Mikulwani—Jehova H’a Na ku Libala Misebezi ya Mina!

“Mulimu hasi ya si ka luka, kuli a libale misebezi ya mina, ni lilato le mu bonisize kwa Libizo la hae, mwa sebelezo ya ku tusa balumeli, ili ye mu nze mu ba sebeleza ni ka nako ye.”—MAHEBERU 6:10.

1. Libuka za mwa Bibele za Maheberu ni Malaki li bonisa cwañi kuli Jehova wa itebuha sebelezo ya hao?

KANA u kile wa ezeza mulikan’a hao nto ye nde a sa itumeli ku wena? Kezo ye nde ha i ngiwa ka likesha kamba mane ha i libalwa, kwa kona ku utwisa hahulu butuku. Kono ha ku cwalo ha lu sebeleza Jehova ka pilu kaufela! Bibele i li: “Mulimu hasi ya si ka luka, kuli a libale misebezi ya mina, ni lilato le mu bonisize kwa Libizo la hae, mwa sebelezo ya ku tusa balumeli, ili ye mu nze mu ba sebeleza ni ka nako ye.” (Maheberu 6:10) U nahane ze i talusa taba yeo. Jehova ha n’a ka libala ze u ezize ni ze u zwelapili ku eza mwa sebelezo ya hae, n’a ka ikutwa ku fosa, kuli u ezize sibi. Ki Mulimu kwa buitebuho!—Malaki 3:10.

2. Ku sebeleza Jehova ku biswa kiñi ko ku ipitezi luli?

 ² Tohonolo ye u na ni yona ya ku lapela ni ku sebeleza Mulimu ya na ni buitebuho y’o ki ye tuna luli. Tohonolo ya hao i ipitezi luli kakuli kwa batu b’a 6 bilioni ba ba li teñi mwa lifasi, balumeli sina wena ki b’a 6 milioni fela. Hape, ku teeleza kwa taba ye nde kwa hao ni ku itebuha yona ku bonisa kuli Jehova wa iyakatwa wena. Jesu mane n’a ize: “Ha ku na mutu ya ka ta ku na, konji h’a ka hohiwa ki Ndate ya ni lumile.” (Joani 6:44) Luli, Jehova u tusanga batu ku ipumanela lituso za sitabelo sa Kreste.

Ku Itebuha Tohonolo ya Hao Ye Tuna

3. Bana ba Kora ne ba bonisize cwañi kuli ne ba itebuha ku sebeleza Jehova?

³ Ka mo ku boniselizwe mwa taba ye felile, wa kona ku tabisa pilu ya Jehova. (Liproverbia 27:11) U si ke wa keshebisa taba yeo. Ku ye ñwi ya lisamu za bona ze tahile ka moya, bana ba Kora ne ba bonisize kuli ne ba itebuha tohonolo ya ku sebeleza Jehova. I li: “Se sinde, ki lizazi li li liñwi mwa malapa a hao, ku fita mazazi a’ eza mianda ye lishumi a ku ina ku sili. Se ni lata ki ku yema mwa munyako wa Ndu ya Mulimu wa ka, ku fita ku ina mwa litende za ba ba maswe.”—Samu 84:10.

4. (a) Ba bañwi ba kona ku nahaniswa kiñi kuli ku sebeleza Jehova ha ku fi hande tukuluho? (b) Jehova u bonisa cwañi kuli u bata ku lemuha ni ku fa batanga ba hae mupuzo?

