Mikulwani Kana Mu Sweli Mwa Eza Zwelopili kwa Moya?

“NIHA ne ni fumanehanga kwa mikopano ya Sikreste, ne ni si na takazo ye tiile ya ku sebeleza Jehova,” kona mwa bulelela Hideo ha nahana ka za mazazi a makalelo a kwa sikolo sa sekondari. “Hañata, ne ni ikumbutanga ku ba mutu ya zibwa hahulu ki be ne ni kena ni bona sikolo, ni nze ni tambala-tambala ni nyazi. Ne ni si na milelo sakata, mi ne ni si na takazo ya ku eza zwelopili ya kwa moya.” Sina Hideo, ku bonahala kuli mikulwani ba bañata ba yembuluka fela, ba si na takazo ya ku bata ku peta milelo ye minde kamba ku eza zwelopili.

Haiba u mukulwani, mwendi u tabelanga lipapali kamba ze ñwi za ku ikatulusa ka zona. Kono haili ka za misebezi ya kwa moya, mwendi ha u ikutwi cwalo. Kana kwa konahala ku ba ya tabela za kwa moya? Ha ku nyakisise manzwi a walisamu a, a li: “Bupaki bwa [Muñ’a] Bupilo bwa sepahala, bu talifisa ya si na kutwisiso. . . . Mulao wa [Muñ’a] Bupilo u kenile, u bonisa meto.” (Samu 19:7, 8) Linzwi la Mulimu li kona ku talifisa “ya si na kutwisiso,” ili ‘ku bonisa meto a hae.’ Ee, lika za kwa moya za kona ku ku tabisa. Kono u tokwañi kuli u ikutwe cwalo? U lukela ku kalela kai?

U Be ni Takazo ya ku Sebeleza Mulimu

Pili, u lukela ku ba ni takazo ya ku sebeleza Mulimu. U nge mutala wa Josiasi mulena wa Juda wa mutangana. Buka ya Mulao wa Jehova ha ne i fumanwi mwa tempele, Josiasi n’a laezi kuli i baliwe mi n’a tabilwe hahulu kwa pilu kabakala za n’a utwile. Kacwalo, “Josiasi kih’a zwisa ze masila kaufela za mwa manaha kaufela a’ luwilwe ki bana ba Isilaele.” (2 Makolonika 34:14-21, 33) Ku bala Linzwi la Mulimu ne ku susuelize Josiasi ku eza ze ñata kuli a hulise bulapeli bo bu kenile.

Ni wena wa kona ku ba ni takazo ya ku sebeleza Jehova haiba u bala Bibele ni ku yeya z’o bala. Ku eza cwalo ne ku susuelize Hideo. A kalisa ku sebelisana hahulu ni paina ya hulile, ili mukutazi wa ka nako kaufela ya li yo muñwi wa Lipaki za Jehova. Paina y’o n’a tukufalelwanga ku bala Bibele mi n’a ezanga ka t’ata ku sebelisa lituto za yona mwa bupilo bwa hae. Ka ku susuezwa hahulu ki mutala wa paina y’o, Hideo a kalisa ku eza nto ye swana mi a ba ni takazo ye tuna ya ku sebeleza Mulimu hamohocwalo ni batu ba bañwi. Ku eza  zwelopili kwa hae ne ku mu tusize ku ba ni bupilo sakata.

Ku bala Bibele ka zazi kwa kona ku susueza mikulwani. Takahiro u li: “Ha ne ni yanga kwa ku lobala mi na lemuha kuli ne ni si ka bala kalulo ya Bibele ya lizazi leo, ne ni zuhanga ni ku eza cwalo. Kacwalo, na ikutwa kuli Jehova n’a ni etelela. Ku bala Bibele ka zazi ne ku ni tusize hahulu ku eza zwelopili kwa moya. Ka ku tundamena ku eza ze ñata mwa sebelezo ya Jehova, na kalisa ku eza bupaina bwa kamita ha ni feza fela sikolo sa sekondari. Mi na ikola bona luli.”

