Ku Pepwa kwa Jesu—ku Tisa Cwañi Kozo?

ZIBISO ya kuli ‘kozo i be teñi kwa batu ba ba latwa’ ne si yona fela ye ne polofita za ku pepwa kwa Jesu. Kwanda za n’a zibisize mangeloi kwa balisana ba ne ba ikomokezi, linumwana za lihalimu zeo ne li fitisize mashango a Mulimu a kuli Jesu na ka pepwa ki Maria ni munn’a hae Josefa. Ku nyakisisa ona mashango ao ku ka lu tusa ku ba ni kutwisiso ye tungile ka za ku pepwa kwa Jesu ni ku utwisisa butokwa luli bwa sepiso ya mangeloi ya kuli kozo i ka ba teñi kwa batu.

Bibele i bonisa kuli Maria na kile a potelwa ki lingeloi le li bizwa Gabriele pili Jesu a si ka pepwa kale mi mane ni yena Maria a si ka itwala kale. Lingeloi leo ne li mu lumelisize kuli, “u lumele wena ya filwe sishemo, Mulena u na ni wena.” Sina mo mu kona ku nahanela ni mina, Maria na komokile hahulu mi mwendi na sabile hanyinyani. Tumeliso yeo ne i talusañi?

Gabriele na talusize kuli: “Bona, u ka ba fa mezi a manca, u pepe mwan’a mushimani, mi u ka mu beya libizo la Jesu. Yena u ka ba yo mutuna, a bizwe Mwana wa Muambakani-ya-Pahami, mi Mulena u ka mu fa situlo sa bulena sa Davida, ndat’ahe. U ka busa ba ndu ya Jakobo ku ya ku ile; mi bulena bwa hae ha bu na ku fela.” Maria na buzize kuli ku kona ku ba cwañi cwalo kakuli yena ka ku ba mwalyanjo, na sa zibi munna. Gabriele na mu alabile kuli na ka itwala mwana yo ka tuso ya moya o kenile wa Mulimu. Mwana yo luli na ka ba ya ipitezi.—Luka 1:28-35.

Mulena Ya Na Polofitilwe

Manzwi a na bulezi Gabriele a swanela ku ba a na tusize Maria ku utwisisa kuli mwana ya na ka pepwa, ki yena ya na bulezwi mwa bupolofita bwa kwaikale. Ku talusezwa kuli Jehova na ka fa mwan’a Maria “situlo sa bulena sa Davida, ndat’ahe” ne ku kana kwa hupulisa Maria, kamba mane Mujuda kaufela ya na tekelezi Mañolo, ku nahana za sepiso ya Mulimu ku Mulena Davida wa Isilaele.

Ka mupolofita Natani, Jehova na bulelezi Davida kuli: “Lusika lwa hao, ni mubuso wa hao, li ka na li tiya fapil’a hao ku ya ku ile, ni lubona lwa hao lu ka tiya ku ya ku ile.” (2 Samuele 7:4, 16) Ka za Davida, Jehova na ize: “Ni ka eza kuli lusika lwa hae lu si ke lwa fela, lubona lwa hae lu tiye ka mazazi, sina mahalimu. Lusika lwa hae lu ka ina ku ya ku ile; lubona lwa hae lu ka na lu ba teñi sina lizazi fapil’a ka.” (Samu 89:20, 29, 35, 36) Kacwalo ne ku si ka ikezahalela fela kuli bo Maria ni Josefa ba simuluhe mwa lusika lwa Davida.

Bo ne si bona fela bupolofita bu nosi bo ne bu fumaneha mwa Mañolo a Siheberu bwa za mwan’a silena wa Davida. Maria hape mwendi na izibela bupolofita bwa Isaya bo bu li: “Lu pepezwi mwana, lu filwe wa mushimani: Bulena bu ka bewa fa liheta la hae; mi u ka bizwa Ya Babazwa, Muelezi, Mulimu ya Mata, Ndate wa kamita, Mulena wa Kozo. U ka hulisa mubuso, ni ku tiisa kozo ye sa feli mwa lubona lwa Davida ni mwa mubuso wa hae; u ka u zamaisa ni ku u tiisa ka likatulo ni ka mulao, cwale, ni ku ya ku ile. Ki sona s’a tukufalezwi ku eza [Muñ’a] Bupilo wa limpi.”—Isaya 9:6, 7.

Kacwalo manzwi a Gabriele ku Maria na na ni taluso ye tuna ye fita ku pepwa fela kwa ka makazo kwa mbututu ya mushimani yeo. Mwan’a hae ki yena ya na ka yola Mulena Davida—ili ku ba muyoli wa kamita wa Mubuso wa sumekezi Mulimu. Bupolofita bwa Gabriele  bwa za buikalabelo bwa na ka peta Jesu kwapili bu na ni taluso ye tuna ku luna kaufela.

