Mu Kona ku Fumana Kai Likuka Sakata za Bulapeli?

RODOLPHE n’a buzize ka sisomo kuli: “Haiba u ka kena fela bulapeli ka ku latelela lubasi lwa henu, kiñi he ha u sa keni bulapeli bwa kwa santulu bo ne bu lapelwa ki bokukululu ba luna?” Mucaha ya mu teeleza u menyiswa ki puzo yeo.

Rodolphe u li: “Silikani sa ka ni Mulimu ki sa butokwa hahulu ku na. Ha ni lumeli kuli mutu a ni hapeleze litumelo ka ku latelela sizo, ka libaka fela la kuli bokukululu ba ka ne ba latelelanga litumelo zeo.” Rodolphe n’a nyakisisize hande lika; n’a si ka nga taba ya butokwa yeo ku ba fela nto ya sihozo.

Nihaike mazazi a ki ka siwela bulapeli bu li bwa sihozo, ba bañata ba sa tomenena bulapeli bwa mukowa wa bona. Kana ku lukile kamita ku kumalela litumelo za bashemi? Bibele i liñi?

Ha s’a tandile lilimo ze 40 mwa lihalaupa, Joshua, ya n’a yolile Mushe, n’a bulelezi Maisilaele ku iketela. N’a ize: “Ha mu sa lati ku sebeleza [Muñ’a] Bupilo, mu kete kacenu ye mu ka sebeleza; nihaikaba milimu ye sebelelizwe ki bokuku a mina mwa buse bwa Nuka, kamba ki milimu ya Maamori be mu yahile mwa naha ya bona. Haili na, ni ba ndu ya ka, lu ka sebeleza [Muñ’a] Bupilo.”—Joshua 24:15.

Yo muñwi wa bokuku ba n’a talusa Joshua ne li Tera, ndat’ahe Abrahama, ya n’a pila mwa munzi wa Ure. Ka nako yeo Ure ne i yahilwe kwa upa wa Nuka ya Eufrati. Bibele ha i buleli ze ñata ka za Tera, konji fela kuli n’a lapela milimu i sili. (Joshua 24:2) Abrahama mwan’a Tera, niha n’a sa zibi ka ku tala mulelo wa Mulimu, n’a lata ku siya munzi wa habo, Jehova ha n’a mu laezi ku eza cwalo. Abrahama n’a iketezi bulapeli bo ne bu sa swani ni bwa ndat’ahe. Kacwalo, Abrahama n’a fuyozwi ka mwa n’a mu sepiselize Mulimu, mi a ba mutu yo bulapeli bo buñata bu mu nga ku ba “ndat’ahe ba ba lumela kaufela” ku Mulimu.—Maroma 4:11.

Bibele hape i bulela hande ka za taba ya Ruti, kukululu wa Jesu Kreste. Ruti, musali wa Mumoabi ya n’a nyezwi ku Muisilaele, n’a shwezwi ki munn’a hae mi n’a na ni ku eza keto ye: ku ina mwa naha ya habo kamba ku kutela kwa Isilaele ni mukwenyan’a hae. Ruti, ka ku lemuha kuli bulapeli bwa Jehova ne bu fitela kwahule bulapeli bwa milimu bwa bashemi ba hae, a  taluseza mukwenyan’a hae kuli: “Sicaba sa hao ikaba sicaba sa ka, mi Mulimu wa hao ibe Yena Mulimu wa ka.”—Ruti 1:16, 17.

Ka ku bulela fa butokwa bwa taba yeo mwa Bibele, buka ya Dictionnaire de la Bible i talusa kuli taba yeo i bonisa ‘m’o musali wa mulicaba ka tukiso ya Mulimu n’a bile kukululu wa Mulena Davida ya kenile bakeñisa ku lata sicaba ni bulapeli bwa Jehova, ibo n’a pepezwi mwa sicaba sa bahedeni se ne si toyani ni Isilaele.’ Ruti n’a si ka zina-zina ku keta bulapeli bo ne bu shutana ni bwa bashemi ba hae, mi kabakala keto yeo, Mulimu n’a mu fuyozi.

Taba ye bulela za makalelo a Bukreste i bonisa hande-nde libaka balutiwa ba Jesu ha ne ba siile bulapeli bwa bokukw’a bona. Mwa ngambolo ye susueza, muapositola Pitrosi n’a elelize bateelezi ba hae kuli ba “ipabalele kwa mushobo o sitani wo” ka ku bakela libi za bona ni ku kolobezwa ka libizo la Jesu Kreste. (Likezo 2:37-41) O muñwi wa mitala ye zwile mubano ne li wa Saule, Mujuda ya n’a nyandisize Bakreste. Ha n’a li mwa nzila ku liba kwa Damaseka, n’a boni pono ya Kreste, mi hasamulaho Saule a ba Mukreste mi a t’o bizwa muapositola Paulusi.—Likezo 9:1-9.

