Mu Tiise Mazoho a Mina

MWA Bibele, lizoho li bulezwi hañata-ñata. Liswanisezo ka za lizoho li itusisizwe mwa linzila ze fitana-fitana. Ka mutala, lizoho le li kenile li talusa ku sa ba ni mulatu. (2 Samuele 22:21; Samu 24:3, 4) Ku fumbutulula lizoho ku talusa ku ba ni bufani. (Deuteronoma 15:11; Samu 145:16) Mutu ya toboha bupilo bwa hae kuti u beya moyo wa hae mwa lizoho. (1 Samuele 19:5) Mutu ha ba ni mazoho a’ fokozi ku talusa kuli u zwafile. (2 Makolonika 15:7) Mi mutu ha tiisa lizoho ku talusa kuli u itiisa ku eza nto ye ñwi.—1 Samuele 23:16.

Kacenu lu tokwa hahulu ku tiisa mazoho a luna. Lu pila mwa “linako ze tata.” (2 Timotea 3:1) Ha lu zwafanga, lu batanga fela ku tuhela, inge kuli mazoho a luna a fokozi. Lu bonanga banana ha ba tuhela likolo, banna ha ba siya mabasi a bona, ni basali ha ba yubeka bana ba bona. Ka ku ba Bakreste, lu tokwa ku tiisa mazoho a luna kuli lu tiyele miliko y’e lu tahela ha lu nze lu sebeleza Mulimu. (Mateu 24:13) Ha lu eza cwalo, lu ka tabisa pilu ya Jehova.—Liproverbia 27:11.

M’o Mazoho A Tiisezwa

Majuda mwa miteñi ya Ezira ne ba tokwa ku tiisa mazoho a bona kuli ba feze musebezi wa ku yaha sinca tempele ya Jehova mwa Jerusalema. Mazoho a bona n’a tiisizwe cwañi? Bibele i li: “Ba eza mukiti wa mahobe a’ si na mumela ka mazazi a 7 ka tabo; [Muñ’a] Bupilo n’a ba wabelisize, kakuli n’a ba sikululezi pilu ya mulena wa Asirya, kuli a tiise mazoho a bona mwa musebezi wa Ndu ya Mulimu wa Isilaele.” (Ezira 6:22) Kwa iponelwa kuli n’e li ka m’ata a hae a sebeza, Jehova ha n’a sikuluzi pilu ya “mulena wa Asirya” kuli a lumeleze batu ba Mulimu ku kuta habo, mi N’a tiisize batu lipilu, kuli ba feze musebezi o ne ba kalisize.

Hamulaho, mamota a Jerusalema ha n’a tokwa ku lukiswa, Nehemia n’a tiisize mazoho a banabahabo yena kuli ba sebeze. Lu bala kuli: “Na ba taluseza mo ne li inezi ku na, lizoho le li musa la [Muñ’a] Bupilo Mulimu wa ka, na ba bulelela ni manzwi a mulena a’ bulezi ni na. Kiha ba li: A lu nanuheni, lu yaheñi! Mi ba itiisa ku eza musebezi o munde wo.” Nehemia ni Majuda ba bañwi ha se ba tiisize mazoho a bona cwalo, ne ba konile ku yaha sinca mamota a Jerusalema mwa mazazi a’ 52 fela!—Nehemia 2:18; 6:9, 15.

Jehova ka nzila ye swana u tiisa mazoho a luna kuli lu kutaze taba ye nde ya Mubuso. (Mateu 24:14) U lu ‘eza ba ba petehile mwa misebezi ye minde kaufela, kuli lu eze se si latwa ki yena.’ (Maheberu 13:21) U lu file liitusiso ze nde ka ku fitisisa. Lu na ni Bibele ni libuka ze tomile fa Bibele, limagazini, libroshuwa, matrakiti, makaseti ni mavidio za ku itusisa mwa ku kutaza kwa batu mwa lifasi  kaufela. Mane, lihatiso za luna li fumaneha mwa lipuo ze fitelela 380. Mi ku zwa f’o, ka mikopano ya puteho ni ka mikopano ye mituna, Jehova u lu luta mwa ku itusiseza liitusiso ze nde zeo kuli lu pete bukombwa bwa luna.