⁴ Kana ni wena u ikutwa cwalo ka za tohonolo ya hao ya ku sebeleza Ndat’aho wa kwa lihalimu? Kaniti, fokuñwi ku kana kwa bonahala kuli ha u lapela Jehova, ha u na hande tukuluho. Ki niti kuli ku latelela likuka za Bibele fokuñwi ku tokwa buitomboli. Kono kwa mafelelezo, z’a tokwa Jehova kaufela kuli u eze li ka ku tusa. (Samu 1:1-3) Hape, Jehova wa bona buikatazo bwa hao mi u bonisa kuli wa itebuha busepahali bwa hao. Paulusi mane n’a ñozi kuli Jehova u “fa ba ba mu bata mupuzo.” (Maheberu 11:6) Jehova u bata f’a ka ezeza cwalo. Mupolofita ya lukile wa mwa Isilaele wa kwakale n’a ize: “Meto a [Muñ’a] Bupilo a talimisisa lifasi kaufela, kuli a tahise mata a hae ku tusa ba ba mu file lipilu za bona, kaufela zona.”—2 Makolonika 16:9.

5. (a) Ki ifi nzila ye ñwi ye nde y’o kona ku bonisa ka yona kuli u file Jehova pilu ya hao kaufela? (b) Ku taluseza ba bañwi za tumelo ya hao ku kana kwa bonahalelañi t’ata?

⁵ Ye ñwi ya linzila ze nde za ku bonisa ka zona kuli u file Jehova pilu ya hao kaufela ki ha u ambola ka za hae ku ba bañwi. Kana s’o kile wa fumana sibaka sa ku taluseza ba bañwi kwa sikolo ka za tumelo ya hao? Kwa makalelo, ku eza cwalo ku kana kwa bonahala t’ata, mi muhupulo fela wa teñi u kana wa ku sabisa. Mwendi u ka li, ‘Ha ba ka ni seha bo? Esi mwendi ba ka li bulapeli bwa  ka bwa komokisa?’ Jesu n’a ize haki bote ba ba ka teeleza kwa taba ya Mubuso. (Joani 15:20) Kono f’o ha ku talusi kuli bupilo bwa hao kaufela ikaba bwa ku sehiwa ni ku shengokiwa. Mikulwani ba bañata ba ba li Lipaki ba fumani ba ba lata ku teeleza mi mane kabakala ku tiya mwa litumelo za bona, se ba kutekiwa hahulu ki ba bañwi.

“Jehova U Ka Ku Tusa”

6, 7. (a) Musizana yo muñwi wa lilimo ze 17 n’a konile cwañi ku paka ku ba bañwi mwa sitopa? (b) U itutileñi ku se ne si ezahezi ku Jennifer?

⁶ Kono u kona ku fumana cwañi bundume bwa ku bulela za tumelo ya hao? Batu ha ba ku buza za bulapeli bwa hao, wa kona ku bulela ka ku sa pata-pata. U bone ze n’e ezahezi ku Jennifer, wa lilimo ze 17. U li: “Ne ni li kwa sikolo, mi ne ni ca. Basizana be ne ni li ni bona fa tafule ne ba ambola za bulapeli, mi yo muñwi ku bona a ni buza ko ni lapela.” Kana Jennifer n’a ikalezwi a si ka fa kale kalabo? U li, “Ee, kakuli ne ni sa zibi hande mo ne ba ka ezeza.” Kacwalo Jennifer n’a ezize cwañi? U zwelapili kuli: “Ne ni bulelezi basizana bao kuli ne ni li yo muñwi wa Lipaki za Jehova. Kwa makalelo ne ba bonahezi ku komoka. Ku bonahala kuli ne ba nahana kuli Lipaki za Jehova ki batu ba ba sa swalehi hande. Kacwalo ba kala ku ni buzaka lipuzo, mi ne ni konile ku hakulula mihupulo ya bona ye miñwi ye fosahezi. Nihaiba hamulaho wa f’o, basizana ba bañwi hañata ne ba tahanga ku to ni buza lipuzo.”

⁷ Kana Jennifer n’a inyazize kakuli n’a bulezi ka za litumelo za hae ka nako yeo? Kutokwa! U li: “Ha se lu felize ku ca, ne ni ikutwile hande. Basizana bao se ba utwisisa hande kuli Lipaki za Jehova luli ki batu ba ba cwañi.” Cwale kelezo ya Jennifer ki ye bunolo, u li: “Ha u fumana butata ku paka kwa baluti kamba ku ba bañwi mwa sitopa, u lapele ka bukuswani. Jehova u ka ku tusa. U ka tabela kuli kolo ye ne u fumani ya ku paka ne u i sebelisize hande.”—1 Pitrosi 3:15.

