Zibo ya Mulimu—I Fumanwa Cwañi?

Ba bañwi ha ba kolwi kuli Mulimu wa tabela kuli batu ba mu zibe. Kono haiba wa tabela, u itibahaza cwañi kwa batu?

MWA lilimo za ma-1500, mulapeli wa Muprotestanti ya bizwa John Calvin n’a nepile ha n’a bulezi kuli batu niha ba ka ikataza cwañi, ha ba koni ku ziba Mulimu ka ili bona kwand’a kuli yena Mulimu a itibahaze ku bona. Nihakulicwalo, ba bañwi ha ba kolwi luli kuli Mulimu wa tabela ku itibahaza kwa batu. Kono haiba wa tabela, u itibahaza cwañi he kwa batu?

Jehova, yena “Mubupi,” ha ezangi fela lika ku si na mulelo. Hape ka ku ba “Mulimu Ya-Mata-Kaufela,” wa kona luli ku peta milelo ya hae. (Muekelesia 12:1; Exoda 6:3) Lwa kolwa luli kuli wa tabela ku patululela batu milelo ya hae, kakuli mupolofita wa hae Amosi n’a ñozi ka ketelelo ya moya kuli: “Mulena [Muñ’a] Bupilo h’a na ku eza se siñwi, a si ka sebela mulelo wa hae kwa batanga ba hae ba bapolofita.” Nihakulicwalo, mu lemuhe mo ku bulelezwi mwa liñolo m’o kuli, Mulimu n’a sebezi fela milelo ya hae kwa batanga ba hae, ili kwa batu ba ne ba mu lata luli. Taba yeo ha i komokisi, nji cwañi? Mina mu talusezanga bomañi likunutu za mina? Kana mu talusezanga mañi ni mañi kamba mu talusezanga fela balikani ba mina ba batuna?—Amosi 3:7; Isaya 40:13, 25, 26.

Batu ba ba ishuwa ba sabiswa ki butali ni zibo ya Mulimu, ili nto ye swanela luli. Niteñi, kuli lu fumane tuso kwa butali ni zibo ya Mulimu ha lu tokwi fela ku ba ni sabo. Bibele i koñomeka kuli, kuli lu itute mubonelo wa Mulimu, lu tokwa ku ba ni pilu ye na ni buikokobezo. I talusa kuli: ‘Buluka milao ya ka ku wena. Sikekela zebe ya hao kwa butali. Isa pilu ya hao kwa kutwisiso. Tiisa ku biza tuto. I bate sina silivera.’—Liproverbia 2:1-4.

Mutu ya na ni buikokobezo ili ya ikataza ku bata zibo ya Mulimu cwalo u ka i fumana luli. Taba ye mwa buka ya Liproverbia yeo i zwelapili ku bonisa kuli: “[Muñ’a] Bupilo ki Yena ya fana butali, zibo ni kutwisiso li zwa mwa mulomo wa hae.” Kaniti, batu ba ba bata luli ku ziba niti ba kona ku ‘lemuha se si lukile, se si na ni niti, ni swanelo; mi ba ka lemuha ni linzila ze nde kamukana.’—Liproverbia 2:6-9.

Ku Bata Niti

Hatiso ye bizwa The Encyclopedia of Religion i talusa kuli: “Batu ka sipepo ba lata hahulu ku bapanyanga lika kuli ba zibe ze li za niti ni ze si za niti, ze tiile ni ze si ka tiya, ze lukile ni ze si ka luka, ze kenile ni ze si ka kena, ze utwahala ni ze sa utwahali, mi hape ba batanga ku ziba sipimo sa lika ze ba bapanya.” Kuli ba fumane zibo yeo, batu ku zwa kwa simuluho ba batile niti. Mi ha ba batezi niti yeo ku Jehova, yena ya bizwa ki walisamu kuli “Mulimu wa niti,” ba i fumani luli.—Samu 31:5.

Taluso ya libizo la Jehova ki kuli “U Tahisa Ku Ba Teñi.” (Genese 2:4, NW, litaluso za  kwatasi) Kacwalo, taluso ya libizo la Mulimu i bonisa kuli ki yena Mubupi mi hape i bonisa ni mulelo wa hae. Kabakaleo, balapeli ba niti ba swenela ku ziba libizo la Jehova ni ku itusisa lona. Jesu n’a ziba hande taba yeo. Ha n’a lapezi ku Mulimu n’a bulezi cwana ka za balateleli ba hae: “Ni ba zibisize Libizo la hao, mi ni ka na ni ba zibisa lona; kuli lilato l’o ni latile li be ku bona, ni na, ni be ku bona.”—Joani 17:26.

Muheberu wa kwaikale ya bizwa Josefa, ha n’a filwe musebezi wa kuli a bulele taluso ya litolo, n’a itingile ku Mulimu ka ku bulela ka buikokolwiso kuli: “Litaluso, kana a li zwi ku Mulimu?”—Genese 40:8; 41:15, 16.

Hamulaho wa lilimo ze mianda-nda, Mulena Nebukadenezare wa Babilona n’a bile ni tolo ye ne ba palezwi ku talusa banna ba hae ba ba butali. Mupolofita Daniele n’a bulelezi mulena yo kuli: “Kwa lihalimu, ku inzi Mulimu ya kona ku talusa makunutu a’ patilwe, mi ki Yena ya zibisa cwale mulena Nebukadenezare ze ka bonahala mwa mazazi a kwapili.”—Daniele 2:28.

