Mo Mu Kona ku Ifepela kwa Moya

“MWA lilimo ze lishumi ze felile, ku ñozwi libuka ze bulela ka za m’o bulumeli bu amela mubeleko ze fitelela 300, ku zwa ku ye li Jesus CEO, ku ya ku ye li Tao of Leadership, mi li fumaneha ka buñata mwa masintolo mo ku lekiswa libuka,” ki mo i bulelela hatiso ye bizwa U.S. News & World Report. Nto yeo i bonisa fela kuli mwa linaha ze ñata ze fumile, takazo ya ku ba ni ketelelo ya kwa moya mwa bupilo y’a ekezeha. Hatiso ya za lipisinisi ye bizwa Training & Development i bulela fa taba yeo kuli: “Ka nako yeo zwelopili ku za lipangaliko i zamaisa likalulo ze ñwi kaufela za bupilo bwa  luna, lu bata taluso ye tungile, mulelo wa bupilo, ni buikolwiso bwa ka butu.”

Kono mu kona ku fumana kai ketelelo ya kwa moya ye kolwisa? Kale batu ne ba itingile kwa bulapeli ilikuli bu ba tuse ku fumana “taluso ye tungile” ni “mulelo” mwa bupilo. Kacenu, buñata ha ba sa lata bulapeli. Hatiso ye bizwa Training & Development i bonisa kuli “batu ba li ku na ni shutano ye tuna hahulu mwahal’a bulapeli ni bulumeli,” ka ku ya ka patisiso ye n’e ezizwe ki batu ba litulo ze pahami b’a 90. Be ne ba buzizwe mwa patisiso yeo ne b’a nga bulapeli sina “nto ye sa lumelezi ba bañata ili ye kauhanya” mi ne ba nga bulumeli sina “nto ye ama mañi ni mañi, ye sa kauhanyi.”

Buñata bwa mikulwani ba ba pila mwa linaha mo ku sina hande balumeli sina mwa Australia, New Zealand, United Kingdom, ni Yurope ni bona b’a nga kuli ku na ni shutano mwahal’a bulapeli ni bulumeli. Mwa hatiso ye bizwa Youth Studies Australia, Caziba Ruth Webber u li: “Buñata bwa mikulwani ba lumela ku Mulimu, kamba m’ata a mañwi, kono ha ba ngi keleke ku ba ya butokwa kamba ye tusa ku za bulumeli bwa bona.”

Bulapeli bwa Niti Bu Tiisa Bulumeli

Ku honona bulapeli k’o kwa utwahala. Likopano ze ñata za bulapeli li ikenyize mwa litaba za bupolitiki ze sa swalehi hande ni ku ipumisa ku ba ni muzamao o munde, mi ba na ni mulatu wa ku sulula mali a batu ba ba si na mulatu mwahal’a lindwa ze ñata za bulapeli ze ba tahisize. Niteñi, niha ba hana likopano za ba bulapeli ze silafalizwe ki buipi ni bupumi, ba bañwi hape ba ezize mafosisa a ku hana Bibele, ye ba nahana kuli i yemela mikwa ye cwalo.

Niti kikuli Bibele i nyaza buipi ni ku sa eza lika ka mulao. Jesu n’a bulelezi ba bahulu ba bulapeli mwa linako za hae kuli: “Bumai ki bwa mina, bañoli ni bafalisi, mina baipi! kakuli mu swana sina mabita a’ basizwe busweu, a’ bonahala ku ba a mande kwande, kanti mwahali a tezi masapo a batu ni ze masila kaufela. Ni mina mu cwalo, kwande mu bonwa kwa batu inge mu lukile, kanti mwahali mu tezi muipo ni bumaswe.”—Mateu 23:27, 28.

