Lipuzo Ze Zwa kwa Babali

Samu 102:26 i bulela kuli lifasi ni lihalimu “li ka fela.” Kana pulelo yeo i talusa kuli lifasi-mubu li ka sinyiwa?

Muñoli wa lisamu n’a lapezi ku Jehova kuli: “Kwakale n’o tomile lifasi; mi lihalimu ki musebezi wa mazoho a hao. Zona li ka fela; kono Wena u ka n’o nz’o li teñi. Zona kaufela li ka supala sina siapalo; U ka li tubula sina kubo, mi li ka fetuha.” (Samu 102:25, 26) Taba ye ambolwa i bonisa kuli litimana ze ha li buleli za ku sinyiwa kwa lifasi, kono li bulela za kuli Mulimu ki wa kamita. Taba ye hape i bonisa libaka sisupo sa niti seo ha si li se si omba-omba kwa batanga ba Mulimu.

Muñoli wa lisamu, mwendi inz’a li mwa butanga mwa Babilona, u kala ka ku talusa manyando a hae. U bilaela kuli bupilo bwa hae bu fela “sina musi.” Lipilaelo ze fitelezi li yongisa mubili wa hae, li lengisa masapo a hae sina mutu ya “ca inge sishingwa.” U bombile, u “omelezi inge bucwañi,” mi u utwa bulutu, “inge nyunywani ye inzi i li nosi fa situwa sa ndu.” H’a na takazo ya ku ca bakeñisa miliko ya hae mi mazazi a hae a tezi sililo. (Samu 102:3-11) Nihakulicwalo, muñoli wa lisamu ha si ka felelwa ki sepo kaufela. Kabakalañi? Bakeñisa za sepisize Jehova ku ezeza Sione, kamba Jerusalema.

Nihaike kuli Sione u sinyizwe, Jehova u sepisize kuli u ka yahiwa sinca. (Isaya 66:8) Kacwalo muñoli wa lisamu ka sepo u bulelela Jehova kuli: “U utwele Sione butuku; kakuli nako ya ku mu utwela butuku s’e fitile, e, nako ye tomilwe s’e fitile. [Muñ’a] Bupilo h’a ka b’a zusize Sione.” (Samu 102:13, 16) Muñoli wa lisamu kihona a kutela kwa taba ya manyando a hae. Ka mubulelelo o muñwi, u sweli ku nahanisisa kuli haiba Jerusalema ye siilwe matota ya kona ku yahiwa sinca ka m’ata a Mulimu, u zibe he Jehova wa kona ku mu lamulela kwa manyando a hae. (Samu 102:17, 20, 23) Mi ku na ni nto ye ñwi ye susumeza muñoli wa lisamu ku sepa hahulu Jehova. Ki nto mañi yona yeo? Ki taba ya kuli Jehova ki wa kamita.

Ku ba teñi kwa Jehova kwa kamita ku shutana hahulu ni bupilo bo bu kuswani bwa muñoli wa lisamu. U bulelela Jehova kuli: “Myaha ya hao, ki ya mwa masika ni masika ku ya ku ile.” (Samu 102:24) Muñoli wa lisamu kihona a li: “Kwakale n’o tomile lifasi; mi lihalimu ki musebezi wa mazoho a hao.”—Samu 102:25.

Kono butelele bwa nako ye li bile teñi lifasi ni lihalimu ha bu koni ku bapanyiwa kwa nako ye sa feli ya ku ba teñi kwa Jehova. Muñoli wa lisamu u ekeza kuli: “Zona li ka fela [lifasi ni lihalimu]; kono Wena u ka n’o nz’o li teñi.” (Samu 102:26) Lifasi-mubu ni mahalimu ki lika ze kona ku sinyeha. Ki niti, Jehova n’a bulezi mwa mañolo a mañwi kuli li ka ina ku ya ku ile. (Samu 119:90; Muekelesia 1:4) Kono za kona ku sinyiwa haiba kambe Mulimu na lelile cwalo. Kono Mulimu ha koni ku shwa. Ze bupilwe li zwelapili ‘ku ba teñi ku ya ku ile’ ka libaka fela la kuli Mulimu wa li buluka. (Samu 148:6) Haiba Jehova ni kamuta a tuhela ku uncafaza ze bupilwe, u zibe he “zona kaufela li ka supala sina siapalo.” (Samu 102:26) Sina mutu ha pila nako ye telele ku fita liapalo za hae, ni Jehova ni yena n’a ka pila nako ye telele ku fita pupo ya hae—ha na ka lata kuli ku be cwalo. Kono lwa ziba ka ku ya ka mwa taluseza mañolo a mañwi kuli yeo haki yona tato ya hae. Linzwi la Mulimu li lu kolwisa kuli Jehova u sepize kuli lifasi-mubu ni lihalimu li ka ina ku ya ku ile.—Samu 104:5.

Kwa omba-omba ku ziba kuli Jehova u ka ba teñi kamita kuli a taleleze lisepiso za hae kaufela. Ku si na taba ni miliko ye kana ya lu tahela, ha lu mu lilokela, lwa kona ku sepa kuli u kabe ‘a utwile tapelo ya bo mwelwa mi h’a nyenyi tapelo ya bona.’ (Samu 102:17) Luli, sepiso ya tuso ya Jehova ye mwa Samu 102 i tiile hahulu ku fita mane ni lifasi le fo lu hatile.