“Lu Pilelañi?”

BO ELIE Wiesel ba ba kile ba wina mupuzo wa Nobel Prize ni bapunyuhi ba pulao ye maswe ya Nazi, nako ye ñwi ba kile ba bulela kuli puzo ye “kona puzo ya butokwa hahulu ya swanela ku nahanisisa mutu.” Ki puzo mañi yona yeo? Ki puzo ye li: “Lu pilelañi?”

Kana mu kile mwa nahanisisa yona puzo ye? Batu ba bañata ba i nahanisisize, kono buñata bwa bona ha ba si ka fumana kalabo. Arnold Toynbee caziba wa ze ezahezi wa kwa Britain ha na lika ku fa monyehelo ya taluso ya bupilo, na ñozi kuli: “Mulelo luli wa mutu ki ku lumbeka Mulimu ni ku fumana tabo ye zwa ku Mulimu kamita.”

Mi taba ye tabisa kikuli, lilimo ze fitelela 3000 kwamulaho, munna yo muñwi ya na zibwa ka ku ba ni temuho ya ku batisisa hahulu taluso ya bupilo, na fumani kale kalabo ya butokwa ya ona puzo ye. Mulena ya butali Salumoni na ize: “Mi cwale litaba ze, mafelelezo a zona ki a: Saba Mulimu, mi u mamele milao ya hae. Kakuli ki yona swanelo kaufela ya mutu.”—Muekelesia 12:13.

Mwan’a Mulimu, Jesu Kreste, n’a bonisize buniti bwa sikuka sa butokwa se. Ha na li fa lifasi, Jesu na itusisize m’ata a hae kaufela kwa ku lumbeka Ndat’ahe wa kwa lihalimu. Ku sebeleza Mubupi wa hae ne ku mu tahiselize kuli a pile bupilo bo bunde. Ku eza cwalo ne ku mu tiise, kuli mane na konile ku bulela kuli: “Sico sa ka, kikuli ni eze se si latwa ki Ya ni lumile.”—Joani 4:34.

Kacwalo lu pilelañi? Ka ku swana ni Jesu, Salumoni, ni batanga ba bañwi ba Mulimu ba bañata, lwa kona ku fumana taluso luli ya bupilo ni ku pila bupilo bwa tabo kamita ka ku eza tato ya Mulimu. Kana mu ka tabela ku ziba ze ñata ka mo mu kona ku lapelela Mulimu “ka Moya ni ka niti”? (Joani 4:24) Lipaki za Jehova ba ba mwa silalanda sa habomina ba ka tabela ku mi tusa ku alaba puzo ye li, “Lu pilelañi?”