Bupaki bwa ku Tandalelwa mwa Simu ya Mexico Mo ku Bulelwa Sikuwa

HA N’A libelela mwa Atene ba n’a ka ya ni bona mwa musipili, muapositola Paulusi a fa bupaki bwa ku tandalelwa. Bibele i biha kuli: “N’a bulela . . . ni b’a katana ka zazi ni zazi fa patelo ya musika.” (Likezo 17:17) Mwa musipili wa hae wa ku zwa kwa Judea ku ya kwa Galilea, Jesu n’a kutalize ka ku tandalelwa ku musali wa Musamaria kwa lisima. (Joani 4:3-26) Kana mwa itusisanga kolo kaufela kwa ku bulela ka za taba ye nde ya Mubuso wa Mulimu?

Simu ya kwa Mexico mo ku bulelwa Sikuwa ki ye swanela hahulu kwa ku fa bupaki bwa ku tandalelwa. Bapoti ba yanga kwa libaka za ku ikatuluseza teñi, baituti ba kwa yunivesiti ba swalelelanga ku taha kwateñi, mi ba kwa linaha li sili ba ba tuhezi mibeleko mwa Mexico ba fumanehanga hahulu mwa li-park ni mwa macelo. Buñata bwa Lipaki za Jehova ba ba ziba Sikuwa se ba yeziseli ku kalisa lipuhisano ni batu ba ba cwalo. Mane, ba batanga kolo ya ku bulela ku mañi ni mañi y’a bonahala ku ba ya zwa kwa naha i sili kamba ya bulela Sikuwa. Ha lu boneñi mo ba ezezanga cwalo.

Ka linako ze ñata Lipaki ba ba zwa kwa linaha li sili ba ba belekela mwa simu mo ku bulelwa Sikuwa ba itibahazanga fela kwa batu ba ba bonahala kuli ki ba kwa linaha li sili ni ku ba buza ko ba zwa. Seo si konahalisanga hahulu kuli ku buziwe puzo ka za z’a eza Paki yo mwa Mexico ili nto ye mu fa kolo ya ku talusa za litumelo za Sikreste. Ka mutala, Gloria, y’a sebeleza ko ku na ni butokwi bo butuna mwa simu mo ku bulelwa Sikuwa mwa Oaxaca, u fumananga bunolo hahulu ku kalisa lipuhisano ka muatumelelo wo. Ha n’a kuta kwa ndu ku zwa kwa ku kutaza ka ku tandalelwa fa patelo ya tolopo yeo, Gloria a yemiswa ki bosinyalana ba kwa England. Wa musali a bulela ka ku makala kuli: “Ni komokile ku bona musali wa mutu yo munsu a zamaya mo mwa Oaxaca!” Ku fita ku ikutwa ku fosezwa, Gloria a seha, mi ba kalisa ku kandeka ka za libaka ha n’a li mwa Mexico. Musali yo a memela Gloria kwa ndu ya hae kuli a yo mu yumbula kofi. Ha se ba lumelelani, Gloria a fa musali yo Tora ya ku Libelela ni Awake!, kono a li hana, a li n’a sa lumeli kuli Mulimu u teñi. Gloria a alaba kuli n’a tabela ku ikambota ni batu ba ba sa lumeli kuli Mulimu u teñi mi n’a ka tabela ku utwa maikuto a hae fa taba ye li “Kana Lwa Tokwa Libaka za ku Lapelela Teñi?” Musali yo a amuhela, mi a li: “Haiba u ka ni kolwisa, u zibe u ka be u petile nto ye tuna luli.” Kwa latelela makandenyana a tabisa a’ sikai inze ku nwiwa kofi. Hamulaho bosinyalana bao ba ya kwa England, kono lipuhisano za zwelapili ka ku itusisa Intaneti.

 Gloria hape n’a kalisize ku ikambota ni Saron, muituti wa kwa Washington, D. C., ya n’a li mwa Oaxaca mwa n’a eza hamoho ni basali ba mwa sibaka seo musebezi wa ku tusa sicaba kuli a feleleze za lituto za hae ze pahami (master’s degree). Hamulaho wa ku babaza Saron ka za buikatazo bwa hae, Gloria a talusa libaka ha n’a li mwa Mexico. Seo sa tahisa puhisano ye nde ka za Bibele ni ka za seo Mulimu a ka ezeza isi babotana fela kono ni batu kaufela. Saron a bulela kuli ne li nto ye komokisa kuli nihaike n’a si ka ambola fateñi ni Lipaki kwa United States, yo muñwi wa batu ba pili ba n’a katani mwa Mexico ki yo muñwi wa Lipaki za Jehova! Saron a amuhela tuto ya Bibele mi a kalisa ku yanga kwa mikopano ya Sikreste onaf’o.

