Mwa Memiwa

MULALELO wa Mulena wa n’a tatekile Mulena Jesu Kreste lilimo ze bat’o eza 2,000 kwamulaho, haki kezahalo fela ye tabisa ye kile ya ezahala. U bile ni susuezo ye tuna kwa batu ku zwa fo u kaliselizwe. Kabakala ku susumezwa ki ze ba bala mwa litaba za Evangeli ka za ze n’e ezahezi busihu b’o, batu ba bañata se ba likile ku eza kupuzo ya Mulalelo wa Mulena ka linzila ze shutana-shutana.

Ku eza cwalo kaufela kwa utwahala, kakuli Jesu Kreste ka sibili n’a laezi kuli balateleli ba hae ba ezange kupuzo yeo ni kuli i ezwange kamita. N’a ba bulelezi ka ku nonga kuli: “Mu eze cwalo kuli mu ni hupule.”—Luka 22:19; 1 Makorinte 11:23-25.

Kono kuli mukiti w’o u be o’ tusa luli, mutu u tokwa ku ba ni kutwisiso ye nepahezi ya ze u talusa, ka mo i fezwi mwa Linzwi la Mulimu, Bibele. Hape, ku butokwa ku ziba ze i bulela Bibele ka za lizazi ni nako ya ku eza mukiti w’o ni mwa ku u ezeza.

Ka ku utwa taelo ya Jesu, Lipaki za Jehova mwa lifasi kaufela ba ka kopana manzibwana a la Bulalu, la April 16, 2003, kuli ba eze kupuzo ya lifu la Jesu. Ikaba nako ya kuli ba nyakisise Mañolo ni ku tiisa tumelo ya bona ku Mulena Jesu Kreste ni lilato la bona ku yena, ya n’a bulezi kuli: “Mulimu u latile lifasi hahulu, mane u li file Mwan’a hae wa libanda, kuli mutu ufi kamba ufi ya lumela ku yena a si ke a shwa, kono a be ni bupilo bo bu sa feli.” (Joani 3:16) Mwa memiwa luli ku to kopana ni bona manzibwana ao kuli ni mina mu to tiisa tumelo ni lilato la mina ku Jesu Kreste ni Ndate wa kwahalimu, yena Jehova Mulimu.