8. (a) Tapelo ne i tusize cwañi Nehemia ha n’a ipumani mwa muinelo o si ka libelelwa? (b) Kwa sikolo, ki miinelo mañi ye kana ya tahisa butokwa bwa ku lapela ku Jehova ka bukuswani, mwa pilu?

⁸ U lemuhe kuli Jennifer u li, ha ku fumaneha sibaka sa ku paka tumelo ya hao, u ‘lapele ka bukuswani’ ku Jehova. Nehemia, sikombwa sa ze nwiwa wa Mulena Aritazerisi wa Peresia, n’a ezize cwalo ha n’a ipumani mwa muinelo o si ka libelelwa. Nehemia n’a bonahezi ku ba ya n’a bilaela hahulu kakuli n’a zibisizwe kuli Majuda ne ba nyanda ni kuli limota ni minyako ya Jerusalema ne li sinyehile. Mulena a lemuha kuli Nehemia n’a bilaela, mi a mu buza kuli butata ne li bufi. A si ka alaba kale, Nehemia a lapela ku kupa ketelelo. Mi ka bundume a kupa kuli a kutele kwa Jerusalema a yo tusa ku yaha sinca munzi o n’o shandaukile. Aritazerisi a lumeleza Nehemia ku ya. (Nehemia 2:1-8) Tuto ki ifi mwa taba yeo? Haiba muta u fumana sibaka sa ku paka za tumelo ya hao, wa ikalelwa, u hupule ku lapela mwa pilu. Pitrosi n’a ñozi kuli: “Mu nepele lipilaelo za mina kaufela fahalimw’a [Jehova], kakuli wa mi tokomela.”—1 Pitrosi 5:7; Samu 55:22.

‘Ku Itukiseza ku Ikalabela’

9. Leah, wa lilimo ze 13 n’a konile cwañi ku fa libuka ze 23 za Young People Ask?

⁹ U nahane taba ye ñwi hape. Ka nako ya ku pumula kwa sikolo, Leah, wa lilimo ze 13 n’a bala buka ya Questions Young People Ask—Answers That Work. * U li: “Ba bañwi ne ba ni talimezi, mi hañihañi na to yemelelwa ki sikwata. Ba ni buza kuli ne ni bala buka mañi.” Lizazi ha li yo likelanga, Leah na s’a kupilwe buka ya Young People Ask ki basizana ba bane. Ku si ka fita nako, basizana bao ne se ba taluselize ba bañwi ka za buka yeo, mi ni bona ne ba bata likopi za bona. Mwa liviki li sikai ze n’e latelezi, Leah n’a file ba n’a kena ni bona sikolo ni balikani ba bona likopi ze 23 za buka ya Young People Ask.  Kana Leah kwa makalelo ne ku mu bezi bunolo ku bulela se siñwi ha n’a buzizwe ka za buka ya n’a bala? Kutokwa! U itumelela kuli: “Kwa makalelo pilu ya ka ne i tula-tula. Kono se ni lapela, mi ne ni ziba kuli Jehova n’a li ni na.”

10, 11. Kasizana ka Muisilaele ne ka konile cwañi ku tusa mueteleli wa mpi ya Siria ku ziba ka za Jehova, mi mueteleli y’o n’a ezize licinceho mañi hamulaho?

¹⁰ Mwendi taba ya Leah i ku hupulisa se si kile sa ezahala kwa kasizana ka Muisilaele ke ne ka hapezwi kwa Siria. Naamani, mueteleli wa mpi ya Siria n’a kula mbingwa. Mwendi musal’a hae ki yena ya n’a kalisize puhisano ye n’e tahisize kuli kasizana kao ka bulele za tumelo ya kona. Ne ka ize: “[Muñ’a] ka [ha n’a ka ya] ku mupolofita ya inzi mwa Samaria, kabe n’a ka y’o mu folisa mbingwa ya hae.”—2 Malena 5:1-3.

