Kana Mu Ka Benyisa Kanya ya Mulimu?
Kana Mu Ka Benyisa Kanya ya Mulimu?
“Luna . . . ba ba benyisa kanya ya Jehova sina liiponi.”—2 MAKORINTE 3:18, NW.
1. Mushe n’a boniñi, mi ne ku ezaheziñi hasamulaho?
PONO yeo n’e li ye ñwi ya lipono ze sabisa hahulu ze kile za bonwa. Mushe ha n’a li a nosi fa Lilundu la Sinai, n’a filwe nto ye ipitezi ya n’a kupile. N’a lumelelizwe ku bona nto ye si ka bonwa kale ki mutu—yona kanya ya Jehova. Ki niti, Mushe n’a si ka bona Jehova ka sibili. Jehova u benya hahulu mi ha ku na mutu ya kona ku mu bona ni ku zwelapili ku pila. Kono Jehova n’a kwahezi Mushe ka “lizoho” kuli a mu sileleze ku fitela Yena a fita, mwendi ka ku itusisa lingeloi la n’a lumile. Kihona cwale Jehova a lumeleza Mushe ku bona liseli le ne li benya mwamulaho wa kanya ya hae ye n’e fitile. Jehova hape s’a bulela ni Mushe ka lingeloi. Bibele i talusa ze n’e ezahezi hasamulaho kuli: “Mushe h’a shetumuka fa lilundu la Sinai . . . litalo la pata ya hae la benya kabakala ku ambaula ni [Muñ’a] Bupilo.”—Exoda 33:18–34:7, 29.
2. Muapositola Paulusi n’a ñoziñi ka za kanya ye ba benyisa Bakreste?
2 Mu nge kuli kambe ne mu li ni Mushe fa lilundu leo. Kana ne mu si ke mwa nyakalala ku bona liseli le li siyezi mwamulaho wa kanya ya Ya-M’ata-Kaufela ni ku teeleza kwa manzwi a hae? Ki tohonolo kwa butuna ye ne mu ka ba ni yona ha ne mu ka shetumuka fa Lilundu la Sinai hamoho ni Mushe, yena muyemeli wa bulikani bwa Mulao! Kono kana mwa ziba kuli ku na ni linzila zeo Bakreste ba niti ba benyisa ka zona kanya ya Mulimu ku fita ni mwa n’a i benyiselize Mushe? Taba yeo ya butokwa i fumaneha mwa liñolo le ne li ñozwi ki muapositola Paulusi. N’a ñozi kuli Bakreste ba ba tozizwe ba [“benyisa kanya ya Jehova sina liiponi,” NW]. (2 Makorinte 3:7, 8, 18) Hape kw’a kona ku bulelwa kuli Bakreste ba ba na ni sepo ya ku pila fa lifasi-mubu ni bona ba benyisa kanya ya Mulimu.
Bakreste Mo Ba Benyiseza Kanya ya Mulimu
3. Lu fitile cwañi fa ku ziba hande Jehova ku fita mwa n’a mu zibezi Mushe?
3 Lu kona ku benyisa ka mukwa ufi kanya ya Mulimu? Lwa li ku ba lu bone Jehova kamba ku mu utwa ka nzila ya n’a mu boni ni ku mu utwa ka yona Mushe. Kono lu fitile fa ku ziba hande Jehova ku fita mwa n’a mu zibezi Mushe. Jesu n’a si ka taha sina Mesiya konji hasamulaho wa lilimo ze 1,500 ku zwa fa n’a shwezi Mushe. Kabakaleo Mushe n’a si ka ziba kuli Mulao ne u ka talelezwa cwañi ka Jesu, ya n’a shwile ni ku liulula batu kwa butanga bo bu maswe bwa sibi ni lifu. (Maroma 5:20, 21; Magalata 3:19) Hape Mushe n’a konile fela ku utwisisa hanyinyani bunde bwa mulelo wa Jehova, o tomile fa Mubuso wa Mesiya ni Paradaisi ye u ka tisa. Kacwalo luna ha lu si ka bona kanya ya Jehova ka meto a luna tenyene kono lu mu bona ka meto a luna a tumelo ye tomile fa lituto za Bibele. Hape ha lu si ka utwa linzwi la Jehova ka lingeloi le li lumilwe kono lu li utwa ka ku bala Bibele, sihulu Libuka za Evangeli, ze tolongosha hande lituto ni bukombwa bwa Jesu.