Hape Bibele i susueza Bakreste ku ikambusa kwa litaba za bupolitiki kaufela. Ku fita ku susueza balumeli ku bulayana, i laela kuli ba be ba ba tabela ku itombola bupilo bwa bona kabakala ba bañwi. (Joani 15:12, 13; 18:36; 1 Joani 3:10-12) Ku fita ku ba nto ye “sa lumelezi ba bañata, ye kauhanya,” bulapeli bwa niti, bo bu tomile fa Bibele “bu ama mañi ni mañi.” Muapositola Pitrosi n’a ize: “Mulimu h’a yi ka ku keta batu; kono mwa sicaba ni sicaba, ya mu saba mi a eza se si lukile, u lumelelwa ki Yena.”—Likezo 10:34, 35.

Bibele—Ketelelo Ye Sepeha ya Buikangulo bwa kwa Moya

Bibele i lu bulelela kuli batu ba ezizwe ka siswaniso sa Mulimu. (Genese 1:26, 27) Nihaike kuli seo ha si talusi kuli batu ba swana ni Mulimu ka nzila ya kwa mubili, seo si talusa kuli batu ba kona ku likanyisa tulemeno twa Mulimu, ku kopanyeleza cwalo ni ku kona ku ba balumeli.

Kacwalo, kwa swanela ku lumela kuli Mulimu hape u ka lu fa nzila ya ku ifepa ka yona kwa moya, ni ku lu fa ketelelo ye ka lu konisa ku ketahanya ze na ni tuso ku ze kona ku lu zieza kwa moya. Sina Mulimu h’a bupile mibili ya luna ka nzila y’e i konisa ku lwanisa matuku ni ku i konisa ku ba ni buikangulo bo bunde, hape u lu file lizwalo le li kona ku lu tusa ku eza liketo ze nde ni ku ambuka mikwa ye kona ku lu zieza kwa mubili ni kwa moya. (Maroma 2:14, 15) Sina mo lu zibela, kuli mibili ya luna i sebeze hande, i tokwa ku fepiwa hande. Ka ku swana, kuli lizwalo la luna li sebeze, li tokwa ku fepiwa ka lico ze nde za kwa moya.

 Jesu n’a talusize lico ze kona ku lu bisa ni buikangulo bo bunde kwa moya cwana: “Mutu h’a na ku pila buhobe fela, kono u ka pila ni ona manzwi kaufela a’ zwa mwa mulomo wa Mulimu.” (Mateu 4:4) Manzwi a Jehova a ñozwi mwa Bibele, lona Linzwi la hae, mi a “na ni tuso kwa ku luta, ni ku kolisa, ni ku nyaza.” (2 Timotea 3:16) Kacwalo, ki ku luna ku satalala kuli lu kone ku fepiwa ka lico zeo za kwa moya. Ha lu ka ziba Bibele ni ku lika ku sebelisa lipimo za yona mwa bupilo bwa luna, lu ka tuseha kwa moya ni kwa mubili.—Isaya 48:17, 18.

Kana Buikatazo Bwa Tusa?

Ki niti kuli ku kondolokisa buikangulo bwa luna bwa kwa moya ka ku ituta Bibele ku tokwa nako; mi nako i bonahala ku zwelapili ku ba ye kuswani. Kono ze zwa mwateñi ki ze tusa luli! Mu teeleze babeleki ba bañwi ba ba patehile ha ba talusa libaka ku fumana nako ya ku tokomela za buikangulo bwa kwa moya ha ku li kwa butokwa ku bona.

Marina, ya li dokota, u li: “Ne ni sa nahanangi za bulumeli bwa ka, konji ha ne ni kalile ku beleka mwa sipatela ni ku kala ku utwela ba bañwi butuku kabakala manyando a bona. Ni boni kuli ni swanela ku lemuha ni ku fepa butokwi bwa ka bwa kwa moya kuli ni be ni kozo, kakuli bupilo ni butokwa bwa ku iyakatwa lipilaelo za batu li kona ku imezwa, sihulu ku y’a eza mufuta wa musebezi wa ka.

