Linubu Ze Tabisa Pilu ya Mulimu

LIKANDE le haki le linde. Mukwae Atalia, mahe mulena, n’a ngile bulena bwa Juda ka bupumi ni bubulai. Ka ku hupula kuli bana ba silena kaufela ba ne ba swanela ku yola ba bulailwe, a ipahamisa fa bulena. Musali yo muñwi, mukwae Jehosheba, ya n’a lata hahulu Jehova ni Mulao wa hae, ka bundume a pata mwan’a mulena ya na li mbututu, wa libizo la Joasi. Jehosheba ni munn’a hae, Muprisita yo Mutuna Jehoyada, ba pata mwanana yo ya n’a swanela ku yola ka lilimo ze 6 mwa ndu ya bona ya mwa tempele.—2 Malena 11:1-3.

Joasi ha sa kwanisize lilimo ze 7 za buhulu, Muprisita yo Mutuna Jehoyada n’a itukiselize ku kalisa mulelo wa hae wa ku tulula mukwae ya n’a ikwamekile bulena ka nzila ye maswe. A patulula mushimani ya n’a patile ni ku mu beya fa bulena ka ku ba yena ya n’a lukela ku yola mubuso. Mukwae Atalia ya maswe a hohelwa kwande a tempele ki masole ba silena mi a bulaiwa, ili nto ye n’e imuluzi batu ni ku ba tabisa. Ka likezo za bona, bo Jehoyada ni Jehosheba ne ba tusize hahulu kwa ku kutisa sinca bulapeli bwa niti mwa naha ya Juda. Kono sa butokwa hahulu kikuli ne ba tusize kuli lusika lwa bulena lwa Davida lu zwelepili, ili lona lusika mo ne ku ka pepwa Mesiya.—2 Mulena 11:4-21.

Mulena ya sa zo ketiwa ni yena n’a na ni ku nga muhato o ne u ka tabisa pilu ya Mulimu. Ndu ya Jehova ne i tokwa hahulu ku lukiswa. Takazo ya Atalia ye n’e fitelezi ya ku ba yena mubusi a nosi mwa Juda ne i tisize kuli tempele i keshebiswe mi mane ni ku fita fa ku sinyiwa kwa yona. Kacwalo Joasi a isa mamelelo kwa ku yaha ni ku kutisa sinca tempele. Kapili-pili a fa taelo ya ku kopanya mali a tokwahala a ku lukisa sinca ndu ya Jehova. N’a ize: “Mali kaufela a’ filwe Mulimu a tiswe mwa Ndu ya [Muñ’a] Bupilo, ona mali a’ zwisizwe ki mutu ni mutu wa sicaba, kikuli mali a mutu ni mutu mw’a likanyelizwe, ni mw’a ikupulela mutu mwa pilu ya hae, ku a tisa mwa Ndu ya [Muñ’a] Bupilo. Baprisita inge ba amuhele ku mutu ni mutu ye ba zibana ni yena; mi ba lukise mamota a sinyehile, kakai ni kakai mo ku ka bonelwa.”—2 Malena 12:4, 5.

Batu ne ba fanile linubu ka ku itatela. Kono baprisita ne ba sa ezi musebezi wa bona wa ku lukisa tempele ka pilu kaufela. Kacwalo mulena a ikatulela ku eza musebezi wo mi a laela kuli batu ba beyange linubu kaufela mwa likwati le li ipitezi le ne li lukisizwe. A beya Jehoyada kuli ibe yena muzamaisi, mi taba yeo i ñozwi cwana kuli: “Muprisita Jehoyada a bata sibulukelo sa likwati, a punya lisuba fa sikwahelo sa sona, a si beya fakaufi ni aletare, kwa lizoho la bulyo ku mutu ya kena mwa Ndu ya [Muñ’a] Bupilo; mi baprisita ba ba ne ba libelela fa munyako, ba beya mwateñi mali kaufela a’ tiswa mwa Ndu ya [Muñ’a] Bupilo. Ha ba bona kuli mali ki a mañata mwa sibulukelo, muñoli wa mulena ni muprisita yo muhulu, ne ba taha, ku t’o bala mali a’ fumanwi mwa Ndu ya [Muñ’a] Bupilo, ba a beya mwa mikotana.  Mali a’ balilwe ne ba a beya mwa mazoho a ba ba eza musebezi, bona ba ba ukumela musebezi wa Ndu ya [Muñ’a] Bupilo; bona bao, ne ba lifa ba ba beta likota ni ba ba yaha, ba ba nze ba lukisa mwa Ndu ya [Muñ’a] Bupilo. Ba lifa ni ba ba yaha ka macwe, ni ba ba beta macwe, kuli ba leke likota ni macwe a’ betilwe a ku lukisisa mamota a’ sinyehile a Ndu ya [Muñ’a] Bupilo, ni ku lifa se si tokwahala kaufela mwa misebezi ya ku lukisa Ndu ya [Muñ’a] Bupilo.”—2 Malena 12:9-12.