4. (a) Bakreste ba ba tozizwe ba benyisa cwañi kanya ya Mulimu? (b) Ba ba na ni sepo ya ku pila fa lifasi-mubu ba kona ku benyisa kanya ya Mulimu ka linzila lifi?
4 Nihaike Bakreste ha ba bonisi kanya ya Mulimu ka ku benyisa liseli luli fa lipata, lipata za bona li benya hande ha ba nze ba taluseza ba bañwi ka za butu bwa Jehova bo bu benya ni milelo ya hae. Mupolofita Isaya n’a polofitile kale ka za nako ya luna kuli batu ba Mulimu ne ba ka “bubanisa kanya ya [Jehova] mwahal’a macaba.” (Isaya 66:19) Ku zwa f’o, lu bala cwana kwa 2 Makorinte 4:1, 2: “Ka ku bona kuli lu beilwe fa sebelezo yeo . . . , lu tuhezi linto ze patwa, ili ze swabisa; ha lu zamayi ka mano a maswe, ha lu zwakanyi Linzwi la Mulimu; kono ka ku bonahaza niti, lu ipaka hande kwa lizwalo la mutu ni mutu, fapil’a Mulimu.” Ba n’a talusa luli Paulusi n’e li Bakreste ba ba tozizwe, bona ba ba beilwe “fa sebelezo ya bulikani bo bunca.” (2 Makorinte 3:6) Kono sebelezo ya bona i amile batu ba bañata ba ba fumani sepo ya ku pila ku ya ku ile fa lifasi-mubu. Sebelezo ya likwata ze peli zeo i ama ku benyisa kanya ya Jehova isiñi fela ka lituto ze ba luta kono ni ka likezo za bona. Lu na ni buikalabelo ni tohonolo ya ku benyisa kanya ya Mulimu Muambakani ya pahami!
5. Ku onyoka kwa luna kwa kwa moya ku paka nto mañi?
5 Kacenu le taba ye nde ya Mubuso wa Mulimu i sweli ya kutazwa mwa lifasi kamukana, ku likana ni mwa n’a bulelezi cimo Jesu. (Mateu 24:14) Batu ba macaba, mishobo, masika, ni lipuo kamukana ba ngile muhato ka tukufalelo ku likana ni taba ye nde mi ba cincize bupilo bwa bona kuli ba eze tato ya Mulimu. (Maroma 12:2; Sinulo 7:9) Sina mo ne ba ezelize Bakreste ba kwa makalelo, ha ba koni ku tuhela ku bulela ze ba boni ni ze ba utwile. (Likezo 4:20) Batu ba ba fitelela 6 milioni, ili palo ye tuna ku fita palo ifi kamba ifi ya kwamulaho, ba sweli ba benyisa kanya ya Mulimu kacenu. Kana ni mina mu ba bañwi ba ku bona? Ku onyoka kwa kwa moya kwa batu ba Mulimu ki bupaki bo bu kolwisa bwa kuli Mulimu wa ba fuyaula ni ku ba sileleza. Ku tiya kwa lila ze lu potolohile ki bupaki bo butuna bwa kuli lu na ni moya wa Jehova. Ha lu boneñi libaka ha ku li cwalo.