Mitala ye mibeli yeo ya Josefa ni Daniele i bonisa kuli ba ba na ni zibo ni butali bwa Mulimu ki ba ba sebeleza fela Jehova Mulimu. Kono kuli lu shemubwe ki Mulimu, lu tokwa ku ambuka litumelo za luna za kale. Majuda ba mwa linako za baapositola ba ne ba bile Bakreste ne ba na ni ku eza honacwalo. Bakeñisa kuli ne ba hulisizwe inze ba latela milao ya Majuda, ne ku li t’ata kuli ba lumele kuli Jesu ne li yena Mesiya, ya n’a til’o taleleza Mulao wa Mushe, wo no li “muluti fela wa ze ne ka taha.” (Maheberu 10:1; Mateu 5:17, NW; Luka 24:44, 45) Mulao wa Mushe ne u yolilwe ki mulao o mutuna ka ku fitisisa, ili “mulao wa Kreste.”—Magalata 6:2; Maroma 13:10; Jakobo 2:8.

Kaufela luna lu pepezwi mwa lifasi le li ikauhanyize ku Mulimu. Lu pepilwe lu li lila za Mulimu, ze si na zibo ye nepahezi ya milelo ya hae, bakeñisa sibi sa ku hoza kwa bashemi ba luna ba pili. Hape lu hozize ni pilu ye puma. (Jeremia 17:9; Maefese 2:12; 4:18; Makolose 1:21) Kuli lu be balikani ba Mulimu, lu swanela ku likanyisa mubonelo wa hae. Ku eza cwalo ku t’ata.

Ku tuhela lituto kamba likezo za bulapeli ku kana kwa ba t’ata, sihulu haiba lituto kamba likezo zeo ne lu kalile ku ituta zona ku zwa kwa bwanana. Kono kana ku zwelapili ku eza bumaswe ku lukile? Kutokwa! Se si lukile ki kuli mutu a tuhele lika ze maswe ilikuli a tabise Mulimu.

 Ku Lemuha Nzila ya Luta ka Yona Mulimu

Lu kona ku fumana kai tuso kuli lu utwisise Linzwi la niti ni ku li sebelisa mwa bupilo? Mwa Isilaele ya kwaikale, Mulimu n’a ketile batu ba ba sepahala kuli ba etelele sicaba. Kreste, ya li Toho ya puteho ya Bakreste kacenu, ni yena u sweli ku etelela batu ba ba bata luli ku ziba niti. U ba etelela ka ku itusisa balateleli ba hae ba ba sepehala, bona ba ba filwe musebezi wa ku etelela ni wa ku sileleza ba ba bata ku ziba niti. (Mateu 24:45-47; Makolose 1:18) Kono mutu u kona ku ziba cwañi nzila ya etelela ka yona Mulimu?

Balateleli ba Jesu Kreste ba niti ba lika ka mo ba konela kaufela ku likanyisa tulemeno twa n’a bonisize Jesu ha n’a sa li fa lifasi. Mwa lifasi le li maswe le, ku bunolo ku ziba balateleli bao bakeñisa kuli ba bonisa tulemeno to tu ipitezi twa kwa moya. (Mu bone sikwende se si fa likepe 6.) Kana tulemeno t’o twa bonahala mwa bulapeli bwa mina kamba bwa bo mu pila ni bona? Neikaba hande ha ne mu ka tatuba taba yeo ka ku itusisa Bibele.

Mina babali kaufela, lu mi susueza kuli mu eze cwalo ka ku ituta Bibele. Ka avareji, batu ba ba fitelela 6,000,000 mwa linaha ze 235 ne ba bile ni tuto ya Bibele yeo ni Lipaki za Jehova ñohola. Ku fumana butali ni zibo ya Mulimu ki musebezi o munde o sa feli mi u tahisa mipuzo. Kacwalohe haike mu kalise musebezi wo wa ku bata butali ni zibo ya Mulimu! Ha mu na ku inyaza haiba mu eza cwalo. Kaniti, Mulimu lwa kona ku mu ziba luli!

[Mbokisi fa likepe 6]

Batu Ba Ba Eza Tato ya Mulimu . . .

ba swanela ku ikambusa kwa mifilifili ya bupolitiki.—Isaya 2:4.

ba swanela ku beya miselo ye minde ka ku eza tato ya Mulimu.—Mateu 7:13-23.

ba swanela ku bonisana lilato la niti. —Joani 13:35; 1 Joani 4:20.

ba swanela ku bulela lika ze lumelelana kaufela bona.—Mika 2:12.

ba swanela ku sa likanyisa mikwa ye maswe ni muzamao wa lifasi le ba pila ku lona. —Joani 17:16.

ba swanela ku paka niti ni ku tahisa balutiwa.—Mateu 24:14; 28:19, 20.

ba swanela ku ikola mikopano kamita kuli ba susuezane.—Maheberu 10:25.

ba swanela ku lumbeka Mulimu ka buñwi kaufela bona.—Sinulo 7:9, 10.

[Maswaniso a fa likepe 7]

Zibo ya Mulimu lwa kona ku i fumana ka ku ituta Bibele, ka tuto ya lubasi, kamba ka mikopano ya puteho