Batu ne ba ngile muhato ka pilu kaufela. Ndu ya Jehova ya ku lapelela teñi ne i yahilwe sinca mi bulapeli bwa hae bwa zwelapili ka nzila ye kutekeha. Kona kuli mali kaufela a n’a filwe sina nubu n’a itusisizwe hande. Mulena Joasi n’a boni teñi kuli mali ao a itusiswa hande.

Kacenu kopano ya Jehova ya fa lifasi i bona teñi kuli mali kaufela a filwe sina nubu a itusiswa hande ili ku zwisezapili bulapeli bwa Jehova, mi Bakreste ba niti ba ngile muhato o swana ni wo ne ba ngile Maisilaele ba kwaikale—wa ka pilu kaufela. Mwendi mu ba bañwi ba ba ne ba file linubu za ku tusa musebezi wa za Mubuso mwahal’a silimo sa sebelezo sa ñohola. Ha lu boneñi linzila ze ñwi za mo li itusiselizwe linubu za mina.

KU HATISA

Mwa lifasi kaufela, ne ku hatisizwe lihatiso ze latelela kuli li itutiwe ni ku abelwa kwa batu:

• Libuka: 47,490,247

• Libukanyana: 6,834,740

• Libroshuwa: 167,854,462

• Likalenda: 5,405,955

• Limagazini: 1,179,266,348

• Matrakiti: 440,995,740

• Lividio: 3,168,611

Lihatiso li hatisezwa mwa Africa, North America, Central America, South America, Asia, Yurope, ni mwa lioli za liwate la Pacific—ili linaha ze eza 19 hamoho.

“Ki na Katelyn May. Ni wa lilimo ze 8. Ni na ni $28 (K130, 000) mi ni bata kuli mu itusise yona kwa ku lifela mishini ye hatisa. Kina kaizel’a mina wa mwanana, Katelyn.”

“Lubasi lwa luna ne lu kopani ku buhisana ka za mishini ye minca ye hatisa. Bana ba luna, wa lilimo ze 11 ni wa lilimo ze 9, ba ikatulela ku nga fa mali a ne ba bulukile mwa panga ni ku a fa sina nubu. Lu tabile ku lumela nubu ya bona ye hamoho ni ya luna.”

 KU YAHA

Ki ye ye miñwi ya mingendenge ya buyahi ye ezizwe ili ku tusa misebezi ya Lipaki za Jehova:

• Mandu a Mubuso mwa linaha ze shebile: 2,180

• Mandu a Mikopano: 15

• Mitai: 10

• Baitateli ba ba eza sebelezo ya nako kaufela mwa linaha li sili: 2,342

“Sunda ye felile ne lu kopanezi lwa pili mwa Ndu ya luna ya Mubuso ye nca. Lu tabile hahulu ku ba ni sibaka se sinde sa ku lumbekela teñi Ndat’a luna, Jehova Mulimu. Lu itumela ku Jehova ni ku mina ka ku lu tusa ku yaha Mandu a Mubuso a mañata a tokwahala. Kaniti Ndu ya luna ya Mubuso ki siluo sa butokwa hahulu mwa silalanda.”—Chile.

“Mizwale ni likaizeli ba itebuha hahulu tuso ye fiwa ki kopano ya Jehova. Ni la kacenu le, lu sa bulelanga za nako ye nde ye ne lu tandile ni sikwata sa bayahi.”—Moldova.

“Cwanoñu fa na ni musal’a ka ne lu ezize mukiti wa bu-35 wa ku hupula sinawenga sa luna. Ne lu sweli ku lika ku singanyeka ze lu ka lekelana fa mukiti, mi lwa hupula ku kutiseza Jehova ni kopano ya hae nto ye ñwi, kakuli kwand’a tuso ya Jehova ni kopano ya hae, ne lu si ke lwa kondisa mwa linyalo la luna. Lu bata kuli mali e lu lumezi a itusiswe kwa ku yaha Ndu ya Mubuso mwa naha ye ñwi ye shebile.”

“Kihona ni sa z’o yola lifa la ka, mi bakeñisa kuli lika ze ni ‘bata’ ki ze nyinyani mi ze ni tokwa zona mane ki ze nyinyani ni ku fita, ni bata kuli mu amuhele mali e ni lumezi kuli a tuse kwa ku yaha Mandu a Mubuso a tokwahala hahulu mwa linaha ze ñata.”