Batu ba Mulimu Ha Ba Na ku Kuziswa
6. Ki kabakalañi ha mu tokwa tumelo ni bundume kuli mu yemele Jehova?
6 Lu ngeñi kuli mu bizizwe mwa kuta ku yo fa bupaki bwa ku lwanisa sibangoki ya buhali. Mwa ziba kuli sibangoki y’o u na ni kopano ye m’ata ni kuli u ka itusisa nto kaufela ye konahala kuli a mi tibele ku mu shongolola. Kuli mu fe bupaki bwa ku lwanisa sibangoki y’o mu ka tokwa ku ba ni bundume hamohocwalo ni buikolwiso bwa kuli muuso u ka mi sileleza ku yena. Ni luna lu mwa muinelo o swana. Ha lu paka za Jehova ni milelo ya hae, lu lwanisa Satani Diabulosi, ku mu shongolola kuli ki mubulai ni lihata le li puma lifasi kamukana. (Joani 8:44; Sinulo 12:9) Kuli mu yemele Jehova ni ku lwanisa Diabulosi mu tokwa ku ba ni tumelo hamohocwalo ni bundume.
7. Satani u na ni m’ata a kuma kai, mi u likanga ku ezañi?
7 Ki niti, Jehova ki yena Ya Pahami ka ku Fitisisa. M’ata a hae a fitela kwahule-hule m’ata a Satani. Lwa kona ku ikolwisa kuli Jehova u na ni m’ata kono hape u bata hahulu ku lu sileleza ha lu nze lu mu sebeleza ka busepahali. (2 Makolonika 16:9) Niteñi Satani ki yena mulena wa badimona ni lifasi la batu ba ba zwile ku Mulimu. (Mateu 12:24, 26; Joani 14:30) Bakeñisa kuli u kwalezwi mwa lifasi mi u “halifile maswe,” Satani u lwanisa hahulu batanga ba Jehova mi u itusisa lifasi le li mwa m’ata a hae kuli a like ku kwala milomo ya bote ba ba kutaza taba ye nde. (Sinulo 12:7-9, 12, 17) U itusisañi kuli a eze cwalo? U itusisa linzila ze talu ze zibahala.
8, 9. Satani u itusisa cwañi lilato le li maswe, mi ki kabakalañi ha lu swanela ku keta balikani ba luna ka tokomelo?
8 Nzila ye ñwi y’a itusisanga Satani kuli a like ku lu yaulula ka yona ki lipilaelo za bupilo. Batu mwa mazazi a maungulelo a ki ba ba lata mali, ki baitati, mi ki ba ba lata minyaka. Ha ba lati za Mulimu. (2 Timotea 3:1-4) Buñata bwa batu ba tupwikezi mwa misebezi ya bupilo mi ‘ha ba lemuhi’ taba ye nde ye lu ba taluseza. Ha ba tabeli fela ku ituta niti ya mwa Bibele. (Mateu 24:37-39) Moya o cwalo wa kona ku lu yambukela, ili ku lu ozelisa kwa moya. Haiba lu ituhelela ku kenwa ki lilato la bufumu ni minyaka ya bupilo, lilato la luna la ku lata Mulimu li ka fola.—Mateu 24:12.
9 Kabakaleo Bakreste ba keta balikani ba bona ka tokomelo. Mulena Salumoni n’a ñozi kuli: “Ya kopana ni ba ba butali, ni yena u ka talifa; kono ya twaelana ni matanya u ka utwa butuku.” (Liproverbia 13:20) Haike lu ‘kopanange’ ni batu ba ba benyisa kanya ya Mulimu. Mi ku eza cwalo kwa tabisa luli. Ha lu kopana ni mizwale ni likaizeli ba luna ba kwa moya kwa mikopano ya luna ni ka linako ze ñwi, lu susuezwanga ki lilato la bona, tumelo ya bona, tabo ya bona, ni butali bwa bona. Siango se sinde cwalo si lu tiisanga kuli lu tundamene mwa bukombwa bwa luna.
