“Mu Tahe ku Na . . . , Mi ni Ka Mi Imulula”

Batangana ni Likalibe Ba Ba Swana Inge Puka Ye Imulula

JESU KRESTE kaniti luli n’a kopanyelelize ni balateleli ba hae ba batangana ni likalibe ha n’a ize: “Mu tahe ku na . . . , mi ni ka mi imulula.” (Mateu 11:28) Batu ha ne ba kalisize ku mu tiseza bana ba bona ba banyinyani, balutiwa ba hae ba lika ku ba tibela. Kono Jesu a li: “Mu tuhele bana ba banyinyani ba tahe ku na, mi mu si ke mwa ba hanisa.” Mane Jesu a “ba nga mwa mazoho a hae, mi a ba fuyola ka ku beya mazoho a hae fahalimu a bona.” (Mareka 10:14-16) Kaniti luli Jesu n’a nga bana ba banyinyani bao ku ba ba butokwa.

Bibele i bulela ka za batangana ni likalibe be ne ba sepahala, hamohocwalo ni ba ba sa nonoboka ni bana ba banyinyani, be ne ba tomile mitala ye minde ya ku sebeleza Mulimu. Mwa buka ya Lisamu, ne ku polofitilwe za “micaha” ye imulula inge puka. Hape i bulela ka za “batangana” ni “likalibe” ba ba lumbeka libizo la Jehova.—Samu 110:3; 148:12, 13.

Sibaka M’o Batangana ni Likalibe Ba Kona ku Kondisa Lika

Swanisezo ya puka ki ye swanela, kakuli puka i nyalanisana ni buñata ni mbuyoti. (Genese 27:28) Puka ki ye nde mi ya katulusa. Mwa nako ye ya ku ba teñi kwa Kreste, batangana ni likalibe ba Sikreste ka ku itatela ni ka tukufalelo ba ifana ka buñata bo butuna. Sina puka ye imulula, batangana ni likalibe ba bañata ba sweli ku sebeleza Mulimu ka nyakalalo ni ku tusa balapeli ba bañwi.—Samu 71:17.

Batangana ni likalibe ba Sikreste ha ba katulusi fela ba bañwi; bona ka sibili ba sweli ku katuluswa ki sebelezo ya bona. Kopano ya Mulimu i ba fa muinelo mo ba kona ku kondisa. Ka ku bukeleza mizamao ye pahami, batangana ni likalibe ba ba ni silikani se si tiile ni Mulimu. (Samu 119:9) Mwa puteho, ba eza hape misebezi ye minde mi ba fumana balikani ba bande—ili lika ze ekeza kwa tabo ni bupilo bo bu na ni mulelo.

‘Mulyani ni Mooko’

Kana batangana ni likalibe ba Sikreste ba ikutwanga inge “puka”? Mu utwe za kandeka Tania, kalibe ya sebeza ka t’ata mwa puteho ili ya tandanga ka tabo lihora ze fitelela 70 mwa bukombwa. U ikutwa cwañi? U li: “Ni ikutwa ku imululwa ni ku tiiswa. Ku ba ni Jehova ni kopano ya hae ya fa lifasi-mubu mwa bupilo bwa ka ku bile ‘mulyani ni mooko’ ku na.”—Liproverbia 3:8.

Ariel, kalibe yo muñwi ya li sikombwa sa ka nako ye tezi, u itebuha ku fepiwa kwa moya kw’a fumana mwa puteho. U li: “Ha ni ya kwa mikopano ya Sikreste, ya sikiliti, ni ya mupotoloho ni ku kona ku yo ca fa tafule ya Jehova  ya kwa moya, nto yeo luli ya ni imululanga kwa moya. Mi na tiiswa ku ziba kuli mwa lifasi kaufela, ku na ni be ni beleka ni bona.” Ka ku talusa simbule tota sa kimululo yeo, u li: “Kwa imulula hahulu ku ba mulikan’a Jehova, sihulu ha ni utwa kamba ku bona likezahalo ze maswe ze u tahisa muinelo wa cwale kwa batu.”—Jakobo 2:23.

Abishai, wa lilimo ze 20, u sebeza sina mukutazi wa ka nako ye tezi mi hape ki mutang’a bukombwa mwa puteho. U talusa mwa ikutwela ka manzwi a’: “Ni ikutwa ku imululwa kakuli na ziba mwa ku tatululela matata a mañata e ba ipumana ku ona ba banca kacenu. Niti ya mwa Bibele i ni tusize ku zwelapili ku kumalela ku ze ni tokwa ku eza kuli ni sebeleze Jehova ka pilu kaufela.”

Mwa lilimo za hae za ku nonoboka, Antoine n’a li wa kacima-cima. N’a kile a lenga mwan’a sikolo yo muñwi sipula, mi n’a tabile yo muñwi ka potoloto. Antoine n’a si mutu ya imulula! Kono moya wa hae n’o cincizwe ki litaelo za mwa Bibele. Cwale s’a li wa lilimo ze 19 mi ki mutang’a bukombwa ni sikombwa sa ka nako ye tezi mwa puteho, mi u li: “Ni itumela ku Jehova kwa ku ni lumeleza ku ba ni zibo ya ku mu ziba ni ku ni tusa ku bona butokwa bwa ku ba ni buiswalo ni ku cinca mupilelo wa ka. Ka ku eza cwalo, ni pimile matata a mañata.”

Ba bañwi ba lemuha moya o imulula wa batangana ni likalibe ba Sikreste. Matteo ki mutangana ya li Paki kwa Italy. Bo muluti ba hae ba atula kuli ya n’a ka itusisa lipulelo ze maswe mwa sitopa n’a ka lifiswa malinyana. Nakonyana ku zwa f’o, banana ba kupa kuli mulao wo u feliswe, ka ku talusa kuli, “ha ku konahali ku sa itusisa lipulelo ze maswe.” Matteo u talusa kuli: “Kono bo muluti ba li ha u koni ku feliswa, mi ne ba itusisize n’a, yo muñwi wa Lipaki za Jehova, ku ba mutala, ili ku ni lumba fapil’a sitopa kaufela kabakala lipulelo za ka ze nde.”

Mwa sitopa sa likatazi mwa Thailand, bo muluti ba biza Racha wa lilimo ze 11 fapil’a sitopa ni ku mu lumba kabakala moya wa hae, kuli: “Kiñi mina kaufela ha mu sa likanyisi mutala wa hae? U sebeza ka t’ata mwa lituto za hae mi u na ni moya o munde.” Ku tuha f’o, ba li kwa baituti: “Mwendi kambe ne mu ka ba yo muñwi wa Lipaki za Jehova inge Racha, kuli mu bolosole muzamao wa mina.”

Kwa tabisa ku bona likiti-kiti za batangana ni likalibe za Sikreste ha ba ekeza kwa zibo ya bona ya ku ziba Jehova ni ku eza tato ya hae. Batangana ni likalibe ba ba cwalo ba bonisa butali bo bu siyo kwa batangana ni likalibe ba silifasi. Mulimu wa kona ku ba tusa ku kondisa mwa bupilo bwa bona bwa cwale ni ku ba fa nako ya kwapili ye nde mwa lifasi le linca le li taha. (1 Timotea 4:8) Mwa lifasi le li sinyehile kwa moya la muinelo wa cwale, mo ku atile batangana ni likalibe ba ba filikani ni ku zwafa, batangana ni likalibe ba Sikreste ba bonisa shutano ye imulula!