Ku Fuluha mwa Liwate Le Li Tuna

MWA lioli za Marshall Islands ku fumaneha lioli ni liolinyana ze 1,200, mi buñata bwa zona li umbukile liwate ka limita li sikai fela. Liolinyana zeo ki ze nyinyani hahulu kuli mane mutu ya kwahulenyana ha koni ku li bona. Kono bafuluhi ba ikale ba mwa lioli za Marshall Islands ne ba kona ku fuluha ku zwa soolinyana se ni ku liba ku se siñwi, mi imbo seo ki sibaka mwa Liwate la Pacific se si kona ku kwana likilomita ze 2 milioni mwa bupala ni mwa butelele. Ne ba kona cwañi ku eza cwalo? Ne ba itusisa “limapa” za tukota to tu si na mo tu inezi kono niteñi ne li tusa luli.

Bafuluhi ba mwa lioli za Marshall Islands ne ba cuukile mi ne ba kona ku ziba haiba ko ba libile ku na ni sooli ka ku shalima fela mububelo wa mezi ibato ba likilomita ze 30 ba si ka fita kale kwa sooli seo. Ne ba na ni ku ituta mandinda a mifuta-futa, mi limapa za tukota ne li ba tusa ku a hupula ba s’a bona fela. Limapa zeo za tukota ne li bonahala cwañi? Sina mo mu kona ku bonela fa siswaniso se si fa likepe le, bafuluhi bao ne ba tamanga hamoho mibisi ya kota ye swana inge mukenge kamba mitila ya matali a kokonati ni ku panga fateñi mapa yeo ye ne bonisa mububelo wa mezi. Hape ne ba kwesanga fateñi liketa ili ku bonisa buhule bo ne bu li mwahal’a sooli se siñwi ku ya ku se siñwi.

Ka lilimo-limo, mufuluhelo wa ku itusisa tumapa twa kota ne u ngilwe ku ba kunutu, mi ne u lutiwa fela ku ba sikai ba ba ketilwe. Kono cwale mwanana ya na ituta ku fuluha na kona ku ziba cwañi mwa ku itusiseza tumapa twa kota? Na kona fela ku ziba ha sa lutilwe ni ku latelela ka mwa lutezwi. Mufuluhi ya yeziseli na lutela muituti wa hae kwa mukunda, mwendi ka ku mu isa kwa lioli ze li mabapa. Mufuluhi wa mwanana yo ha na sa tekelezi mububelo wa mezi, na kona ku itusisa tumapa twa hae twa kota ka bunolo. Hañihañi, na kona ku yo ifuluhela a nosi mwa liwate.

Ka nzila ye swana, Linzwi la Mulimu, yona Bibele, la kona ku lu etelela mwa musipili wa luna wa bupilo. Kwa makalelo, mutu yo muñwi a kana a lu tusa ku utwisisa lituto za matatekelo za mwa Mañolo. Kono ha lu nze lu zwelapili ku ituta Linzwi la Mulimu ni ku itusisa likuka za lona, lu fita fa ku sepa ze li bulela. Joshua, mueteleli wa Maisilaele, na bulelezwi ku balanga Linzwi la Mulimu kuli a kone ku ‘tokomela ku eza se si ñozwi mwateñi kaufela.’ Mulimu na bulelezi Joshua kuli “ka ku eza cwalo u ka kondisa nzila ya hao, mi z’o ka eza kaufela, u ka li kona.” (Joshua 1:8) Kaniti, Bibele ya kona ku lu tusa ku kondisa mwa bupilo bwa luna.

[Manzwi a bañi ba siswaniso fa likepe 32]

© Greg Vaughn