10. Satani u itusisize cwañi sheununo kuli a lwanise ba ba benyisa kanya ya Mulimu?
10 Nzila ya bubeli yeo Satani a likanga ka yona ku tuhelisa Bakreste kaufela ku benyisa kanya ya Mulimu ki sheununo. Haki hona a kala ku itusisa mano a hae ao. Mwahal’a bukombwa bwa hae bwa fa lifasi-mubu, Jesu Kreste n’a sheunuzwi, ili ku sehiwa, ku somiwa, ku shwaulwa, mane ni ku kwelwa mati. (Mareka 5:40; Luka 16:14; 18:32) Bakreste ba kwa makalelo ni bona ne ba somiwa. (Likezo 2:13; 17:32) Batanga ba Jehova ba mwa miteñi ya cwale ni bona ba nyandiswa ka nzila ye swana. Manzwi a muapositola Pitrosi a bonisa kuli ne ku ka swana inge kuli ba bulelwa kuli ki “bapolofita ba buhata.” Pitrosi n’a bulezi cimo kuli: “Mwa mazazi a maungulelo, ku ka taha basheununi ba ba tezi busomi, ba ba zamaya ka litakazo za bona luli; ba ka sheununa, ba li: I kai sepiso ya ku taha kwa hae? Kakuli . . . linto kamukana li nze li itulezi mo ne li inezi kwa makalelo ha li eziwa.” (2 Pitrosi 3:3, 4) Batu ba Mulimu ba sheununwa kuli ba siyalezi. Likuka za Bibele za muzamao li ngiwa kuli ki za kwa santulu. Kwa batu ba bañata, lushango lo lu kutaza lu ngiwa kuli ki butanya. (1 Makorinte 1:18, 19) Ka ku ba Bakreste, lu kana lwa sheununwa kwa sikolo, kwa mubeleko, mi fokuñwi nihaiba mwa lubasi. Ha lu kuteli mwamulaho kono lu zwelapili ku benyisa kanya ya Mulimu ka bukutazi bwa luna, inze lu ziba sina Jesu mwa n’a zibela kuli Linzwi la Mulimu ki yona niti.—Joani 17:17.
11. Satani u itusisize cwañi nyandiso kuli a like ku kuzisa Bakreste?
11 Nzila ya bulalu y’a itusisa Diabulosi kuli a like ku lu kuzisa ka yona ki twaniso kamba nyandiso. Jesu n’a bulelezi balateleli ba hae kuli: “Ba ka mi swalisa batu kuli mu nyandiswe, mi ba mi bulaye; mi mu ka toiwa ki macaba kaufela kabakala Libizo la ka.” (Mateu 24:9) Ka niti luna Lipaki za Jehova lu nyandisizwe maswe mwa libaka ze fitana-fitana za lifasi. Lwa ziba kuli kale-kale k’o Jehova n’a bulezi cimo kuli ne ku ka ba ni sitoyo mwahal’a batu ba ba sebeleza Mulimu ni ba ba sebeleza Satani Diabulosi. (Genese 3:15) Hape lwa ziba kuli muta lu itiisa ha lu nyandiswa, lu yemela swanelo ya bubusi bwa Jehova bwa pupo kaufela. Ku ziba taba yeo kwa kona ku lu tiisa nihaiba ha lu li mwatas’a nyandiso ye sabisa. Ha ku na nyandiso ye ka lu kuziseleza haiba lu tundamena ku benyisa kanya ya Mulimu.