Jehova niha tiisa mazoho a luna ka linzila ze ñata cwalo, u sa lu tokwa kuli lu ikataze. Mu hupule seo mupolofita Elisha n’a bulelezi Mulena Joasi, ya n’a tilo kupa tuso ku yena ya ku tula limpi za Masiria. Elisha n’a bulelezi mulena y’o kuli a nge masho ni ku a kunupela fafasi. Bibele i li: “A kunupa halalu, kih’a yema. Munna wa Mulimu a mu halifela, a li: Kab’o kunupile haketa-lizoho, nihaili haketa-lizoho ka munepelo u li muñwi, kabo n’o ka koma Masiria, mane wa ba feza; kanti cwale u ka ba tula halalu fela.” (2 Malena 13:18, 19) Bakeñisa kuli n’a si ka ikataza, Joasi n’a si ka feza ku bulaelela Masiria.

Ki nto ye swana ni luna ha lu bata ku peta z’a lu file Jehova. Ku fita ku bilaela ka za litiko ze lu talimana ni zona kamba kuli musebezi u tatafezi hahulu, lu lukela ku u eza ka tukufalelo ni ka pilu kaufela. Lu tokwa ku tiisa mazoho a luna ni ku itinga ku Jehova.—Isaya 35:3, 4.

Jehova U Ka Tiisa Mazoho a Luna

Jehova h’a na ku palelwa ku lu tusa kamba ku tiisa mazoho a luna kuli lu eze tato ya hae. Kono Mulimu h’a na ku eza makazo ni ku lu ezeza lika kaufela. U tokwa kuli lu eze ze lu swanela ku eza—ku bala Bibele ka zazi, ku itukiseza ni ku fumaneha kwa mikopano kamita, ku yanga mwa bukombwa hañata ha ku konahala, ni ku lapela ku yena kamita. Haiba lu ka eza kalulo ya luna ka busepahali ni ka tukufalelo ha lu sa na ni kolo ya ku eza cwalo, Jehova u ka lu fa m’ata a ku eza z’a tokwa ku luna.—Mafilipi 4:13.

Mu nahane taba ye ya Mukreste yo muñwi ya n’a shwezwi ki musal’a hae ni bom’ahe mwa silimo si li siñwi. Ha n’a sa li mwa maswabi ao, musal’a mwan’a hae a kauhana ni mwan’a hae ni ku tuhela ku ba Mukreste. Muzwale y’o n’a ize: “Ne ni itutile kuli ha lu koni ku iketela miliko ye ka lu tahela, ni ku keta nako ye i ka lu tahela kamba buñata bwa miliko ye ka lu tahela.” U fumana cwañi m’ata a ku itiisa? “Ze ni tiisize ki tapelo ni tuto ya ka butu. Mi susuezo ya mizwale ni likaizeli ba kwa moya i ni omba-ombile hahulu. Mi nto ye tuna ka ku fitisisa ye ni lemuhile kikuli ku butokwa ku tiisa silikani ni Jehova butata bu si ka taha kale.”

Ku si na taba ni miinelo ya mwa bupilo bwa mina, mu zwelepili ku sepa Jehova ka ku tala ni ku itusisa hande lika kaufela za sweli ku mi fa kuli mu tiise mazoho a mina. Fohe mu ka kona ku ezeza Jehova sebelezo ye nde ka ku fitisisa ni ku tahisa cwalo tumbo kwa libizo la hae la butokwa.—Maheberu 13:15.

[Siswaniso se si fa likepe 31]

Bakeñisa kuli n’a palezwi ku ikataza, Joasi n’a si ka feza ku bulaelela Masiria