Batu ba bañata ba ba zwa kwa linaha li sili se ba ile kwa libaka za ku ikatuluseza teñi kwa linuka za mwa Mexico, ili ku bata sibaka se si bat’o swana ni paradaisi. Laurel u itusisanga yona takazo yeo kwa ku kalisa lipuhisano mwa Acapulco, ka ku buza batu haiba Acapulco ya swana hahulu ni paradaisi ku fita ko ba zwa ni ze ba lata ka za yona. Ku tuha f’o, wa talusa kuli lifasi kaufela li tuha li ba paradaisi ya luli. Muatumelelo w’o ne u mu tusize ku kalisa tuto ya Bibele ku musali wa kwa Canada ya n’a katani kwa ofisi ya dokota wa lifolofolo. Kana muatumelelo o swana w’a kona ku sebeza ko mu pila?

‘Mwa Mikwakwa ni mwa Mapatelo’

Hañata puhisano i kaliswanga mwa mikwakwa ni mwa mapatelo ka ku buza kuli: “Kana mwa ziba ku bulela Sikuwa?” Bayahi ba mwa Mexico ba bañata ba ziba kabakala mibeleko ya bona kamba kabakala kuli se ba kile ba pila mwa United States.

Bosinyalana ba Lipaki ne ba atumezi musali-muhulu cwana ya n’a kubiwa mwa sipula sa mawili ki nasi. Ba buza musali-muhulu yo haiba n’a ziba ku bulela Sikuwa. A alaba kuli n’a ziba kakuli n’a pilile lilimo ze ñata mwa United States. A amuhela Tora ya ku Libelela ni Awake!, za n’a si ka bala fateñi, mi a ba fa libizo la hae, la Consuelo, ni keyala. Ha ne ba ile kwa sibaka seo hamulaho wa mazazi a mane, ba fumana kuli neli ya ndu ya ku babalelela teñi basupali ye n’e zamaiswa ki masisita ba Katolika. Sapili, ne ku li t’ata ku bonana ni Consuelo kakuli masisita ne ba kakanya mi ba li Consuelo n’a si ke a ba amuhela. Bosinyalana ba susueza masisita bao kuli ba zibise Consuelo kuli ne ba tile ni kuli ne ba bata ku mu lumelisa. Consuelo a lumelela bosinyalana bao ku kena. Ku zwa onaf’o, musali-muhulu y’o wa lilimo ze 86 u ikozi tuto ya Bibele ya kamita, ku si na taba ni lipulelo za masisita bao za ku mu zwafisa. Hape s’a fumanehile kwa mikopano ye miñwi ya Sikreste.

Liproverbia 1:20 i li: “Butali bu huweleza mwa mikwakwa, bu tumusa kwa linzwi mwa mapatelo.” Mu bone seo mo ne si ezahalezi mwa patelo ya San Miguel de Allende. Zazi le liñwi kakusasa, Ralph n’a pakelezi ku atumela munna yo muñwi ya n’a matela mwa lilimo za ma-50 ya n’a inzi fa sipula sa mabala. Munna yo n’a makalile hahulu ku fiwa Tora ya ku Libelela ni Awake! mi a taluseza Ralph za mwa bupilo bwa hae.

N’a kile a lwana mwa ndwa ya Vietnam mi kabakala masitapilu a ku bona mafu a mañata hahulu n’a lembwalile maswe-maswe mwa  nako ya n’a li lisole. Kacwalo n’a zwisizwe kwa ndwa ni ku kutiswa kwa munganda. Teñi k’o, n’a filwe musebezi wa ku tapisanga litupu za masole kuli li iswe kwa United States. Cwale, hamulaho wa lilimo ze 30, n’a sa lolanga litolo ze maswe ni ku ikutwanga ku saba. Kakusasana w’o, ha n’a inzi fa patelo, n’a sweli ku lapelela tuso, mwa pilu.

Ralph a amuhela lihatiso ni memo ya ku ya kwa Ndu ya Mubuso. Hamulaho wa ku fumaneha kwa mukopano, a bulela kuli mwa lihora ze peli za n’a bile kwa Ndu ya Mubuso, n’a ikutwile mwangalwa lwapili mwa lilimo ze 30 ze felile. Munna y’o n’a til’o ina liviki li sikai fela mwa San Miguel de Allende, kono n’a ikozi lituto za Bibele li sikai ni ku fumaneha kwa mikopano kaufela ku isa fa n’a kutezi habo. Ne ku ezizwe litukiso za kuli tuto ya hae i zwelepili.

