“Ki Swanelo Kuli Lu Utwe Mulimu Ku Fita Batu”

‘Mulimu wa Luna U Na ni M’ata a ku Lu Lamulela’

SISWANISO-TUNA sa gauda ne si tomilwe mwa libala la Dura, mi ku bonahala kuli ne li bukaufi ni muleneñi wa Babilona. Ne i lukisizwe ku ba kezahalo ye makaza luli. Siswaniso seo ne si ka kakulwa fa mukiti o ipitezi, mi kwa mukiti wo ne ku ka fumaneha babusisi ba mulonga ba ne ba ka kubamela siswaniso seo ha ne ba ka utwa lilata le li kopani la ze lizwa za mifuta-futa. Mulena Nebukadenezare wa Babilona na file mushaa wa kuli mutu ufi kamba ufi ya na si ke a lapela siswaniso na ka bulaiwa ka ku nepelwa mwa liyekuyeku le li lyakama. Cwale ki mutu mañi ya na si ke a utwa yona taelo yeo?

Kono se ne si komokisize batu kikuli, mitangana ba balalu ba ne ba saba Jehova ni ku mu lapela—bo Shadrake, Meshaki ni Abedi-Nego—ne ba si ka kubama. Ne ba ziba kuli ha ne ba ka kubama ne ba si ke ba bonisa busepahali bwa bona bwa ku lapela fela Jehova Mulimu yena a nosi. (Deuteronoma 5:8-10) Ha ba buziwa libaka ha ne ba si ka kubama, ba bulelela Nebukadenezare ka bundume, ba li: “Kakuli Mulimu wa luna ye lu sebeleza, u na ni mata a ku lu lamulela kwa liyekuyeku la mulilo o buhali, mi u ka lu lamulela mwa lizoho la hao, shangwe mulena. Mi, hakusicwalo, shangwe mulena, u zibe kuli ha lu na ku sebeleza milimu ya hao, ha lu na ku kubamela siswaniso sa gauda s’o tomile.”—Daniele 3:17, 18.

Maheberu ba balalu ba ha ne ba nepezwi mwa liyekuyeku le li lyakama, ze ne kona fela ku ba yangwela ki kezo ya ka makazo. Mulimu a luma lingeloi kuli li lamulele batanga ba hae ba ba sepahala bao. Kono ka nako yeo bona ne se ba ketile kale ku beya bupilo bwa bona mwa kozi ku fita ku sa ipeya ku utwa Jehova. * Ne ba ezize nto ye swana ni ye ne ba ezize baapositola ba Jesu Kreste, ili bao lilimo ze fitelela 600 ku zwa fo, ne ba bulelezi kuta ye tuna ya Majuda kuli: “Ki swanelo kuli lu utwe Mulimu ku fita batu.”—Likezo 5:29.

Lituto za Butokwa Ze Lu Ituta

Bo Shadrake, Meshaki, ni Abedi-Nego ki mitala ye minde ya batu ba ne ba bonisize tumelo, ku ipeya ku utwa, ni ba ne ba sepahalile. Maheberu ba balalu bao ne ba bonisize tumelo ku Jehova. Mazwalo a bona a na lutilwe ka Mañolo na si ka ba lumeleza ku abana mwa nto ifi kamba ifi ya bulapeli bwa buhata kamba bulapeli bwa naha. Ka ku swana, Bakreste ba kacenu ni bona ba sepa Mulimu wa niti ka ku tala. Ba etelelwa ki mazwalo a lutilwe ki Bibele mi ba hana ku ikenya mwa likezo za bulapeli bwa buhata kamba mwa lizo ze sa lumelelani ni milao ni likuka za Mulimu.

Maheberu ba balalu ba ba sepahala ne ba sepile Jehova mi ne ba sa koni ku tuhela ku utwa Mulimu ka ku bata fela kuli ba pange libubo, kamba ku fiwa likute mwa Mubuso wa Babilona. Mitangana ba ne ba itatezi ku nyanda ni ku shwa ku fita ku sinya silikani sa bona ni Mulimu. Ka ku swana ni Mushe ya na li teñi pili ku bona, ne ba ‘tundamezi ku tiya inge ba ne ba bona Yena ya sa bonwi.’ (Maheberu 11:27) Ibe kuli Jehova na ka keta ku ba lamulela kuli ba si ke ba bulaiwa kamba kutokwa, mitangana ba balalu  bao ne ba ikatulezi ku zwelapili ku sepahala ku yena ku fita ku tuhela busepahali bwa bona ilikuli ba pilise bupilo bwa bona. Ku bonahala kuli muapositola Paulusi na bulela za bona ha na pundile ba ba sepahala ba ne “ba timile mata a mulilo.” (Maheberu 11:34) Kacenu batanga ba Jehova ba bonisa tumelo ni ku utwa ko ku cwalo ha ba nze ba kopana ni litiko za busepahali.

Hape likande la bo Shadrake, Meshaki, ni Abedi-Nego, li lu luta kuli Mulimu u fuyolanga ba ba sepahala ku yena. Walisamu na opezi kuli: “[Muñ’a] Bupilo . . . h’a tuheli ba hae ba ba kenile [kamba ba ba sepahala].” (Samu 37:28) Kacenu le, ha lu koni ku libelela kuli Mulimu u ka lu lamulela ka makazo sina mwa na lamulezi Maheberu ba balalu ba. Kono lwa kona ku sepa kuli ibe kuli ki muliko mañi kamba mañi o ka lu kenela, Ndat’a luna wa kwa lihalimu u ka lu lamulela. Mulimu wa kona ku felisa butata bo, ku lu fa m’ata a ku kona ku bu tiyela, kamba ku to lu zusa haiba lu zwelapili ku sepahala ku fitela lifu. (Samu 37:10, 11, 29; Joani 5:28, 29) Fo lu ka kopanela kaufela ni litiko lu ka kona ku bonisa tumelo, lu ka ipeya ku utwa, ni ku bonisa busepahali mi lu keta ku utwa Mulimu ku fita batu.

[Litaluso za kwatasi]

[Mbokisi/Siswaniso se si fa likepe 9]

KANA MWA ZIBA?

• Maheberu ba balalu ne ba na ni lilimo ze bata iba ze 30 ha ne ba kopani ni tiko ye ye ne likile busepahali bwa bona.

• Liyekuyeku ne li tumbuzwi kuli li cise ha buhali luli.—Daniele 3:19.