutwa kuli ha lu na ku kona ku tusa muituti wa luna kuli a be mulutiwa?
18 Lu kona ku ezañi haiba lu ikalelwa kuli ha lu na ku kona ku tusa muituti wa Bibele kuli a be mulutiwa? Lu swanela ku hupula kuli Jehova u peta kalulo ya butokwa ka ku fitisisa, yona ya ku hohela mutu yo ku yena. (Joa. 6:44) Luna ni ba bañwi mwa puteho lu eza mo lu konela kaufela ku luta ka bukwala kuli lu tuse muituti ku eza zwelopili. (Mu bale 2 Timotea 2:15.) Mi muituti u tokwa ku sebelisa za ituta. (Mat. 7:24-27) Haiba mutu a itulela ku ituta Bibele, nto yeo ya kona ku lu zwafisa. Lu bata kuli baituti ba Bibele kaufela ba eze keto ye nde, kono mañi ni mañi u na ni ku “ikalabela ku Mulimu, ka za hae.”—Maro. 14:12.
Ki Ifi Mipuzo Ye Lu Ka Fumana?
19-21. (a) Lu ka tusiwa cwañi haiba lu zamaisa lituto za Bibele? (b) Jehova u nga cwañi ba ba kutaza taba ye nde?
19 Ku zamaisa lituto za Bibele ku lu tusa ku bata pili za Mubuso. Hape ku suña lituto za niti za Linzwi la Mulimu mwa munahano ni mwa pilu ya luna. Ki kabakalañi ha ku li cwalo? Paina wa libizo la Barak u talusa kuli: “Ku zamaisa lituto za Bibele ku tusa mutu ku ba muituti yo munde wa Linzwi la Mulimu. Ni lemuhile kuli ni tokwa ku ikolwisisa ka ze ni lumela pili ni si ka luta kale mutu yo muñwi.”
20 Haiba ha mu zamaisi tuto ya Bibele, kana fo ku talusa kuli sebelezo ya mina ha i na tuso ku Mulimu? Ku tokwa! Jehova u itebuha hahulu buikatazo bwa luna mwa ku mu lumbeka. Batu kaufela ba ba kutaza taba ye nde “ba sebeza ni Mulimu.” Kono ku zamaisa tuto ya Bibele ku ekeza kwa tabo ya luna ha lu nze lu bona Mulimu mwa koniseza peu ye ne lu cezi kuli i hule. (1 Makor. 3:6, 9) Paina ya bizwa Amy u li, “Ha mu bona muituti wa Bibele i nze a zwelapili, mu itebuhe hahulu ku Jehova kabakala ku itusiswa ki yena kuli mu fe mutu yo mpo ye nde—yona kolo ya ku ziba Jehova ni ya ku fumana bupilo bo bu sa feli.”
21 Ku eza mo lu konela kaufela ku kalisa ni ku zamaisa lituto za Bibele ku ka lu tusa ku isa pilu kwa ku sebeleza Mulimu cwale mi ku ka tiisa sepo ya luna ya ku punyuha ni ku kena mwa lifasi le linca. Ka tuso ya Jehova, hape lwa kona ku pilisa ba ba lu teeleza. (Mu bale 1 Timotea 4:16.) Yeo ki taba ye kona ku tabisa luli!
Kana Mwa Hupula?
• Ki matata afi a kona ku palelwisa ba bañwi ku zamaisa lituto za Bibele?
• Lu kona ku ezañi haiba batu ba bañata mwa kalulo ya luna ya simu ba bonahala ku sa tabela?
• Lu fumana mipuzo mañi ha lu zamaisa tuto ya Bibele?
[Lipuzo za Tuto]
[Siswaniso se si fa likepe 9]
Kana mwa ekeza kwa mikutalezo ya mina ilikuli mu fumane batu ba lipilu ze sepahala?