 KU TUSA BA BA TAHEZWI KI LIKOZI

Mwa mazazi a maungulelo a, likozi hañata li ezahalanga ka sipundumukela. Lipaki za Jehova ba bañata ba fanga linubu ze tuna za musebezi wa mwa lifasi kaufela ilikuli mizwale ba bona mwa libaka ze tahezwi ki kozi ba tusiwe. Ki ze ze ñwi za libaka m’o Lipaki za Jehova ba tusize ba ne ba tahezwi ki kozi:

• Africa

• Asia

• Sibaka sa Caribbean

• Lioli za liwate la Pacific

“Na ni bo munn’a ka lu bata ku itumela hahulu ku mina ka ku lu lumela lituso mwa nako ye ne lu taselizwe ki ñuli ye ne sinyize liluo la luna. Ne lu konile ku yaha sinca situwa sa ndu ya luna. Lwa itumela luli ka ku lu lukiseza tuso ya ka bubebe-bebe ye ne mu lu file.”

“Ki na Connor, mi ni wa lilimo ze 11. Ha ne ni boni sinyehelo ye ne bile teñi kabakala mezi a tsunami, na bata ku fa tuso. Ni sepa kuli nubu ye i ka tusa mizwale ni likaizeli za ka.”

 BATANGA BA NAKO KAUFELA BA BA MWA SEBELEZO YE IPITEZI

Bakreste ba sikai ba eza musebezi wa ku hasanya evangeli ka nako kaufela kamba ku sebeleza fa mahae a Betele ka nako kaufela. Baitateli ba bañwi ba ba beleka ka nako kaufela ba tusiwa ki linubu ze fiwa ka ku itatela, mi ba bañwi ba bona ki ba:

• Balumiwa: 2,635

• Baokameli ba maeto: 5,325

• Ba lubasi lwa Betele: 20,092

“Bakeñisa kuli ka nako ya cwale [mushimani wa lilimo ze keta-lizoho] ha ni koni ku yo sebeleza fa Betele, ni bata ku lumela nubu ye ka lilato le lituna. Ha ni ka hula, ni ka ya kwa Betele ku yo sebeza ka t’ata.”

Ku Zwisezapili Musebezi wa ku Luta za Bibele

Jesu Kreste n’a file balateleli ba hae musebezi wa kuli ba “lute macaba kaufela.” (Mateu 28:19) Ka ku mamela manzwi ao, Lipaki za Jehova ba patehile ku kutaza ni ku luta lushango lwa Bibele mwa linaha ze 235. Ba hatisa ni ku abela lihatiso za litaba za Bibele mwa lipuo ze 413.

Ka niti nubu ya butokwa ka ku fitisisa ya kona ku fa Mukreste kuli a tuse batu ba bañata ku ituta ka za Mulimu ni milelo ya Hae ki nako ya hae. Lipaki za Jehova ba fanile nako ni m’ata a bona ka buñata kuli ba tuse batu ba bañwi. Hape ba fana linubu za mali ka buñata, mi linubu za bona kaufela, ka linzila ze fapahana-fapahana, li tusize kwa ku zibahaza libizo la Jehova ni milelo ya hae mwa lifasi kaufela. Haike Jehova a zwelepili ku fuyaula buikatazo bo bwa ku tusa ba bañwi ku ituta ze ñata ka za hae. (Liproverbia 19:17) Buitateli bo bu cwalo bwa ku tusa ba bañwi bu tabisa pilu ya Jehova!—Maheberu 13:15, 16.

[Mbokisi fa likepe 28-30]

Linzila Zeo Ba Bañwi ba Iketela ku Fana ka Zona

LINUBU ZA MUSEBEZI WA MWA LIFASI KAUFELA

Ba bañata ba beyanga kwatuko mali a ku beya mwa tumbokisi twa linubu to tu ñozwi kuli “Linubu za Musebezi wa mwa Lifasi Kaufela—Mateu 24:14.”

Ka kweli, liputeho li lumelanga mali ao kwa ofisi ya Lipaki za Jehova ya mwa naha ya zona. Linubu za mali ze fiwa ka ku itatela hape z’a kona ku lumelwa kwa Watch Tower Bible and Tract Society of Pennsylvania, Box 33459, Lusaka 10101. Macheke a lumelwa kwa keyala ye fahalimu a swanela ku lifiwa kwa “Watch Tower.” Lika za bukabali ze pangilwe fa macwe a butokwa kamba lika fela ze ñwi za butokwa ni zona za kona ku fiwa sina nubu. Liñolo le li talusa ka bukuswani kuli lika zeo ki mpo ya ka ku itatela li lukela ku zamaelela ni linubu zeo.

