“U Ni Zamaisa Fakaufi ni Mezi A Kuzize”

MWA libaka ze cisa mo ne ku ñolelwa Bibele, lingu li tokwa ku nwa mezi ka zazi. Kacwalo, kalulo ya butokwa ya musebezi wa mulisana ki ku fa mutapi wa hae mezi. Fokuñwi, balisana ba nwisanga lingu za bona mezi mwa lisima, ili ku a sela mwa likungu kuli lingu li nwe. (Genese 29:1-3) Kono sihulu mwa matabula, libaka za kwa milapo ni linuka ki ze ombalile, ili mapumulelo a’ na ni “mezi a kuzize.”—Samu 23:2.

Mulisana yo munde u na ni ku ziba kw’a fumaneha mezi ni mafulisezo a swanela a mutapi wa hae. Ku ziba hande kwa hae sibaka seo ku konisa lingu za hae ku pila. Davida, ya n’a tandile lilimo ze ñata inz’a lisa lingu mwa malundu a Judea, n’a bapanyize ketelelo ya Mulimu ya kwa moya ni ya mulisani ya etelela lingu za hae kwa mafulisezo a mande ni kwa mezi a pilisa. Davida n’a ize: “U ni zamaisa fakaufi ni mezi a kuzize.”—Samu 23:1-3.

Hamulaho wa lilimo ze ñata, Jehova n’a itusisize swanisezo ye swana ka mupolofita wa hae Ezekiele. N’a sepisize ku kutisa batu ba hae ku zwa mwa manaha mo ne ba hasanezi, sina mulisana mwa kutiseza lingu za hae. N’a ba sepisize kuli: ‘Ni ka li kutisa, ni ka li fuliseza fa malundu a Isilaele, ni kwatuko ni mezi a buba.’—Ezekiele 34:13.

Jehova Mulimu hape u iyakatwa hahulu ka za ku fa mezi a swanisezo. Buka ya Sinulo i talusa ka za “nuka ya mezi a bupilo” ye zwa mwa lubona lwa Mulimu. (Sinulo 22:1) Batu kaufela ba memiwa ku nwa mwa nuka yeo. “Ya lata, a nge fela kwa mezi a bupilo.”—Sinulo 22:17.

Mezi a bupilo a swanisezo ao a yemela litukiso za Mulimu za bupilo bo bu sa feli. Ya lata kaufela wa kona ku kalisa ku nwa kwa mezi a cwalo ka ku ‘ba ni zibo ye nepahezi ya ku ziba Mulimu a nosi wa niti, ni y’a lumile, yena Jesu Kreste.’—Joani 17:3.