“Ki Swanelo Kuli Lu Utwe Mulimu ku Fita Batu”

Ku Lukululwa ka ‘Mali a Butokwa’

JEHOVA n’a bonisize lilato la hae le lituna ka ku fitisisa ha n’a lumile Mwan’a hae wa libanda ku to fana bupilo bwa hae bwa fa lifasi bo bu petehile sina tiululo. Bakeñisa kuli lu na ni sibi, lu tokwa hahulu-hulu tiululo yeo, kakuli mutu ya si ka petahala ha koni “ku liulula mwanahabo, niheba ku tiseza Mulimu tifo ya ku itiulula . . . kuli a kone ku pila kamita.” (Samu 49:6-9) Lwa itebuha hahulu bakeñisa kuli Mulimu n’a lu “file Mwan’a hae wa libanda kuli mutu ufi kamba ufi ya lumela ku yena a si ke a shwa, kono a be ni bupilo bo bu sa feli”!—Joani 3:16.

Tiululo i lu lukulula cwañi? Ha lu nyakisiseñi linzila z’e ne ze lu fumana ka zona tukuluho bakeñisa kezo ye tuna yeo ya lilato la Jehova Mulimu.

Ku Lukululwa ka Tiululo

Sapili, sitabelo sa Jesu sa kona ku lu lukulula kwa sibi sa ku hoza. Kaufela luna lu pepezwi mwa sibi. Kacwalo, lu na ni sibi ni ko lu si ka tula kale milao ya Jehova. Kiñi hakulicwalo? Maroma 5:12 i li: “Sibi sina ha si keni mwa lifasi ka mutu a li muñwi [Adama], mi ka sibi ku keni lifu.” Bakeñisa kuli lu bana ba Adama ya n’a na ni sibi, lu hozize ku sa petahala kwa hae. Nihakulicwalo, kwa konahala kuli lu lukululwe kwa sibi se ne lu hozize bakeñisa kuli tiululo i lifilwe. (Maroma 5:16) Jesu n’a “utwile lifu mwa sibaka sa batu kamukana,” n’a lwalezi bana ba Adama ze ne zwile mwa sibi.—Maheberu 2:9; 2 Makorinte 5:21; 1 Pitrosi 2:24.

Sa bubeli, tiululo ya kona ku lu lukulula kwa lifu le li tahisizwe ki sibi. “Mupuzo wa sibi ki lifu.” (Maroma 6:23) Koto ya sibi ki lifu. Mwan’a Mulimu n’a tahisize kuli batu ba ba utwa ba kone ku pila ku ya ku ile bakeñisa lifu la hae la sitabelo. Kaniti, “ya lumela ku Mwana u na ni bupilo bo bu sa feli; mi ya sa lumeli ku Mwana h’a na ku bona bupilo.”—Joani 3:36.

Mu zibe kuli kwand’a ku ba ni tumelo ku Mwan’a Mulimu ha ku na nto ye ñwi ye kona ku lu sileleza kwa koto ya sibi. Tumelo yeo i kopanyeleza ni ku eza licinceho mwa bupilo bwa luna ka ku eza tato ya Mulimu. Lu swanela ku lisela mupilelo kaufela o maswe o ne lu ndongwami ni ku kalisa ku eza ze tabisa Mulimu. Muapositola Pitrosi n’a bulezi kuli lu swanela ku ‘baka, ni ku sikuluha; kuli libi za luna li takulwe.’—Likezo 3:19.

Sa bulalu, sitabelo sa n’a file Jesu si lu fa tukuluho ya ku sa ikutwa ku ba lifosi. Batu kaufela ba ikutwanga ku imuluha ha se ba ineezi ku Jehova ni ku ba balutiwa ba ba kolobelizwe ba Mwan’a hae. (Mateu 11:28-30) Ni ko lu si ka petahala, lu tabiswa hahulu ki ku sebeleza Mulimu lu nze lu na ni lizwalo le li kenile. (1 Timotea 3:9; 1 Pitrosi 3:21) Ha lu bulela libi za luna ni ku li bakela, lwa shemubiwa ni ku imululwa kwa lizwalo le li lu sisita.—Liproverbia 28:13.

Tiululo I Lu Fa Tuso ni Sepo

Sa mafelelezo, ka ku ba ni tumelo mwa tiululo, ha lu sabi kuli Mulimu u lu nga cwañi. Muapositola Joani n’a ñozi kuli: “Mutu h’a ezize sibi, lu na ni Muyemeli fapil’a Ndate, ki Jesu Kreste.” (1 Joani 2:1) Muapositola Paulusi n’a ñozi cwana ka za musebezi wa Jesu sina mutusi:  “U kona ku pilisa ku feleleza ba ba taha ku Mulimu ka yena, kakuli unz’a pila kamita ku ba lapelela.” (Maheberu 7:25) Mwa nako ye lu sa na ni sibi, lu ka tokwa Muprisita yo Muhulu yena Jesu Kreste ku lu tusa ku utwana ni Mulimu. Jesu n’a lu tusize cwañi sina muprisita yo muhulu?

Jesu n’a kambamezi kwa lihalimu ku yo fitisa ku Mulimu teko ya “mali a butokwa” a hae hamulaho a mazazi a 40 ku zwa fa n’a zuselizwe kwa bafu ili ka 33 C.E. Kabakaleo, Jesu u ka tuha a lukulula batu ba ba utwa kwa sibi ni lifu. * (1 Pitrosi 1:18, 19) Kacwalo he, kana ha mu boni libaka ha lu swanela ku lata Jesu Kreste ni ku mu utwa?

Hape ni Jehova Mulimu lwa swanela ku mu lata ni ku mu utwa. N’a lu ‘lukuluzi ka tiululo’ bakeñisa lilato la hae. (1 Makorinte 1:30) Ha si ka lu fa fela bupilo bo lu na ni kacenu kono hape u lu file ni sepo ya ku ikola bupilo bo bu sa feli. Kacwalo lwa swanela kuli “lu utwe Mulimu ku fita batu.”—Likezo 5:29.

[Litaluso za kwatasi]

[Mbokisi/Maswaniso a fa likepe 9]

KANA MWA ZIBA?

• Kuli Jesu n’a kambamezi kwa lihalimu fa lilundu la likota za Olive.—Likezo 1:9, 12.

• Kuli ki baapositola ba Jesu fela ba ba sepahala ba ne ba mu boni ha n’a kambemela kwa lihalimu.—Likezo 1:2, 11-13.