Kwand’a ku bala Bibele, ki nto mañi ye ñwi ye kona ku ku tusa ku tiisa takazo ya ku lumba Jehova? Tomohiro n’a lutilwe litaba za niti za Bibele ki bom’ahe. U li: “Ha ne ni itutile buka ya Life Does Have a Purpose mwa butungi ni li wa lilimo ze 19, ne ni susuelizwe hahulu ki lilato la Jehova ni sitabelo sa Jesu sa tiululo. Ku itebuha cwalo lilato la Mulimu ne ku ni susuelize ku eza ze ñata mwa sebelezo ya Jehova.” (2 Makorinte 5:14, 15) Sina Tomohiro, mikulwani ba bañata ba susuezwa ku eza zwelopili ya kwa moya ka ku tukufalelwa ku eza tuto ya ka butu ya Bibele.

Kono ku cwañi haiba nihakulicwalo ha u na takazo ya ku sebeleza Jehova? Kana ku na ni ya kona ku ku tusa? Muapositola Paulusi n’a ñozi kuli: “Kakuli Mulimu ki Yena ya sebeza ku mina kuli mu late mi mu eze.” (Mafilipi 2:13) Ha u kupa Jehova kuli a ku tuse, u ka ku fa moya wa hae o kenile, mi ona u ka ku tiisa kuli u “late” ni kuli u ‘eze.’ F’o kikuli moya o kenile wa Mulimu u ka tiisa takazo ya hao ya ku eza ze u kona kaufela mwa sebelezo ya Jehova ni ku ku tusa ku hula kwa moya. Kacwalo he, u sepe m’ata a Jehova mi u tiise pilu ya hao!

U Itomele Za ku Eza

Ha se u ikatulezi ku sebeleza Jehova hahulu, u tokwa ku itomela za ku eza ilikuli u eze zwelopili kwa moya. Mana, musizana wa Sikreste, n’a ize: “Ku itomela za ku eza ne ku ni tusize hahulu. Ku fita ku kutela mwamulaho, ne ni kona ku zwelapili ka bundume. Ha se ni lelile sa ku eza, na tukufalelwa ku kupa Jehova kuli a ni etelele, mi ne ni konile ku eza zwelopili ni sa hakanyehi.”

Z’o itomela ku eza li lukela ku ba za ngana ili ze u kona ku peta. Ku bala kauhanyo i liñwi ya Bibele ka zazi i kona ku ba nto ya ngana ya ku itomela. Wa kona ku kalisa ku eza patisiso. Ka ku fa mutala wa ze li teñi mwa Sikuwa, wa kona ku ituta mikwa ya Jehova ye kolohanyizwe mwatas’a tohonyana ye li “Qualities by Name” fa toho ya taba ye li “Jehovah” mwa Watch Tower Publications Index. Ku na ni mikwa ya Jehova ye bat’o ba ye 40 ye u kona ku nyakisisa, mi ku eza patisiso ye cwalo kaniti ku ka ku suteleza ku Jehova ni ku ku susueza ku mu sebeleza hahulu ni ku fita. Ze ñwi z’o kona ku peta ki ku alabanga niheba hañwi ka nako ya mukopano ni mukopano wa Sikreste fo ku tokwa kuli baputehi ba alabe, ku ziba hande niheba mutu a li muñwi fa mukopano ni mukopano wa puteho, ku lapelanga ka zazi ku Jehova ni ku bulelelanga ba bañwi ka za hae.

Haiba ha u si ka iñolisa kale mwa Sikolo sa Bukombwa sa Teokratiki, wa kona ku itomela ku eza yona nto ye nde yeo. Kana wa kutazanga? Haiba ha u kutazangi, wa kona ku kalisa ku sebeleza fa ku ba muhasanyi ya si ka kolobezwa. Ku nahanisisa hahulu za silikani sa hao ni Jehova ni ku ineela ku yena i kona ku ba muhato o tatama. Mikulwani ba bañata ba  lika ku peta za buineelo bwa bona ka ku lika ku eza bukombwa bwa ka nako kaufela.

Hailif’o ki ko kunde ku ba ni za ku eza mwa bupilo, u tokolomohe ku ba ni moya wa kangisano. U ka ba ya tabile ni ku fita ku z’o eza haiba ha u ibapanyi ni ba bañwi.—Magalata 5:26; 6:4.