¹¹ Kabakala bundume bwa kasizana kao, Naamani n’a fitile fa ku ziba kuli “ha ku na Mulimu mwa lifasi kaufela, haisi mwa naha ya Isilaele.” Mane a ikatulela kuli ku tuha f’o “h’a sa na ku ezeza Mulimu u sili linubu za ku cisa, ni matabelo, haisi [Muñ’a] Bupilo fela.” (2 Malena 5:15, 17) Kaniti Jehova n’a fuyauzi kasizana kao kabakala bundume  bwa kona. Ni banana ba kacenu w’a kona ku ba fuyaula mi u ka eza cwalo. Leah n’a fuyauzwi. Hamulaho, ba bañwi kwa sikolo ne ba tile ku yena ku to mu bulelela kuli buka ya Young People Ask ne i ba tusa ku ba ni mikwa ye minde. Leah u li: “Ne ni tabile kakuli ne ni ziba kuli ne ni tusa ba bañwi ku ituta ka za Jehova ni ku ba tusa ku eza licinceho mwa bupilo.”

12. U kona ku tiiswa cwañi kuli u ikalabele ka za tumelo ya hao?

¹² Ni wena wa kona ku eza mo ne ba ezelize bo Jennifer ni Leah. U latelele kelezo ya Pitrosi, ya n’a ñozi kuli ka ku ba Mukreste, u ‘itukiseze kamita ku ikalabela ku ya ka ku buza sepo ye li teñi ku wena, inze u eza ka musa ni likute.’ (1 Pitrosi 3:15) U ka eza cwañi seo? U eze mo ne ba ezelize Bakreste ba kwa makalelo be ne ba lapezi ku Jehova kuli a ba tuse ku kutaza “ba sa sabi.” (Likezo 4:29) Mi u taluse ka bundume litumelo za hao ku ba bañwi. Ze ka ezahala li kana za ku komokisa. Hape, u ka tabisa pilu ya Jehova.

Mavidio ni Misebezi Ye Mituna

13. Mikulwani ba bañwi ba itusisize linako mañi kwa ku fa bupaki? (U bone likwenda ze fa makepe 20 ni 21.)

¹³ Mikulwani ba bañata ba taluselize baluti kamba ba bañwi kwa sikolo ka za tumelo ya bona ka ku itusisa mavidio. Fokuñwi, misebezi ya kwa sikolo ni yona i tahisize kolo ya ku lumbeka Jehova. Ka mutala, mwa lituto za bona za ze ezahezi mwa lifasi, bashimani ba babeli ba lilimo ze 15, ba ba li Lipaki za Jehova, ne ba filwe ku ñola piho ka za bulapeli bo buñwi bwa mwa lifasi. Ba sebelisana mwa ku ñola piho ka za Lipaki za Jehova, ka ku itusisa buka ya Jehovah’s Witnesses—Proclaimers of God’s Kingdom. * Hape ne ba na ni ku fa piho ka ku bulela ka mizuzu ye keta-lizoho. Hasamulaho, bo muluti ni bana ba sikolo ne ba na ni lipuzo ze ñata, kuli  mane bashimani bao ba bulela ka mizuzu ye 25. Mwa livikinyana ze n’e tatami, ba mwa sitopa sa bona ba zwelapili ku ba buzanga lipuzo ka za Lipaki za Jehova!

14, 15. (a) Ki kabakalañi ku saba batu ha ku li lilaba? (b) Ki kabakalañi ha u sa lukeli ku ikalelwa ka za ku taluseza ba bañwi litumelo za hao?