12. Ki kabakalañi ha lu swanela ku taba ha lu nze lu zwelapili ku sepahala niha lu lwaniswa ki Satani?
12 Kana mwa itiisanga ha mu pepezwa ki lifasi ni ku zwelapili ku sepahala niha mu sheununwa kamba ku nyandiswa? Haiba ki cwalo mu zibe mu swanela ku ba ba ba tabile. Jesu n’a kolwisize batu ba ne ba ka mu latelela kuli: “Mu ka ba ni mbuyoti ha ba mi tapaula kabakala ka, ha ba mi nyandisa, ba mi tameleza bumaswe kamukana ka buhata. Mu wabelwe mi mu nyakalale, kakuli mupuzo wa mina ikaba o mutuna kwa lihalimu; kakuli ki mo ba nyandiselize bapolofita ba ba ne ba li teñi pili ku mina.” (Mateu 5:11, 12) Buitiiso bwa mina bu paka kuli moya wa Jehova o kenile, ili o m’ata, u fahalimwa mina, ku mi tiisa kuli mu benyise kanya ya hae.—2 Makorinte 12:9.
Lu Tiiswa ki Jehova
13. Ki lifi libaka le lituna ha lu tiiseza mwa bukombwa bwa luna bwa Sikreste?
13 Libaka le lituna ha lu tiiseza mwa bukombwa kikuli lwa lata Jehova mi lu tabela ku benyisa kanya ya hae. Batu ba hanelelanga ku likanyisa batu be ba lata ni ku kuteka, mi Jehova Mulimu ki yena ya swanelwa ku likanyiswa ku fita mutu ufi kamba ufi. Bakeñisa lilato la hae le lituna, n’a lumile Mwan’a hae fa lifasi kuli a to paka niti ni ku liulula batu ba ba utwa. (Joani 3:16; 18:37) Ni luna, sina Mulimu, lu lakaza kuli batu kaufela ba bake mi ba punyuhe; ki lona libaka ha lu kutazanga ku bona. (2 Pitrosi 3:9) Takazo ya luna yeo, hamohocwalo ni ku tundamena kwa luna ku likanyisa Mulimu, li lu susueza ku zwelapili ku benyisa kanya ya hae ka ku peta bukombwa bwa luna.
14. Jehova u lu fanga cwañi m’ata a ku itiisa mwa bukombwa?
14 Kono ko ku zwa luli m’ata a ku itiisa mwa bukombwa bwa Sikreste ki ku Jehova. U lu tiisanga ni ku lu matafaza ka moya wa hae, kopano ya hae, ni ka Linzwi la hae, yona Bibele. Jehova ‘u tiisanga’ ba ba itatela ku benyisa kanya ya hae. U alabanga litapelo za luna ni ku lu fa butali bwa ku tula miliko. (Maroma 15:5; Jakobo 1:5) Hape Jehova h’a lu tuhelelangi ku kena mwa miliko ifi kamba ifi ye lu sa koni ku tiyela. Haiba lu sepa Jehova, u ka lu fa nzila ya ku zwa ku yona kuli lu zwelepili ku benyisa kanya ya hae.—1 Makorinte 10:13.
15. Ki nto mañi ye lu tusa ku itiisa?
15 Buitiiso bwa luna mwa bukombwa bu paka kuli lu na ni moya wa Mulimu. Ka mutala: Lu ngeñi kuli mutu yo muñwi u mi kupile ku zamaya mu abela mufuta o muñwi wa sinkwa fa ndu ni ndu, ku si na tifo. U mi laela ku eza musebezi wo ka mali a mina ni ka nako ya mina beñi. Mi kapili-pili mu lemuha kuli batu ba ba tabela sinkwa sa mina ki ba banyinyani fela; ba bañwi mane ba ka mi lwanisa ha mu nze mu ikataza ku abela sinkwa seo. Kana mu nahana kuli mu ka zwelapili ku eza musebezi wo ka kweli ni kweli, silimo ni silimo? Ha lu sepi cwalo. Kono cwale mwendi mu ikatalize ku shaela taba ye nde ka ku itusisa nako ni mali a mina ka lilimo na lilimo. Ki kabakalañi? Kana haki kabakala kuli mwa lata Jehova mi ka moya wa hae u fuyauzi buikatazo bwa mina ka ku mi tusa ku itiisa? Kona mo ku inezi luli!