TUKISO YA LINUBU ZA KA TUMELELANO

Mali a kona ku beiwa mwa pabalelo ya Watch Tower kuli a itusiswe mwa lifasi kaufela. Nihakulicwalo mutu ya fa nubu wa kona ku kutisezwa mali a hae haiba a’ a kupa. Haiba mu bata litaba ze ñwi, shangwe mu ñolele kwa “Treasurer’s Office” (Ofisi ya Mubuluki wa Sikwama) ka ku itusisa keyala ye bonisizwe fahalimu.

MILELO YA KU FANA

Kwand’a linubu za mali ze fiwa luli, ku na ni mifelo ye miñwi ya ku tusa ka yona sebelezo ya Mubuso mwa lifasi kaufela. Yeo i kopanyeleza:

Mali a Silelezo: Watch Tower ya kona ku ñolwa kuli ite i fiwe mali a bulukezwi ku itusiswa ki ba bañwi hamulaho wa lifu la mutu kamba mali a fiwa mutu ya tuhela musebezi.

Liakaunti za kwa Panga: Mali a bulukiswa mwa panga, mapampili a mali a bulukisizwe, kamba mali a fiwa mutu ya tuhela musebezi a kona ku beiwa mwa pabalelo ya Watch Tower kamba kuli a fiwe Watch Tower fa lifu la mutu, ka ku ya ka ze i tokwa panga yeo.

Ma-Stock ni Ma-Bond: Ma-stock ni ma-bond a kona ku fiwa kwa Watch Tower sina mpo luli.

Miyaho ya ka Butu ni Ndao: Miyaho ya ka butu kamba ndao ye kona ku lekiswa ya kona ku fiwa luli sina mpo, kamba haiba ki ndu mwa pila mufi y’o, kipeto wa kona ku zwelapili ku pila mwateñi ku fitela a shwa. Mu ñolele kwa ofisi ya mutai mwa naha ya habo mina pili mu si ka ñolisa kale za ku fa muyaho kamba mubu wa mina.

Ma-Will ni ma-Trust: Tutu kamba mali a kona ku fiwa kwa Watch Tower ka ku itusisa will (pampili ye bonisa mwa batela mutu kuli libyana za hae li abelwe ha s’a shwile) ye ñozwi ka mulao, kamba Watch Tower ya kona ku kalimiwa nto ye ñwi kuli i itusise yona, ili ye bizwa trust. Trust ye fiwa kwa kopano ya bulapeli i kona ku tahisa kuli mutu a si ke a telela lika ze ñwi.

Sina ka mo i taluseza pulelo ya kuli “milelo ya ku fana,” linubu ze cwalo li tokwa hahulu kuli mufani a nahanisise hande. Kuli mu tuse batu ba ba itakaleza ku fumana tuso kwa musebezi wa Lipaki za Jehova mwa lifasi kaufela ka ku itusisa mifuta ya ku Fana, ku lukisizwe broshuwa ya mwa Sikuwa ni mwa si-Spanish ye na ni toho ye li Charitable Planning to Benefit Kingdom Service Worldwide. Broshuwa yeo ne i ñozwi kuli i fe litaba fa linzila ze ñata za mo li kona ku felwa linubu ibe cwale kamba mutu ha sa timezi. Ba bañata ha se ba balile broshuwa yeo ni ku nyaka milao ya naha ya bona kamba ku buza baelezi ba za mutelo, se ba konile ku tusa kwa musebezi wa bulapeli ni wa ku tusa batu o ba eza Lipaki za Jehova mwa lifasi kaufela ni ku hulisa lituso za bona za mutelo ha ba nze ba eza cwalo. Haiba mu bata broshuwa ye mwa kona ku i kupa kwa Ofisi Ya Milelo ya Ku Fana.

Kuli mu utwe ze ñata, mwa kona ku buza ba Ofisi Ya Milelo ya Ku Fana, ka ku ñola kamba ka luwaile, kwa keyala ye bonisizwe kwatasi kamba mwa kona ku ñolela ofisi ya Lipaki za Jehova ya mwa naha ya mina.

Treasure’s Office

Watch Tower Bible and Tract

Society of Pennsylvania

Box 33459, Lusaka 10101

Telephone: (01) 272062

[Manzwi a bañi ba siswaniso fa likepe 27]

Faithful video: Stalin: U.S. Army photo