¹⁴ Ka mo li boniseza ze ezahezi ze bulezwi, ku taluseza ba bañwi litumelo za hao ka ku ba yo muñwi wa Lipaki za Jehova ku kona ku tahisa limbuyoti ze tuna. U si ke wa tuhelela boi bwa ku saba batu ku ku palelwisa ku ziba bunde ni tabo ze zwa mwa ku tusa ba bañwi ku fita fa ku ziba Jehova. Bibele i li: “Ku saba batu, ku isa mutu mwa lilaba; kono ya sepa [Muñ’a] Bupilo u ka bonelwa.”—Liproverbia 29:25.

¹⁵ U hupule kuli ka ku ba Mukulwani wa Sikreste, u na ni nto ye ba tokwa hahulu-hulu mikulwani ba bañwi—ba tokwa bupilo bo bunde ka ku fitisisa cwale, ni sepo ya ku pila ku ya ku ile kwapili. (1 Timotea 4:8) Mwa United States, m’o u kana wa nga kuli ba bañata ha ba lati niti mi ba tomenena hahulu lika za silifasi, patisiso ye ñwi ne i bonisize kuli ibat’o ba licika la mikulwani b’a nga bulapeli ku ba bwa butokwa, mi ba bañwi ba li bulapeli “bu fa ketelelo ya butokwa ka ku fitisisa” mwa bupilo. Mwendi ku cwalo ni mwa libaka ze ñwi ze ñata mwa lifasi. Kacwalo, mwendi ba bañwi kwa sikolo ba ka tabela ku teeleza ku ze u ka bulela ka za Bibele.

Ka ku Ba Mukulwani, U Sutelele ku Jehova

16. Kwand’a ku ambola za Jehova ku ba bañwi, ku mu tabisa ku amañi hape?

¹⁶ Kaniti, ku tabisa pilu ya Jehova ha ku ami fela ku ambola za hae. Mizamao ya hao ni yona i lukela ku latelela lipimo za hae. Muapositola Joani n’a ñozi kuli: “Ku lata Mulimu, kiha lu mamela litaelo za hae; mi litaelo za hae ha li na bukiti.” (1 Joani 5:3) Ha u ka sutelela ku Jehova, u ka fumana kuli taba yeo ki ya niti. U kona ku eza cwañi seo?

17. U kona ku sutelela cwañi ku Jehova?

¹⁷ U fumanange nako ya ku bala Bibele ni lihatiso ze bulela za mwa Bibele. Ha u ka ziba ze ñata ka za Jehova, ku ka ku bela bunolo ku mu utwa ni ku ambola za hae ku ba bañwi. Jesu n’a ize: “Mutu yo munde u zwisa ze nde mwa sibulukelo se sinde sa pilu ya hae; . . . kakuli mulomo wa mutu u buleliswa ki se si tezi mwa pilu.” (Luka 6:45) Kacwalo, mwa pilu ya hao u beye mwateñi ze nde. Kuli u eze cwalo, wa kona ku itomela za ku eza. Mwendi wa kona ku lukisa hande mwa ku itukiseleza mikopano ya puteho mwa viki ye taha. Ku tuha f’o, u like ku abana teñi ka ku fa kalabo ye kuswani kono ili ye zwelela kwa pilu. Mi hape ku butokwa hahulu kuli lika ze u ituta, u li sebelise.—Mafilipi 4:9.

18. Niha u ka lwaniswa, u kona ku ba ni buikolwiso mañi?

¹⁸ Limbuyoti ze zwa mwa ku sebeleza Jehova ki za ku ya ku ile. Ki niti kuli fokuñwi mwendi u ka sheununwa kamba ku lwaniswa kakuli u yo muñwi wa Lipaki za Jehova. Kono u hupule Mushe. Bibele i li “n’a nz’a talimile mupuzo.” (Maheberu 11:24-26) Ni wena u zibe kuli Jehova u ka ku fa mupuzo kabakala buikatazo bwa hao bwa ku ituta ni ku ambola ka za hae. Luli ni kamuta h’a na ku ‘libala misebezi ya hao, ni lilato le u bonisize kwa Libizo la hae.’—Maheberu 6:10.

[Litaluso za kwatasi]

Kana Wa Hupula?