Musebezi O Si Ke wa Libalwa
16. Buitiiso bwa luna mwa bukombwa bu lu tusañi, luna ni ba ba lu utwa?
16 Bukombwa bwa bulikani bo bunca ki mpo ya butokwa hahulu. (2 Makorinte 4:7) Ni bukombwa bwa Sikreste bo bu eziwa ki lingu ze ñwi mwa lifasi kamukana ki bwa butokwa hahulu. Sina Paulusi mwa n’a ñolezi Timotea, ha mu nze mu zwelapili ku itiisa mwa bukombwa bwa mina, mwa kona ku ‘ipilisa ni ku pilisa ni ba ba mi utwa.’ (1 Timotea 4:16) Mu nahane z’a talusa manzwi ao. Taba ye nde ye mu kutaza i fa ba bañwi kolo ya ku pila ku ya ku ile. Mwa kona ku itama silikani se si tiile ni batu be mu tusa kwa moya. Mu nahane fela tabo ye mu ka ba ni yona ha mu ka pila ku ya ku ile mwa Paradaisi hamoho ni batu be mu tusize ku ituta za Mulimu! Kaniti ha ba na ku libala ni kamuta buikatazo bwa mina bwa ku ba tusa. Yeo ki taba ye tabisa luli!
17. Ki kabakalañi nako ya luna ha i li ye ipitezi haisali?
17 Mu pila mwa nako ye ipitezi haisali. Taba ye nde ha i sa tola i kutazwa hape kwa batu ba ba zwile ku Mulimu. Nuwe n’a pilile mwa nako ye cwalo, mi n’a iponezi lifasi ha li sinyiwa. U lukela ku ba ya n’a tabile hahulu ku ziba kuli n’a petile mulelo wa Mulimu ka busepahali ha n’a yahile aleka, mi ku eza cwalo ne ku mu punyusize, yena ni lubasi lwa hae. (Maheberu 11:7) Ni mina mwa kona ku taba cwalo. Mu nahane fela mo mu ka ikutwela mwa lifasi le linca ha mu ka iheta ni ku bona misebezi ye mu petile mwa mazazi a a maungulelo, inze mu ziba kuli ne mu ezize za Mubuso ka mo ne mu konela kaufela.
18. Ki bufi buikolwiso ni susuezo yeo Jehova a fa kwa batanga ba hae?
18 Kacwalo he haike lu zwelepili ku benyisa kanya ya Mulimu. Haiba lu eza cwalo ha lu na ku libala taba yeo ni kamuta. Jehova ni yena wa hupulanga misebezi ya luna. Bibele i lu bulelela manzwi a susueza a: “Mulimu hasi ya si ka luka, kuli a libale misebezi ya mina, ni lilato le mu bonisize kwa Libizo la hae, mwa sebelezo ya ku tusa balumeli, ili ye mu nze mu ba sebeleza ni ka nako ye. Kono lu shukelwa kuli mutu ni mutu ku mina a bonise ku tukufalelwa cwalo, kuli a be ni sepo ye tezi, ku isa kwa mafelelezo. Mu si ke mwa fetuha ba ba buzwa; kono mu likanyise ba ba fumani ku yola lisepiso, ka tumelo ni ka ku itiisa.”—Maheberu 6:10-12.
Kana Mwa Kona ku Talusa?
• Bakreste ba benyisa cwañi kanya ya Mulimu?
• Ki lifi linzila ze ñwi z’a itusisa Satani kuli a like ku kuzisa ka zona batu ba Mulimu?
• Ki bufi bupaki bo bu bonisa kuli lu na ni moya wa Mulimu?
[Lipuzo za Tuto]
[Siswaniso se si fa likepe 15]
Pata ya Mushe ne i benyize kanya
[Maswaniso a fa likepe 16, 17]
Lu benyisa kanya ya Mulimu mwa bukombwa bwa luna