Kana Mwa Hupula?

Kana mu ikozi ku bala limagazini za cwanoñu fa za Tawala ya Mulibeleli? Mu like ku alaba lipuzo ze latelela:

• Banna ba ba butali ne ba potezi lili Jesu?

Bibele ye ñwi i talusa kuli: “Banuhi ba linaleli ne ba si ka fumana Jesu mwa sicelo sa limunanu sina mo ne ku bezi kwa balisana. Ne ba tilo mu potela hamulaho wa nako.” Ka nako yeo Jesu na li “mwana” mi na pila mwa ndu. (Mat. 2:7-11) Kambe Jesu na filwe gauda ni limpo ze ñwi za butokwa fa busihu bwa pepwa, kana Maria na ka be a file fela tunyunywani to tubeli sina sitabelo sa ku cisa kwa tempele, mazazi a 40 hasamulaho wa fo?—1/1, likepe 31.

• Ki lika mañi ze ba kona ku eza ba bañata kuli ba be ni tabo mwa bupilo?

Mutu u kona ku buza kuli: ‘Kana na kona ku cinca miinelo ya ka ni ku nolofaza mupilelo wa ka?’ Bo Amy ne ba ezize cwalo. Ne ba fumile kono ne ba si na tabo. Ba lemuha kuli ne ba batile ku keluha mwa tumelo kabakala ku ndongwama misebezi ya lifasi le. Kacwalo, ba ikatulela ku beya za Mubuso mwa sibaka sa pili mwa bupilo bwa bona mi ba eza bupaina ka nakonyana. Bo Amy ba li: “Cwale se ni na ni tabo ye tuna ku fita ye ne ni na ni yona ha ne ni belekela lifasi.”—1/15, likepe 19.

• Kiñi ze kona ku tusa basali ba bañwi ku ba ni tabo?

Ku na ni basali ba bañata ba ba beleka. Ba bañwi ba eza cwalo kuli ba fumane mali a ku leka lika ze tokwahala mwa lubasi, mi ba bañwi bona ba beleka ka mulelo wa ku itusisa pene ya bona mo ba batela kaufela kamba kuli ba leke lika ze ñwi za simbombo. Hape ba bañwi ba beleka kakuli ba ikola mubeleko wa bona. Basali ba Sikreste ba peta musebezi wa butokwa fa lapa—sihulu mwanana ha sa li mbututu. Ba bañwi ba kusufalize linako za ku ya kwa mubeleko kamba mane ku tuhela fela ku beleka ilikuli ba babalele hande lubasi, mi ka ku eza cwalo ba fumana tabo ye tuna.—4/1, makepe 26-29.

• Ki lufi “lusika” lwa na talusa Jesu ha na bulezi mazwi a ñozwi kwa Mateu 24:34?

Jesu hañata na itusisanga linzwi la “lusika” ka ku nyaza ha na bulela kwa batu ba ba maswe kamba ha na bulela ka za bona. Kono na si ka itusisa lona cwalo ha na bulela kwa balutiwa ba hae, ba ne ba tuha ba toziwa ka moya o kenile. Mi balutiwa ba hae bao ne li bona ba ne ba ka kona ku utwisisa hande manzwi a ñozwi kwa Mateu 24:32, 33. Kacwalo ku bonahala kuli Jesu na talusa balateleli ba hae ba ba tozizwe, ili ba mwa miteñi ya hae ni ba mwa miteñi ya luna ye.—2/15, makepe 23-24.

• Mulao no bile cwañi muhulisi, sina mo ku bulelezwi kwa Magalata 3:24?

Hañata muhulisi wa kwaikale na li mutanga ya sepahala ya na na ni buikalabelo bwa ku sileleza mwana ni ku bona teñi kuli wa latelela za bata ndat’ahe. Ka nzila ye swana, Mulao ne u tusize Majuda kuli ba si ke ba kukuezwa ku eza ze maswe, inge cwalo ku nyalelana ni bahedeni. Kono sina muhulisi wa mwana, Mulao ne u li wa nakonyana fela, o no sebelize ku fitela Kreste a taha.—4/1, makepe 18-21.

• Ka ku ya ka Jakobo 3:17, ki tulemeno tufi to lu swanela ku bonisa?

Ka ku ba batu ba ba kenile, lu swanela ku hana kapili-pili ku eza lika ze maswe. (Gen. 39:7-9) Hape lu swanela ku lata kozo, ili ka ku ambuka mabifi kamba likezo ze kona ku shandaula kozo. Kacwalo mañi ni mañi wa ku luna u swanela ku ipuza kuli: ‘Kana ni zibahala sina mutu ya batiseza ba bañwi kozo kamba mutu ya shandaula kozo? Kana ni shelananga ni ba bañwi nako ni nako? Kana ni wa kacima-cima kamba ni fosa-foseza hahulu ba bañwi? Kamba kana na swalelanga ba bañwi kapili ni ku sa pihelela kuli lika li ezwe mo ni batela?’—3/15, makepe 24-25.

• Ki kabakalañi Jesu ha na folisize munna wa sibofu hanyinyani-hanyinyani? (Mareka 8:22-26)

Ku bonahala kuli Jesu na ezize cwalo kabakala ku shwela munna yo makeke. Ku tutubulula hanyinyani-hanyinyani meto a munna yo ya na twaezi lififi ka nako ye telele, ku swanela ku ba kuli ne ku mu tusize ku twaela liseli hanyinyani-hanyinyani.—2/15, likepe 29.