• Ki kabakalañi ha u kona ku kolwa kuli Jehova wa itebuha sebelezo ya hao?

• Ki mikutalezo mañi ye ba fumani ba bañwi ku ba ye sebeza hande kwa sikolo?

• U kona ku tiiswa cwañi kuli u kone ku paka ku ba bañwi mwa sitopa?

• U kona ku sutelela cwañi ku Jehova?

[Lipuzo za Tuto]

[Mbokisi/Maswaniso a fa likepe 20]

Nihaiba Banana Luli Ba Lumbeka Jehova!

Nihaiba banana luli ba konile ku fa bupaki kwa sikolo. Mu nahane ze ezahezi ze.

Mwa sitopa sa buketalizoho mwa n’a kena Amber, wa lilimo ze 10, ne ku baliwa buka ye n’e bulela za m’o ba Nazi ne ba nyandiselize Majuda mwa Ndwa ya Lifasi ya II. Amber s’a iseza bo muluti ba hae vidio ya Purple Triangles. Bo muluti ne ba komokile ku ziba kuli Lipaki za Jehova ni bona ne ba nyandisizwe mwa puso ya ba Nazi. Bo muluti ba buhisa sitopa kaufela vidio yeo.

Alexa, wa lilimo ze 8, n’a ñolezi sitopa sa habo liñolo la ku ba taluseza libaka ha n’a sa koni ku abana mwa mukiti wa bona wa Ngilisimusi. Bo muluti ba hae ne ba tabisizwe hahulu ki liñolo leo kuli mane ba taluseza Alexa kuli a li balele sitopa sa habo ni litopa ze ñwi hape ze peli! Kwa mafelelezo a liñolo leo, n’a ize: “Ni lutilwe ku kuteka ba bañwi ba ba na ni litumelo ze shutana ni za ka, mi ni itumela ku mina kwa ku kuteka keto ya ka ya ku sa abana mwa mukiti wa Ngilisimusi.”

Hamulahonyana wa ku kalisa sikolo, Eric n’a ile ni Buka Ya Ka ya Makande a Bibele kwa sikolo mi n’a kupile sibaka sa ku i bonisa ba mwa sitopa sa habo. Bo muluti ne ba ize: “Ni na ni muhupulo o munde. Kiñi ha u sa baleli balikani ba hao likande?” Eric n’a ezize cwalo. Hasamulaho, a kupa be ne ba itakaleza ku ba ni kopi ya buka yeo ku yemisa mazoho. B’a 18, ku kopanyeleza ni bo muluti, ne ba yemisize mazoho! Eric cwale u ikutwa kuli u ipumanezi simu ye nde ya ku kutaleza teñi.

Whitney, wa lilimo ze 9, u itumela hahulu kwa broshuwa ya Lipaki za Jehova ni Tuto. * U li: “Silimo ni silimo, boma ba fanga baluti ba ka broshuwa yeo, kono unomwaha, ki na ya n’a ba file yona. Broshuwa yeo ne i tahisize kuli bo muluti ba ka ba ni kete ku ba ‘muituti yo munde ka ku fitisisa wa viki.’”

[Litaluso za kwatasi]

[Mbokisi/Maswaniso a fa likepe 21]

Miinelo Ye Ba Itusisize Ba Bañwi kwa ku Bulela ka za Tumelo ya Bona

Ha ba filwe ku ñola piho kamba ku eza musebezi o muñwi wa kwa sikolo, ba bañwi ba ketile taba y’e ba konisize ku fa bupaki

Mikulwani b’a sikai ba file bo muluti ba bona vidio kamba hatiso ye ama taba ye buhisanwa mwa sitopa

Mikulwani ba bañwi ba ne ba bala Bibele kamba hatiso ye bulela za Bibele ka nako ya ku pumula, se ba atumezwi ki mikulwani ba bañwi ba ba buzize lipuzo

[Siswaniso se si fa likepe 18]

Ba ba hulile kwa moya ba kona ku tusa mikulwani ku ituta ku sebeleza Jehova