Mwendi u ikutwa kuli ha u na yeloseli mi ku itomela milelo ye minde ku ku bela t’ata. Fohe u sebelise kelezo ya Bibele ye li: “Teya zebe, u utwe manzwi a ba ba butali.” (Liproverbia 22:17) U kupe tuso kwa bashemi ba hao kamba kwa Bakreste ba bañwi ba ba hulile. Kono bashemi ni ba bañwi ba lukela ku ba ni kutwisiso ni susuezo mwa taba ye. Ku ikutwa ku hapelezwa ku peta mulelo o ba tomelwa ki ba bañwi ku kona ku filikanya mikulwani mi mane ni ku ba tibela ku peta se siñwi. Ne ku ezahezi cwalo ku musizana yo muñwi, mi n’a ize: “Bashemi ba ka ne ba ni tomezi ze ñata za ku eza, inge cwalo ku iñolisa mwa Sikolo sa Bukombwa sa Teokratiki, ku zwela mwa sebelezo ya mwa simu, ku kolobezwa, ni ku ba paina. Ne ni ikatalize hahulu ku li peta kaufela zona. Ha se ni petile nto ye ñwi, bashemi ba ka ne ba sa ni babazi, kono ne ba ni fanga nto ye ñwi ya ku peta. Kacwalo, kamita ne ni ikutwanga ku hapelezwa ku peta za ku eza. Ne ni katezi mi ne ni sa ikutwi kuli ni petile se siñwi.” Ki sifi se ne si fosahezi? Lika zeo kaufela n’e li ze nde, kono n’e si za n’a ikupulezi. Kuli u kondise lika, u lukela ku ba ni takazo ya ku itomela za ku eza wena muñi!

U nahane ka za Jesu Kreste. Ha n’a tile fa lifasi, n’a ziba seo Ndat’ahe, Jehova, n’a bata kuli a si eze. Ku eza tato ya Jehova n’e si fela nto ya n’a na ni ku eza Jesu, kono hape n’e li musebezi wa n’a na ni ku peta. Jesu n’a ngile cwañi musebezi wa hae? N’a ize: “Sico sa ka, kikuli ni eze se si latwa ki Ya ni lumile, mi ni feleleze musebezi wa hae.” (Joani 4:34) Jesu n’a tabela ku eza tato ya Jehova mi n’a ezize kaufela za n’a mu bulelezi Ndat’ahe. Ku Jesu, n’e li inge sico—ku peta musebezi wa n’a tokwiwa ku eza ne ku mu tabisize. (Maheberu 10:5-10) Ni wena wa kona ku fumana tabo ha u ba ni takazo ye nde ya ku eza ze ba ku susueza bashemi ba hao kuli u li eze.

U Si Ke Wa Katala ku Eza Hande

Ha se u lelile sa ku eza, u sebeze ka t’ata kuli u si pete. Magalata 6:9 i li: “Lu si ke lwa katala ku eza hande, kakuli lu ka kutula mwa nako ya teñi ha lu sa zwafi.” U si ke wa itinga fa m’ata a hao kamba buikoneli bwa hao u nosi. U ka tahelwa ki matata mi fokuñwi ni ku ikutwa kuli u palezwi ku peta nto ye ñwi. Kono Bibele i lu kolwisa kuli: “U beye [Muñ’a] Bupilo mwa milelo ya hao kaufela, mi Yena u ka lukisa linzila za hao.” (Liproverbia 3:6) Jehova u ka ku tiisa ha u nze u sebeza ka t’ata ku peta milelo ya hao ya kwa moya.

Ee, ka ku ba ni takazo ya ku sebeleza Jehova ni ka ku ikataza ku peta za ku eza za kwa moya, ‘ku zwelapili kwa hao ku ka lemuhiwa ki batu kaufela.’ (1 Timotea 4:15) Mi kihona u ka ikola bupilo sakata bwa ku sebeleza Mulimu.

[Siswaniso se si fa likepe 9]

Ku bala Bibele ni ku yeya ze u balile ku ka ku susueza ku sebeleza Jehova

[Siswaniso se si fa likepe 10]

Jesu n’a ezize za n’a bata Ndat’ahe kuli a li eze