Mu Itute kwa Mafosisa a Maisilaele

MAISILAELE ne ba ziba za na tokwa Jehova kuli ba eze ha ne ba kena mwa Naha ya Sepiso. Mulimu na ba laezi ka Mushe kuli: “Mu ka lelekisa kaufela ba ba yahile mwa naha ye fapil’a mina, mu tube maswaniso a bona a macwe kaufela, ni maswaniso a bona a’ suluzwi kaufela, mi mu sinye mabaka a bona a pahami.”—Num. 33:52.

Sicaba sa Isilaele ne si laezwi ku sa iswala bulikani ni bayahi ba naha, ni ku sa nyalelana ni bona. (Deut. 7:2, 3) Mane, sicaba sa Mulimu seo se si ketilwe ne si lemusizwe kuli: “U itemuhele, mi u si ke wa iswala bulikani ni ba ba yahile mwa naha k’o ya, bu ku fetuhele katwa.” (Ex. 34:12) Kono Maisilaele ne ba si ka utwa Mulimu mi ba swaseha mwa katwa kao. Ki lika mañi ze ne tisize kuli ba swasehe mwa katwa kao? Mi lu kona ku itutañi ku ze ne ezahezi ku bona?—1 Makor. 10:11.

Ne Ba Twaelani ni Batu ba Naha mi Ba Kala ku Lapela Milimu ya Maswaniso

Ha ne ba kena mwa Naha ya Sepiso, Maisilaele ne ba tuzi bayahi ba yona kwa makalelo. Nihakulicwalo, bana ba Isilaele ne ba palezwi ku mamela litaelo za Mulimu ka ku tala. Ne ba si ka lelekisa lila za bona mwa naha. (Baat. 1:1–2:10) Ku fita ku eza cwalo, Maisilaele ba yaha ni “macaba a 7” a na pila mwa naha, mi bakeñisa ku kopana kamita ni batu ba macaba ao, ba iswala bulikani ni ona. (Deut. 7:1) Seo ne si amile cwañi Maisilaele? Bibele i li: “Ba nga bana ba basizana ba macaba ao ku ba nyala, mi ba fa bana ba bona ba bashimani bana ba bona tota ba basizana; mi ba sebeleza milimu ya bona. Bana ba Isilaele ba eza ze maswe mwa meto a [Muñ’a] Bupilo, mi ba libala [Muñ’a] Bupilo Mulimu wa bona, ba sebeleza bo Baale ni bo Ashitaroti.” (Baat. 3:5-7) Ku twaelana ni bayahi ba naha ne ku tisize kuli Maisilaele ba nyalelane ni bona ni ku lapela ni milimu ya bona ya maswaniso. Ha se ba nyalelani ni batu ba naha, ne se ku bonahala  kuli Maisilaele ne ba si ke ba kona ku lundula bahedeni bao mwa naha. Bulapeli bwa niti bwa silafazwa mi Maisilaele ka sibili ba kala ku sebeleza milimu ya buhata.

Bakeñisa kuli bayahi ba Naha ya Sepiso ne se ba li balikani ba Maisilaele, ba tahisa kozi ye tuna ya kwa moya kwa Maisilaele ku fita mo ne ku inezi ha ne ba li fela lila za bona. Ha lu nyakisiseñi nzila ye ñwi ya mo ne bu silafalelizwe bulapeli bwa Maisilaele.

Njimo I Tahisa Kuli Maisilaele Ba Lapele Baale

Ha se ba keni mwa Naha ya Sepiso, bana ba Isilaele ba tuhela ku pila bupilo bwa ku yambaela mi ba bañata ba kalisa njimo. Milimelo ye ne ba latelela Maisilaele mwendi ne i swana ni ya Makanana. Kono ku bonahala kuli kwand’a milimelo fela, Maisilaele ne ba latelezi mikwa ye miñwi ya Makanana. Ne ba amuhezi ni litumelo za Makanana ze ama njimo kabakala ku twaelana ni bona.