Bupaki bwa ku Tandalelwa kwa Mubeleko ni kwa Sikolo

Kana mu sweli mwa itibahaza sina yo muñwi wa Lipaki za Jehova ko mu beleka? Ki mwa ezezanga Adrián ya fundotisanga mizuzu ya bapoti mwa Cape San Lucas. Kacwalo, Judy ya beleka ni yena u li: “Lilimo ze talu fela kwamulaho, ha ne mu ka ni bulelela kuli ne ni ka ba yo muñwi wa Lipaki za Jehova, ne ni ka be ni bulezi kuli: ‘Ku shwa cwalo!’ Kono ne ni ipulelezi kuli ni bata ku bala Bibele. Na nahana kuli, ‘Ha ku na ku kataza, kakuli ni y’a lata ku bala.’ Ni si ka feza likauhanyo ze kona ku fitelela 6, na lemuha kuli ne ni tokwa tuso. Mutu fela ye ne ni kona ku nahana ki Adrián ye ne ni beleka ni yena. Ne ni lata ku ikambota ni yena kakuli ne li yena fela mutu ya n’a ikutekile kwa mubeleko.” Kapili-pili Adrián a kupa ku taha ni Katie, ya n’a beelezani ni yena, kuli ba to alaba lipuzo kaufela za Judy. Katie a kalisa ku ituta Bibele ni yena, mi ku si ka fita nako ye telele, Judy a ba Paki ya kolobelizwe.

Ku cwañi ka za ku kutaza ka ku tandalelwa kwa sikolo? Lipaki ba babeli ne ba ituta si-Spanish kwa yunivesiti kono zazi le liñwi ne ba lofile kwa lituto kakuli ne ba ile kwa mukopano o mutuna wa Sikreste. Ha ne ba kutile kwa sitopa, ne ba kupilwe kuli ba taluse mwa si-Spanish ze ne ba iz’o eza. Ba itusisa kolo yeo kwa ku fa bupaki ka mo ne ba konela kaufela mwa si-Spanish. Silvia, yena muluti, n’a tabela hahulu bupolofita bwa Bibele. A amuhela tuto ya Bibele mwa Sikuwa mi cwale s’a li muhasanyi wa taba ye nde. Hape ba sikai mwa lubasi lwa hae ba sweli ba ituta. Silvia u li: “Ne ni fumani ze ne ni bata mwa bupilo bwa ka kaufela.” Ee, ku kutaza ka ku tandalelwa ku kona ku tahisa miselo ye minde.

Ku Itusisa Linako Ze Ñwi

Ku ba mufani ku kona ku libisa kwa ku fa bupaki. Bo Jim ni Gail, ba ba sebeleza kwa San Carlos, ye mwa Sonora, ne ba fumani taba yeo ku ba ya niti. Musali yo muñwi ya n’a zamaisa linja za hae ka 6 kiloko ya kakusasana n’a yemi ku buha sibaka sa bona. Bo Jim ni Gail ba mu mema kuli a to puka kwa kofi. Lwapili mwa lilimo ze 60, a utwa ka za Jehova ni ka za tibelelo ya bupilo bo bu sa feli. Tuto ya Bibele ya kaliswa.

 Adrienne ni yena u ezanga baeñi ka musa. Na sweli ku ca mwa licelo la mwa Cancún mi kwa taha kashimani ke ne ka til’o mu buza ka za haiba n’a zwa kwa Canada. Ha n’a alabile kuli ki kwa n’a zwa, ka talusa kuli kona ni bom’a kona ne ba lika ku tusa kaizel’a kona ku baakanya piho ya kwa sikolo ka za batu ba kwa Canada. Bom’a kona be ne ba ziba Sikuwa, ba sutelela. Hamulaho wa ku alaba ka pilu-telele lipuzo za bona ka za batu ba kwa Canada, Adrienne a li: “Kono ku na ni libaka la butokwa luli le ne ni tezi ku zwa kwa Canada. Ni til’o tusa batu ku ituta Bibele. Kana ne mu ka tabela ku eza cwalo?” Musali y’o a alaba kuli n’a ka tabela. Na s’a zwile mwa keleke ya hae lilimo ze lishumi kwamulaho mi n’a likanga ku ituta Bibele a nosi. Na file Adrienne keyala ni nombolo ya luwaile lwa hae, mi kwa kaliswa tuto ya Bibele ye nde.