Josefa ha na utwile kuli musali ya na beelelize na li fa mezi a manca, a keta ku felisa tumelelano ya bona ya ku nyalana. Na ziba kuli mwana ya na ka pepwa n’a si wa hae kakuli yena ni musali ya na beelelize ne ba si ka zibana kale. Mu nahane fela mo ne ku bezi t’ata kuli Josefa a lumele za na mu taluseza Maria ka za mulwalo wa hae. Bibele i biha kuli: “Lingeloi la Mulena la mu tahela kwa buloko, la li: ‘Josefa, mwan’a Davida, u si ke wa saba ku ikungela Maria musal’a hao, kakuli se si mu beile fa mezi a manca ki sa Moya o Kenile. Maria u ka pepa mwan’a mushimani, mi u ka mu beya libizo la Jesu; kakuli ki yena ya ka pilisa sicaba sa hae kwa libi za sona.’”—Mateu 1:20, 21.

Bibele ha i lu buleleli kuli Josefa na utwisisa kuli mwana yo na ka ‘pilisa cwañi sicaba sa hae kwa libi za sona.’ Kono lushango lo, ne lu kolwisize Josefa kuli Maria ya na itwezi na si na bufosi. Josefa na ezize ona cwalo mo ne li mu laelezi lingeloi mi a isa Maria kwa ndu, ili nto ye swana inge sinawenga.

Ka tuso ya litaba ze ñwi ze fumanwa mwa Mañolo, lwa kona ku utwisisa ze ne li talusa lingeloi leo. Ku zwa fela kwa simuluho, lingeloi le ne li ipanguzi ne li kakanyize tukelo ya Jehova ya ku busa. Mañolo a Siheberu a bonisa kuli kwand’a lika ze ñwi, yena muipanguli yo na pihile kuli Mulimu u busa ka sobozi ni kuli ha ku na mutu ni yo mukana ya na ka zwelapili ku sepahala ku Jehova muta a li mwa tiko. (Genese 3:2-5; Jobo 1:6-12) Adama ki yena ya na palezwi ku zwelapili ku sepahala. Kabakala sibi sa hae, batu kaufela ba hozize sibi, mi sibi seo si tahisize lifu. (Maroma 5:12; 6:23) Kono Jesu na pepilwe a si na sibi kakuli bomahe ne ba itwezi yena ku si ndate wa fa lifasi-mubu. Ka ku fana bupilo bwa hae bwa butu bo bu petehile sina sitabelo se si likanelela hande ni bupilo bwa na latehezwi ki bona Adama, Jesu na li mwa mayemo a ku lukulula batu kwa libi za bona ni ku ba fa  tibelelo ya ku ba ni bupilo bo bu sa feli.—1 Timotea 2:3-6; Tite 3:6, 7; 1 Joani 2:25.

Mwahal’a bukombwa bwa hae bwa fa lifasi-mubu, Jesu na file batu mitamuno ya mo bu ka bela bupilo muta matata a sibi a feliswa. Na lukuluzi batu kwa mapongo a fitana-fitana mi mane na zusize bafu. (Mateu 4:23; Joani 11:1-44) Zona limakazo zeo ne li mbengenge ya za ta eza kwapili. Jesu yena ka sibili na ize: “Nako ya ta, mo ba ba li mwa mabita kaufela, ba ka utwa linzwi la hae, mi ba zwe.”—Joani 5:28, 29.

Yona sepiso yeo i talusa libaka ku pepwa kwa Jesu, mane sihulu ni ku shwa kwa hae, ha li li za butokwa ku luna. Joani 3:17 i bonisa kuli Mulimu na lumile Mwan’a hae fa lifasi “kuli lifasi li piliswe ki yena.” Lona lushango lo lu tabisa lo, lu lu hupulisa zibahazo ye ne filwe kwa balisana ba ne ba tonela mitapi ya bona fa busihu bwa na pepilwe Jesu.

‘Taba Ye Nde Ye Tisa Tabo Ye Tuna’

Zibiso ya mangeloi ya ku pepwa kwa “Mupilisi, Kreste Mulena,” ne li ‘taba ye nde ye ne tisize tabo ye tuna’ kwa batu. (Luka 2:10, 11) Mwana yo na ka ba Mesiya, Mupolofita yo mutuna ni Mubusi yo ne ba libelezi batu ba Mulimu ka nako ye telele. (Deuteronoma 18:18; Mika 5:2) Bupilo ni lifu la hae fa lifasi ne li ka ba za butokwa kwa ku bubanisa tukelo ya Jehova ya ku busa pupo kaufela, kuli mane mangeloi na bulezi kuli: “Kanya i be ku Mulimu, kwa mahalimu a kwahalimu.”—Luka 2:14.