Buñata bwa Bakreste ba kwa makalelo ne ba si ka ipumana mwa muinelo o cwalo. Niteñi, bote ne ba na ni ku siya bulapeli bwa Sijuda kamba bwa milimu ye miñwi ya sihedeni. Be ne ba bile Bakreste ne ba ezize cwalo ka ku ba ni zibo ye tezi ya litaba, mi hañata ne li hasamulaho wa ku buhisana ka butungi za ku ba Mesiya kwa Jesu. (Likezo 8:26-40; 13:16-43; 17:22-34) Bakreste ba kwa makalelo bao ne ba taluselizwe hande butokwa bwa ku eza licinceho mwa bupilo bwa bona. Bote ne ba memilwe, ibe Majuda kamba balicaba, kono tuto ne li i liñwi. Kuli ba tabise Mulimu, ne ba tokwa ku ba mwa bulapeli bo bunca, ili bwa Sikreste.

Keto ya Butokwa ku Luna

Kaniti, miteñi yeo ne ku tokwahala bundume ku hana bulapeli bwa bashemi, ili bwa Sijuda, bwa ku lapela mubusi, ni milimu ya sihedeni, ni ku ya mwa bulapeli bo ne bu sheununwa ki Majuda hamoho ni Maroma. Keto yeo hañihañi ya tahisa nyandiso ye situhu. Ni kacenu, ku tokwahala bundume ku hana “ku likanyisa nyangela,” ka mw’a bulelela Hippolyte Simon, bishopu wa Katolika wa kwa Clermont-Ferrand, mwa buka ya hae y’e li Vers une France païenne? (Kana Buhedeni Bu Kenezi France?) Ku tokwahala bundume ku balelwa kwa kopanonyana ya bulapeli bo bu nyaziwanga fokuñwi, bwa Lipaki za Jehova.

Paul, mucaha wa kwa tolopo ya Bastia, mwa sooli sa Corsica, n’a hulile a li Mukatolika. Fokuñwi n’a swalisananga mwa misebezi ya keleke, ye cwale ka ku lekisa mañende kuli a fumane mali a’ ka itusiswa ki kopano ya Katolika ye tusa ba ba mwa butokwi. Ka ku bata ku utwisisa hande Bibele, a lumela ku buhisananga ni Lipaki za Jehova. Nako ha inze i ya, a lemuha kuli za n’a ituta ne li ka mu tusa ku ya ku ile. Kacwalo, Paul a amuhela ka ku tala likuka za Bibele mi a fita fa ku ba yo muñwi wa Lipaki za Jehova. Bashemi ba hae ne ba si ka lwanisa keto ya hae, mi keto yeo ha i si ka tisa butata mwa lubasi.

Amélie u pila kwa mboela wa France. Lilama za lubasi lwa hae ba bile Lipaki za Jehova ku kalela ku bokukw’a bashemi ba hae. N’a keteziñi bulapeli bwa bashemi ba hae? U li: “Mutu h’a bi yo muñwi wa Lipaki za Jehova bakeñisa kuli bashemi ba hae kamba bokukw’a hae ki Lipaki za Jehova. Kono muta o muñwi, u ka  ipulelela kuli, ‘Ki bulapeli bwa ka kakuli ni lumela lituto ze bu luta.’” Sina mikulwani ba bañwi ba bañata ba ba li Lipaki za Jehova, Amélie u ziba kuli litumelo za hae ze tiile li mu tusa ku ba ni mulelo mwa bupilo ni tabo sakata.

Libaka Likuka za Mulimu Ha Li Swanelwa ku Amuhelwa

Buka ya Liproverbia, kauhanyo 6, timana 20, i susueza ba ba bata ku tabisa Mulimu, kuli: “Mwan’aka, tokomela litaelo za ndat’aho, mi u si ke wa tuhela mulao wa m’aho.” Kelezo yeo ha i buleli kuli lu latelele fela ze lu bulelelwa, kono i susueza mikulwani ku amuhela likuka za Mulimu ka ku tungisa tumelo ya bona ni ku iketela bona beñi ku lapela Mulimu. Muapositola Paulusi n’a susuelize mizwale ba hae kuli ba “like linto kaufela,” ku bona haiba ze ne ba lutiwa ne li lumelelana ni Linzwi la Mulimu ni tato ya Hae, ni ku li latelela.—1 Matesalonika 5:21.

Ibe kuli ba hulezi mwa malapa a Sikreste kamba nya, Lipaki za Jehova ba ba fitelela 6 milioni, banana ni ba bahulu, ba iketezi ku eza cwalo. Ka ku ituta Bibele ka tokomelo, ba fumani likalabo ze nde kwa lipuzo za bona ka za mulelo wa bupilo mi ba utwisisize hande tato ya Mulimu kwa batu. Ha se ba bile ni zibo yeo, ba amuhezi likuka za Mulimu ni ku ikataza ku eza tato ya hae.

Ibe kuli mu babali ba kamita ba magazini ye kamba nya, kiñi ha mu sa amuheli Lipaki za Jehova kuli ba mi tuse ku ituta Bibele ilikuli mu itute likuka za yona za bulapeli? Ka nzila yeo, mu ka kona ku ‘lazwa, mi mu ka bona kuli Muñ’a Bupilo u na ni sishemo.’ Kacwalo mu ka fumana zibo ye isa kwa bupilo bo bu sa feli haiba mu itusisa yona.—Samu 34:8; Joani 17:3.

[Siswaniso se si fa likepe 5]

Lubasi lwa Lipaki za Jehova mwa France ku kalela ku bokukw’a bashemi

[Siswaniso se si fa likepe 7]

Ruti n’a iketezi ku sebeleza Jehova ku fita milimu ya bokukw’a hae