‘Mu Nepele Buhobe bwa Mina fa Mezi’

Ku bulela ka za litaba ze mwa Bibele ka nako kaufela hañata ku tahisanga kuli ku fiwe bupaki kwa batu be ne ba bile ni kolo ye nyinyani fela ya ku utwa taba ya Mubuso kamba mane be ne ba si ka ba ni kolo ye cwalo. Mwa licelo le li patehile hahulu mwa tolopo ya kwa likamba ya Zihuatanejo, Paki yo muñwi n’a memile batu ba babeli ba kwa naha i sili kuli ba to ina ni yena kwa tafule ya hae, bakeñisa kuli ne ku tezi mwa licelo. Bosinyalana bao ne ba zamayanga mwa sisepe ku zwa kwa sibaka se siñwi ku ya ku se siñwi ka lilimo ze supile. Ba talusa maikuto a bona a ku nyaza Lipaki za Jehova. Hamulaho wa ku kopana k’o mwa licelo, Paki y’o a potela bosinyalana bao kwa sisepe sa bona mi a ba memela kwa ndu ya hae. Ba amuhela limagazini ze fitelela 20 ni libuka ze 5 mi ba sepisa ku yo bata Lipaki kwa likamba le liñwi ko ne ba ka yo pumulela.

Bo Jeff ni Deb ne ba boni lubasi lo ne lu na ni mbututu ye nde ya musizani kwa sibaka sa macelo a nyangela a mwa sibaka sa lintolo sa mwa Cancún. Ha ne ba bulezi se siñwi ka za mbututu yeo, bashemi ba yona ba ba mema ku ca hamoho sico se si bizwa pizza. Kwa fumaneha kuli lubasi l’o ne lu zwa kwa India. Ne ba si ka utwa fateñi ka za Lipaki za Jehova, kamba ku bona lihatiso za luna. Ba zwa kwa sibaka sa lintolo seo ba lwezi lihatiso za Lipaki.

Nto ye swana ne i ezahezi fa sioli sa ku zwa fa likamba la Yucatán. Bosinyalana ba Machaina be ne ba sa z’o nyalana ne ba kupile Jeff kuli a b’a nge maswaniso, mi a eza cwalo ka tabo. Hamulaho a fumana kuli nihaike ne ba kile ba pila mwa United States ka lilimo ze 12 ze felile, ne ba si ka bona kamba ku utwa ka za Lipaki za Jehova! Kwa kaliswa puhisano ye nde. Jeff a ba susueza kuli ba yo bata Lipaki ha ba ka kuta habo.

Ku kana kwa ezahala nto ye ipitezi mwa silalanda sa mina ye kana ya mi fa kolo ya ku kutaza ka ku tandalelwa. Mueteleli wa United States ha n’a til’o potela mueteleli wa Mexico kwa mulakatuna wa hae bukaufi ni Guanajuato, babihi ba makande ba mwa lifasi kaufela ne ba bihile za teñi. Lubasi lo luñwi lwa Lipaki ne lu itusisize kolo yeo kwa ku kutaza mwa Sikuwa. Ze n’e zwile mwateñi neli ze nde. Ka mutala, mubihi wa makande yo muñwi na s’a bihile ka za lindwa li sikai, ze cwale ka za kwa Kosovo ni Kuwait. Mulikan’a hae n’a shwezi mwa ndwa ka ku kunupiwa ki mukunupi ya ipatile. Ha s’a utwile za zuho ya bafu, mubihi wa makande y’o a itumela ku Mulimu a nz’a cipita mioko kwa ku mu tusa ku ziba kuli bupilo bu na ni mulelo. A bulela kuli nihaike n’a si ke a bona hape bosinyalana ba Lipaki bao, n’a ka zwelapili ku hupula taba ye nde yeo ya mwa Bibele.

Sina ha mu kona ku iponela, ze zwa mwa ku paka ko ku cwalo kamita ha li zibahalangi. Nihakulicwalo, Mulena Salumoni ya butali n’a ize: “Nepela buhobe bwa hao fa mezi, kakuli ha ku ka fita mazazi a mañata u ka bu fumana.” Hape n’a ize: “Cala peu ya hao isali kakusasana, mi u si ke wa pumulisa mazoho a hao ka swalala; kakuli ha u zibi kuli ku ka mela peu ifi, kamba ye, kamba yani, kamba mwendi li ka mela hande ze peli.” (Muekelesia 11:1, 6) Ee, mu ‘nepele buhobe bwa mina’ ka tukufalelo fa mezi a mañata ni ku ‘cala peu ya mina’ ka buñata, sina mwa kile a ezeza Paulusi ni Jesu ni sina mo ba ezeza Lipaki ba miteñi ye ba mwa simu ya Mexico mo ku bulelwa Sikuwa.