Lilato la ku Lata Hahulu Maluo

“Haiba lu batanga lika ze ñata, u zibe ha ku na fo lu ka bulelela kuli kipeto.”—Piho ya ba Worldwatch Institute.

“LU BATAÑI? Lika kaufela. Lu li bata lili? Honafa.” Liloko leo ne li lokiwanga hahulu ki baituti ba kwa koleji mwa ma-1960. Kacenu lu kana lu sa utwi liloko leo luli, kono buniti bwa manzwi a lona bu sa li teñi. Kaniti, ku bonahala kuli kacenu kwa ikatazwa hahulu ku bata maluo a mañata.

Ku ba bañata, nto ya butokwa hahulu mwa bupilo ki ku ipumanela maluo ni sifumu. Jimmy Carter ya n’a li Mueteleli wa naha ya United States n’a kile a bulela kuli: “Batu ha ba sa zibwa ka ze ba eza kono se ba zibahala ka ze ba luwile.” Kana ku na ni nto ya butokwa ku fita maluo? Haiba ku na ni, ki nto mañi yeo, mi i na ni tuso mañi?