Makanana ne ba lapela bo Baale ba bañata—ili milimu ye ne ngiwa kuli ne i nunisa mubu. Kwand’a ku lima ni ku kutula lukau, Maisilaele kwa nalulelule ba kala ku lapela milimu ya Makanana kuli ki yona ye tahisa lukau lo lutuna. Ka nzila yeo, ba bañata mwa Isilaele ne ba ipumisa kuli ne ba lapela Jehova kono niti kikuli ne ba li bakwenuheli luli.

Tuto Ye Tuna Ye Lu Ituta Kacenu

Ku bonahala kuli Maisilaele ha ne ba kopani lwa pili ni batu ba Naha ya Sepiso, ne ba si na milelo ya ku ikenya mwa bulapeli bwa Baale ni mwa buhule bwa bulapeli bo. Kono ku twaelana ni bona ne ku tisize kuli ba kale ku lapela Baale. Kana ni luna ha lu swaneli ku libelela butata bo bu swana haiba lu twaelana ni batu ba ba bonahala ku ba ni silikani kono ili ba ba sa lateleli litumelo ni likuka za Sikreste ze swana ni za luna? Ki niti kuli fokuñwi lu kana lwa tokwa ku swalisana ni batu ba ba sa lapeli kwa mubeleko, kwa sikolo, kamba mane kwa ndu. Kono ze ne ezahezi kwa Maisilaele ki temuso ku luna ya kuli lu ka itabulela fela matata haiba lu bata ku twaelana ni batu ba ba cwalo. Mi ki niti luli Bibele ha i bulela kuli: “Litwaelano ze maswe li sinya mikwa ye minde.”—1 Makor. 15:33.

Kacenu lu kopana ni miliko ye miñata ye swana ni ye ne ba kopani ni yona Maisilaele. Mwa miteñi ye ku na ni lika ze ñata ze ngiwa ki nyangela kuli ki milimu. Lika zeo li kopanyeleza masheleñi, batu ba ba ile libubo fa TV kamba mwa lipapali, ba lipuso za bupolitiki, ba bahulu ba bulapeli ba bañwi, mane ni ba mwa lubasi. Haiba lu sa mameli, lu kana lwa nga lika zeo kamba batu bao ku ba bona ba butokwa hahulu mwa bupilo bwa luna. Ku itama bulikani ni batu ba ba sa lati Jehova ku kona ku lu bulaisa fela kwa moya.

Buhule ne li kalulo ye tuna ya bulapeli bwa Baale ye ne bile lilaba kwa Maisilaele. Batu ba Mulimu ba bañwi ba sa swasiwa mwa lilaba le li swana kacenu. Ka mutala, ka ku sebelisa kompyuta kwa mukunda, inge cwalo mwa ndu, mutu ya si na maseme wa kona ku buha lika ze maswe fa Intaneti ze kona ku sinya lizwalo la hae le linde. Neikaba bumai Mukreste ha na ka pumiwa ki pilu ya hae kuli a buhe maswaniso a mapunu fa Intaneti!

“Ba Filwe Mbuyoti Ba Ba Tokomela Likelezo za Hae”

Ku iketela ku utwa Jehova kamba ku sa mu utwa muta lu keta balikani ku itingile ku luna. (Deut. 30:19, 20) Kacwalo lu tokwa ku ipuza kuli: ‘Ki bomañi bo ni inanga ni bona ha ni itabisa? Muzamao wa bona u cwañi? Kana ba lapela Jehova? Kana ku ina mwa siango sa bona ku ka ni tusa ku ba Mukreste yo munde?’

Walisamu na opezi kuli: “Ba filwe mbuyoti ba ba zamaya ka busepahali, ba ba ya ka mulao wa [Muñ’a] Bupilo. Ba filwe mbuyoti ba ba tokomela likelezo za hae, ba ba mu batisisa ka lipilu za bona kaufela.” (Samu 119:1, 2) Kaniti “mbuyoti i fiwa mutu ya saba [Muñ’a] Bupilo, ya zamaya mwa linzila za hae.” (Samu 128:1) Muta lu keta balikani, lu itute kwa mafosisa a Maisilaele ni ku utwa Jehova ku feleleza.—Liprov. 13:20.

[Siswaniso se si fa likepe 26]

Ku twaelana ni ba ba sa lati Jehova ku kona ku tahisa kuli lu lapele milimu ya maswaniso