Bibele Ya Kona ku Mi Tusa mwa Linyalo

KU BA bañwi, linyalo ki linzwi le li tahisa mihupulo ye minde. Kono ku ba bañwi, li tahisa masitapilu. Musali yo muñwi ya nyezwi, u bilaela kuli, “Ni ikutwa kuli mane inge ya lelekilwe, ni ikutwa ku keshebiswa ni bulutu nako kaufela.”

Kiñi se si tisanga kuli batu ba babeli ba ba kile ba itama ku latana hahulu ba fite fa ku sa tabelana? Se siñwi se si tisanga cwalo ki ku sa ziba ze iputezi mwa linyalo. Mubihi yo muñwi wa makande a za bualafi n’a ize: “Lu kena mwa manyalo lu sa zibi ni se sikana ka za manyalo.”

Buniti bwa kuli ki ba sikai ba ba na ni zibo ye iputezi mwa manyalo, bu fumanwi mwa tatubisiso ye ne ezizwe ki ba The National Marriage Project, tatubisiso ye ezizwe ka tokomelo ya ba Rutgers University mwa New Jersey, kwa U.S.A. Bazamaisi ba patisiso yeo ne ba ñozi kuli, “Buñata bwa be ne ba tatubilwe ba hulezi mwa lapa m’o linyalo la bashemi ne li mbalanda kamba ba lelekani. Ba ziba hande linyalo le li maswe, kono ha ba zibi hande mo li inezi linyalo le linde. Ba bañwi ba kona ku talusa fela linyalo le linde ku ba ‘le li sa swani ni la bashemi ba ka.’”

Kana Bakreste ha ba na matata mwa manyalo? Ba na ni ona. Mane Bakreste ba bañwi ba kwa makalelo ne ba tokwa kelezo ya ngambu kuli ‘ba si ke ba bata ku itamulula’ kwa manyalo a bona. (1 Makorinte 7:27) Niti kikuli linyalo lifi kamba lifi la batu ba babeli ba ba si ka petahala li tamehile ku ba ni matata a lona, kono lu na ni tuso. Bo munna ni musal’a hae ba kona ku kondisa silikani sa bona ka ku sebelisa likuka za Bibele.

Ki niti kuli Bibele haki buka ye lukiselizwe ku bulela ka za manyalo fela. Kono bakeñisa kuli i tahile ka moya wa Yena ya tahisize tukiso ya linyalo, lu kona ku kolwa kuli likuka za yona za tusa. Ka mupolofita Isaya, Jehova Mulimu n’a ize: “Ki Na [Muñ’a] Bupilo Mulimu wa hao, ni ku luta se si ku swanela, ni ku zamaisa ka nzila y’o lukela ku zamaya ku yona. Mawe, kabe n’o utwile milao ya ka! n’o kabe u pilile mwa kozo ye swana inge nuka; ze lukile za hao ne li kabe li bonahala sina mandinda a mwa liwate.”—Isaya 48:17, 18.

Kana lilato le ne li tuka mwahal’a mina ni ba ku mina se li kala ku fola? Kana mu ikutwa kuli mu mwa linyalo le li si na lilato? Musali yo muñwi ya s’a nyezwi ka lilimo ze 26 n’a ize: “Butuku bo bu li teñi mwa manyalo a cwalo ha bu konwi ku taluswa. Ki butuku bo bu li teñi nako kaufela.” Mwa sibaka sa kuli mu tuhelele fela linyalo le li sa tabisi ku zwelapili, kiñi ha mu sa leli ku eza se siñwi ka za teñi? Taba ye tatama i ka bonisa ba ba nyalani m’o likuka za Bibele li kona ku ba tuseza mwa manyalo a bona mwa taba ye ñwi tenyene—yona ya buitamo.