Jesu ya taluswa mwa Bibele kuli ki “Adama wa mafelelezo,” na bonisize kuli kwa konahala kuli batu ba sepahale ku Jehova niha ba li mwa tiko ye tuna ka ku fitisisa. (1 Makorinte 15:45) Kacwalo Jesu na bonisize fo ku sweu kuli Satani ki lihata le li maswe. Kona libaka mangeloi a sepahala ha na tabile mwa lihalimu.

Kono ha lu kuteñi kwa puzo ya luna ya kuli, “Kana mwa kona ku libelela luli kuli zibahazo ya mangeloi fa busihu bwa na pepilwe Jesu i ka talelezwa?” Kalabo ki ya kuli, ona cwalo fela! Kozo i tokwahala hahulu kuli mulelo wa Mulimu wa za lifasi-mubu u talelezwe, ona mulelo o kopanyeleza ni ku kutiswa sinca kwa paradaisi. Mulelo wo ha u ka petwa fa lifasi-mubu kaufela, batu kaufela ba ka kala ku susumezwa ki lilato ni busepahali. Kacwalo ku talelezwa kwa mulelo wa Jehova hape ku kopanyeleza ku tanyelwa kwa bote ba ba hanyeza bubusi bwa hae. Ye hasi taba ye nde ku bote ba ba swalisana ni Satani kwa ku ipapata kuli likuka za Jehova li maswe. Taba yeo ku bona i ka tisa sinyeho.—Samu 37:11; Liproverbia 2:21, 22.

Mu lemuhe kuli mangeloi na si ka bulelela balisana kuli batu kaufela ne ba ka ba mwa kozo ni ku shemubiwa. Kono na zibahalize kuli “kozo ya hae i be kwa batu ba lifasi, ba ba latwa ki yena,” ku likana ni Bibele ye Kenile, hatiso ya 1984. Batu ba ba taluswa fa, ki bani ba ba tabelwa ki Mulimu mi ba shemubilwe ki yena. Ba ba bonisa tumelo ya luli ku Jehova ki bona balateleli ba ba sepahala ni balikanyisi ba Jesu. Banna ni basali ba ba cwalo ba itatela ku bonisa bufani ni kutwisiso ku ba bañwi, isi fela ka mazazi a sikai mwa silimo, kono ka zazi ni zazi.

Bakreste Ba Likanyisa Kreste Nako Kaufela

Taba ye nde ya na kutalize Jesu i susumelize batu ba bañata-ñata. Ba bañata se ba sebelisa likuka za Sikreste mwa likalulo kaufela za bupilo bwa bona. Batu ba ne ba itata sa pili ki kale ba kalisa ku no ipuzanga mwa na kabe a ezelize Jesu ha na ka ipumana mwa miinelo ye ba kopana ni yona. Ba bañwi ba ne ba tomile bupilo bwa bona fa sifumu ni minyaka ba fitile fa ku lemuha butokwa bwa likuka za kwa moya ni butokwa bwa ku luta ba bañwi zona likuka ze swana zeo. Batu ba ba ikataza ku eza cwalo ba bonisa bufani ni sishemo mwahal’a silimo kaufela. Kana wo haki wona moya o mu kona ku libelela kwa Bakreste ba niti?

 Kambe batu kaufela ba ba sepahala ne ba ka kutumana ni ku nyakisisa ze iputezi mwa lushango lo ne lu zibahalizwe ki mangeloi ka za kozo ni ku eza lika ze lumelelana ni litaba zeo, lifasi ne li ka ba hande luli.

Bupolofita bwa za ku pepwa kwa Jesu bu kolwisa bote ba ba shemubilwe ki Mulimu kuli ba kona ku ikola kozo sakata ku ya ku ile. Kana hasi yona takazo ya mina yeo? Lu na ni sepo ye tiile ya kuli zibiso ya bupolofita bwa kozo ye ne shaezwi ki mangeloi ka nako ya ku pepwa kwa Jesu i ka talelezwa ku be cwañi kamba cwañi. Ka ku fapahana ni manzwi a si na taluso a bulelwanga ka nako ya Ngilisimusi, kozo i ka ba teñi luli ku ya ku ile.

[Maswaniso a fa likepe 7]

Bakreste b’a kona ku likanyisa Kreste silimo mutumbi mi kona mo ba swanela ku ezeza