“Se ni ituta Bibele cwale ni Lipaki za Jehova. Tuto yeo i ni tusa ku tatuba likezo ni milelo ya ka ka nzila ye tusa, hape i ni luta ku ba ni mubonelo o munde wa lika kuli ni pile hande. Ni tabela hahulu musebezi. Kono ki ku ituta Bibele ko ku ni tusize ku sa katazeha mwa maikuto, ku ni tusa kuli ni si ke na zwafa, ku bilaela, ni ku ba ni pilutelele ni musa kwa batu. Ku sebelisa likuka za Bibele hape ku ni tusize hahulu mwa linyalo la ka. Sa butokwa ni ku fita, ni konile ku ziba Jehova, ni ku zamaiswa ka nzila ye ñwi ki moya wa hae, mi seo si ni konisize ku ba ni bupilo bo bunde.”

Nicholas muezi wa milalo ya miyaho u li: “Ni si ka kala kale ku ituta Bibele ni Lipaki za Jehova, ne ni sina taba ni za bulumeli. Mulelo wa ka fela mwa bupilo ne li wa ku kondisa mwa musebezi wo ne ni iketezi. Tuto ya ka ya Bibele i ni lutile kuli bupilo bu ama ze ñata, mi ku eza tato ya Jehova ku tahisa tabo ya niti, ya kamita.

“Musebezi wa ka na u tabela luli, kono ki Bibele y’e ni lutile butokwa bwa ku nolofaza bupilo ka ku beya mwa munahano lika za kwa moya. Kacwalo, na ni musal’a ka lu pimile lipilaelo ze tiswa ki ku lata hahulu sifumu. Hape lu bile ni balikani ba bande ka ku swalisana ni batu ba ba na ni mubonelo wa bupilo wa bulumeli sina wa luna.”

Vincent, caziba wa milao u li: “Mubeleko o munde wa silifasi u kona ku tahisa mwangalwa. Kono,  ni lemuhile kuli ku na ni se siñwi se si tokwahala se si kona ku tahisa tabo ni buiketo. Ni si ka ziba kale ze i luta Bibele fa taba yeo, na hupula kuli ne ni lemuhile kuli bupilo ha bu na tuso—ku pepwa, ku hula, ku kena mwa linyalo, ku beleka ilikuli mutu a fumane ze tokwahala mwa ku uta bana, ku ba luta kuli ni bona ba latelele bupilo bo bu swana, mane kwa mafelelezo, ku cembala ni ku shwa.

“Ne li hamulaho wa ku ituta Bibele ni Lipaki za Jehova fo ne ni konezi ku fumana likalabo ze kolwisa kwa lipuzo za ka ka za mulelo wa bupilo. Ku ituta Bibele ku ni konisize ku ziba Jehova ka butu ni ku kona mu lata hahulu. Seo si ni tusa ku ba ni mubonelo wa bulumeli o munde ha ni nze ni lika ku pila ka ku swalisana ni o ni ziba kuli ki ona mulelo wa hae. Cwale, na ni musal’a ka lu na ni buikolwiso bwa kuli lu pila ka nzila ye swanela ka ku fitisisa.”

Ni mina, bupilo bwa mina bw’a kona ku ba bo bu na ni mulelo ka ku ituta Biblele. Lipaki za Jehova ba ka tabela ku mi tusa. Sina Marina, Nicholas, ni Vincent, mwa kona ku ba ni tabo ye tahiswa ki ku ituta ka za Jehova ni z’a lelezi batu kamukana, ni za mi lelezi ka butu. Mu ka ba ni nyakalalo ya ku taleleza butokwi bwa mina bwa kwa moya cwale, mi hape mu ka ba ni sepo ya ku ikola bupilo bo bu sa feli inze mu na ni mubili o petehile. Sepo yeo i kona fela ku fumanwa ki “ba ba lemuha butokwi bwa bona bwa kwa moya.”—Mateu 5:3, NW.

Nzila ye ñwi ya ku tiisa bulumeli bwa luna ka yona ki ka tapelo. Jesu n’a lutile balutiwa ba hae ku lapela, mi n’a ba file nto ye zibahala kuli ki Tapelo ya Mulena. Tapelo yeo i na ni taluso mañi ku mina kacenu? I kona ku mi tusa cwañi? Mu ka fumana likalabo mwa litaba ze peli ze tatama.

[Maswaniso a fa likepe 6]

Marina

[Maswaniso a fa likepe 7]

Nicholas

[Maswaniso a fa likepe 7]

Vincent