Libubo la Kacenu la Ba Ba Twi Ki Bahalalehi

“Mwa hupula nako ye ne lu nyikwile ku utwa za batu ba ba tusize hahulu sicaba? Kono batu ba kwa America ba ba eza 4.2 milioni be ne ba fumanehile kwa kepelo ya Mufumahali Teresa la [September 13] ne ba si ka ikutwa cwalo. Ku zwa lizazi l’a shwa, lona la [September 5,] batu se ba fitisize likupo ze ñata-ñata ku ba Vatican kuli ba mu eze muhalalehi. Ki ba sikai ba ba sa kolwi kuli seo si ka ezahala.”—Mutende wa Sun-sentinel, United States, October 3, 1997.

BA BAÑATA b’a nga kuli misebezi ya ku tusa ba bañwi ya Mufumahali Teresa, mulumiwa wa Katolika, ki yona poniso sakata ya buhalalehi. Likeleke ze ñwi ni zona li na ni batu ba zona ba ba ipitezi. Niteñi, mwendi kwa bahalalehi bao, ha ku na nihaiba a li muñwi ya kutekeha hahulu sina ba ba ezizwe bahalalehi ki Keleke ya Katolika.

Papa John Paul II u ketile bahalalehi ba ba bat’o eza 300 mwa puso ya hae ya bupapa, ili ba bañata ku fita bahalalehi kaufela ba ba ketilwe ki bo papa ba bañwi ba mwa lilimo za ma-1900. * Ki kabakalañi batu ha ba ineezi cwalo ku ba ba twi ki bahalalehi, ili bao buñata bwa bona ha ba zibwi ki Makatolika ba bañata?

Caziba wa tuto ya za bulapeli ya bizwa Lawrence Cunningham wa kwa Notre Dame University u talusa kuli: “Batu ba tabiswa ki taba ya kuli fa lifasi kwa kona ku fumaneha bahalalehi. Ku ba teñi kwa bahalalehi ku bonisa kuli nihaiba kacenu mutu wa kona ku eza misebezi ye ipitezi ya butusi.” Hape, batu ba ipapata kuli ba ba twi ki bahalalehi ba fakaufi hahulu ni Mulimu, ili nto yeo kuti i ba konisa ku yemela hande batu ba ba sa pila. Ha ku fumanwa tubongobongo kamba ze ñwi za situpu sa ya twi ki muhalalehi, batu b’a li tompanga ka ku lumela kuli ku na ni m’ata a simuluha ku zona.

Katekisema ka Mukopano wa kwa Trent, ke ne ka zwisizwe mwa lilimo za mwanda wa bu 16 ili ku tiisa tuto ya Katolika, ne ka ize: “Ha lu fosi ha lu fitile fa kutwisiso ya kuli, ku kuteka bahalalehi ‘ba ba itobalezi ku Mulena,’ ku ba kupa ku lu yemela, ni ku tompa tubongobongo ni mufuse wa litupu za bona ze kenile ki likezo ze hanelela hahulu ku ekeza kwa kanya ya Mulimu, isi ku i fukuza. Mi i ekezeha ka ku likana ni m’o sepo ya Mukreste i tiyela, mi ni yena a susumezwa ku latelela misebezi ye minde ya bahalalehi.” (The Catechism of the Council of Trent, 1905) Bakreste ba niti ku si na ku kakanya ba bata ku pila ka bukeni, ku atumela Mulimu ka mukwa o swanela, ni kuli ba tusiwe ki Yena. (Jakobo 4:7, 8) Kacwalo he, ka ku ya ka Linzwi la Mulimu, ki bomañi ba ba swanela ku bizwa kuli ki bahalalehi ba niti? Mi ki lifi ze ba peta?

[Litaluso za kwatasi]